ബെവ്കോയിലെ പ്ലാസ്റ്റിക് കുപ്പി; പദ്ധതി നിർത്തലാക്കിയതിൽ എക്‌സൈസ് മന്ത്രിക്ക് കടുത്ത അതൃപ്തി

തിരുവനന്തപുരം: ബെവ്കോ മദ്യശാലകളിലെ പ്ലാസ്റ്റിക് കുപ്പികൾ ശേഖരിക്കുന്ന പദ്ധതി നിർത്തലാക്കിയ നടപടിയിൽ എക്‌സൈസ് മന്ത്രി കടുത്ത അതൃപ്തി രേഖപ്പെടുത്തി. മന്ത്രിയോട് ആലോചിക്കാതെ ഏകപക്ഷീയമായി പദ്ധതി പിൻവലിച്ചതാണ് അതൃപ്തിക്ക് കാരണമായത്. വിഷയത്തിൽ വിശദീകരണം നൽകുന്നതിനായി ബെവ്കോ എംഡിയോട് നേരിട്ട് ഹാജരാകാൻ മന്ത്രി നിർദ്ദേശിച്ചിട്ടുണ്ട്. പ്ലാസ്റ്റിക് കുപ്പി ശേഖരണ പദ്ധതി നിർത്തലാക്കാൻ തീരുമാനിച്ച വിവരം വകുപ്പ് മന്ത്രി അറിഞ്ഞിരുന്നില്ല. മന്ത്രിയോട് ആലോചിക്കാതെ ഉദ്യോഗസ്ഥർ എടുത്ത തീരുമാനമാണ് വിവാദമായിരിക്കുന്നത്.

പ്ലാസ്റ്റിക് കുപ്പികൾക്ക് 20 രൂപ അധികമായി ഈടാക്കി, കുപ്പി തിരികെ നൽകുമ്പോൾ പണം തിരികെ നൽകുന്ന രീതിയിലാണ് പദ്ധതി നടപ്പാക്കിയിരുന്നത്. ഈ മാസം 20-ഓടെ ഈ പദ്ധതി അവസാനിപ്പിക്കാനായിരുന്നു ബെവ്കോയുടെ തീരുമാനം. പദ്ധതി വിചാരിച്ചത്ര വിജയകരമായില്ല എന്ന വിലയിരുത്തലിനെ തുടർന്നാണ് മാനേജ്‌മെന്റ് ഇത് നിർത്തലാക്കാൻ തീരുമാനിച്ചത്.

പദ്ധതി പൂർണ്ണമായി ഉപേക്ഷിക്കില്ലെന്നും, തദ്ദേശ സ്വയംഭരണ വകുപ്പുമായി ചേർന്ന് കൂടുതൽ പരിഷ്‌കാരങ്ങളോടെ പദ്ധതി പുനസ്ഥാപിക്കാനുമാണ് എക്‌സൈസ് വകുപ്പ് ലക്ഷ്യമിടുന്നത്. ആവശ്യമായ മാറ്റങ്ങൾ വരുത്തി പദ്ധതി തിരികെ കൊണ്ടുവരാൻ ബെവ്കോ എംഡിക്ക് മന്ത്രി നിർദ്ദേശം നൽകുമെന്നാണ് വിവരം. വകുപ്പ് മന്ത്രി അറിയാതെ സുപ്രധാനമായ ഉത്തരവുകൾ ഇറങ്ങുന്നതിലെ അതൃപ്തി സർക്കാർ ഗൗരവമായിട്ടാണ് കാണുന്നത്. പദ്ധതി കൂടുതൽ കാര്യക്ഷമമായി ഉടൻ തന്നെ പുനരാരംഭിക്കുമെന്നാണ് സൂചന.