അഞ്ച്‌ വർഷത്തിനിടെ 30 ലക്ഷം എ.സികൾ; കുതിച്ചുയർന്ന് വൈദ്യുതി ഉപഭോഗം, കേരളം ഇരുട്ടിലേക്കോ? പരിഹാരമെന്ത്

തിരുവനന്തപുരം: കാലാവസ്ഥയിൽ വൻ തോതിൽ മാറ്റങ്ങളാണ് സംഭവിച്ചു കൊണ്ടിരിക്കുന്നത്. കടുത്ത വേനലും മഴയും താളം തെറ്റിയെത്തുമ്പോൾ സംസ്ഥാനത്ത് വൈദ്യുതി ഉപയോഗവും വർധിക്കുന്ന സാഹചര്യമാണ്. വേനലിനെ വെല്ലുന്ന രീതിയിൽ സംസ്ഥാനത്ത് വൈദ്യുതി ഉപഭോഗം എക്കാലത്തെയും ഉയർന്ന നിരക്കിലേക്കാണ് ഇത്തവണ കുതിച്ചുയർന്നത്. മഴക്കാലത്ത് പോലും ലോഡ് ഷെഡ്ഡിങ് ഏർപ്പെടുത്തുന്ന സാഹചര്യവും ഉണ്ടായി.

സംസ്ഥാനത്തെ ഊർജ്ജ മേഖല വൻ പ്രതിസന്ധിയിലൂടെയാണ് നീങ്ങിക്കൊണ്ടിരിക്കുന്നത്. പ്രതിവർഷം വർദ്ധിച്ചുവരുന്ന വൈദ്യുതി ഉപഭോഗവും ഉത്പാദനത്തിലെ പരിമിതിയും വാങ്ങാൻ കിട്ടുന്ന വൈദ്യുതിയുടെ ലഭ്യത കുറഞ്ഞതും കൂടിയ വിലയും പ്രതിസന്ധി സൃഷ്ടിക്കുന്നു.

വൈദ്യുതി ഉപഭോഗം അഞ്ചുവർഷത്തിനിടെ കൂടിയത് 800 കോടി യൂണിറ്റ്

സംസ്ഥാനത്തെ വൈദ്യുതി ഉപഭോഗത്തിൽ അഞ്ചുവർഷത്തിനിടെ 800 കോടി യൂണിറ്റിന്റെ വർധനയാണ് ഉണ്ടായിരിക്കുന്നത്. ഓരോ വർഷവും വേനൽച്ചൂട് ഉയരുന്നതും അതിനനുസരിച്ച് എ.സി. ഉപയോഗിക്കുന്നവരുടെ എണ്ണത്തിലെ വർധനയുമാണ് ഉപഭോഗം ഉയരാനുള്ള പ്രധാനകാരണമെന്നാണ് വിവരം. അഞ്ചുവർഷത്തിനിടെ ഏകദേശം 30 ലക്ഷം പേർ എ.സി. ഉപയോഗത്തിലേക്കു മാറിയതായാണ് കണക്ക്. ഉപഭോഗം കുതിച്ചുയരുന്നതനുസരിച്ച് സംസ്ഥാനത്തെ വൈദ്യുതി ഉത്പാദനത്തിൽ വർധനയുണ്ടാകുന്നുമില്ല. ഈ നില തുടരുകയാണെങ്കിൽ സമീപഭാവിയിൽ അതിരൂക്ഷമായ വൈദ്യുതിപ്രതിസന്ധിയാകും സംസ്ഥാനം അഭിമുഖീകരിക്കേണ്ടിവരുക.

വൈദ്യുതിബോർഡിന്റെ കണക്കുപ്രകാരം 2021-'22 സാമ്പത്തികവർഷം ഉപഭോക്താക്കൾക്ക് വിറ്റത് 2,349 കോടി യൂണിറ്റ് വൈദ്യുതിയായിരുന്നു. 2025-'26 വർഷം ഇത് 3,147 കോടി യൂണിറ്റായി ഉയർന്നു. 2026-'27-ൽ ഇത് 3500 കോടി യൂണിറ്റായി ഉയരുമെന്നാണ് കരുതുന്നത്.

2023-ൽ 4.8 ലക്ഷം എ.സി.കളാണ് കേരളത്തിൽ വിറ്റത്. 2024-ൽ ഇത് ഏഴ് ലക്ഷത്തിലധികമായി. 2025-ൽ അഞ്ച് ലക്ഷം എ.സി.കളാണ് വിറ്റത്. സംസ്ഥാനത്ത് 2021 മുതൽ 2026 മാർച്ചുവരെ ഏകദേശം 30 ലക്ഷം എ.സി.കളാണ് വിറ്റത്. സംസ്ഥാനത്ത് വിറ്റുപോകുന്നതിൽ 60 ശതമാനവും ഒരു ടണ്ണിന്റെ എ.സി.കളാണ്. ഒരു ടണ്ണിന്റെ 1,200 വാട്ടിന്റെ എ.സി. ഒരുമണിക്കൂർ ഉപയോഗിച്ചാൽ 1.2 യൂണിറ്റ് ഉപഭോഗം വരും. വാഷിങ് മെഷീൻ, മൈക്രോവേവ് ഓവൻ, വലിയ ടി.വി.കൾ എന്നിവയുടെ എണ്ണം കൂടിയതും വൈദ്യുതി ഉപഭോഗം കൂട്ടി. സംസ്ഥാനത്ത് ഓരോവർഷവും ശരാശരി നാലുലക്ഷം പുതിയ വൈദ്യുതികണക്ഷനുകളാണ് നൽകുന്നത്.

ഉപഭോക്താക്കൾക്ക് വിറ്റത് 

വാർഷിക വൈദ്യുതി ഉപഭോഗവും ഉപഭോഗ രീതികളും

കേരളത്തിന്റെ പ്രതിവർഷ വൈദ്യുതി ഉപഭോഗം റെക്കോർഡ് തലത്തിലാണ്. സെൻട്രൽ ഇലക്ട്രിസിറ്റി അതോറിറ്റിയുടെയും കെ.എസ്.ഇ.ബി.യുടെയും കണക്കുകൾ പ്രകാരം സംസ്ഥാനത്തിന്റെ വാർഷിക വൈദ്യുതി ഉപഭോഗം ഏകദേശം 27,581 GWh (Gigawatt-hours) ആയി ഉയർന്നു. സംസ്ഥാനത്തിന്റെ പ്രതിദിന വൈദ്യുതി ഉപഭോഗം ശരാശരി 93.6 ദശലക്ഷം യൂണിറ്റുകൾക്ക് മുകളിലാണ്. മുൻ വർഷങ്ങളെ അപേക്ഷിച്ച് പ്രതിദിനം ഏകദേശം 10 ദശലക്ഷം യൂണിറ്റിന്റെ വർധനയാണ് രേഖപ്പെടുത്തിയിട്ടുള്ളത്.

ഗാർഹിക ഉപഭോഗത്തിനാണ് സംസ്ഥാനത്ത് ഏറ്റവും കൂടുതൽ വൈദ്യുതി വിഹിതം ആവശ്യമായി വരുന്നത്. വൈകുന്നേരങ്ങളിലെ പീക്ക് അവേഴ്സിൽ വരുന്ന ഈ അപ്രതീക്ഷിത കുതിച്ചുചാട്ടം സംസ്ഥാനത്തിന്റെ വിതരണ ശൃംഖലയ്ക്ക് വലിയ വെല്ലുവിളിയാണ് സൃഷ്ടിക്കുന്നത്.

ജലവൈദ്യുത ഉത്പാദനവും യൂണിറ്റൊന്നിനുമുള്ള ചെലവും

കേരളത്തിന്റെ ആശ്രയം ജലവൈദ്യുത പദ്ധതികളാണെങ്കിലും, കാലാവസ്ഥാ വ്യതിയാനവും മഴയിലുണ്ടായ കുറവും ഉത്പാദനത്തെ സാരമായി ബാധിച്ചിട്ടുണ്ട്. സംസ്ഥാനത്തെ മൊത്തം ജലവൈദ്യുത പദ്ധതികളിൽ നിന്നുള്ള ഉത്പാദനം ആവശ്യകതയുടെ ചെറിയൊരു ശതമാനം മാത്രമായി ചുരുങ്ങിയിരിക്കുന്നു. കേരളത്തിലെ ഡാമുകളിലെ വെള്ളത്തിന്റെ ലഭ്യത കുറയുമ്പോൾ ആഭ്യന്തര ജലവൈദ്യുത ഉത്പാദന ചെലവ് താരതമ്യേന കുറവാണെങ്കിലും, ആവശ്യത്തിന് വെള്ളമില്ലാത്തത് പദ്ധതികളുടെ പൂർണ ശേഷിയിലുള്ള പ്രവർത്തനത്തിന് തടസ്സമാകുന്ന സാഹചര്യമാണ്.

ഗ്രിഡ്

പവർ പർച്ചേസ് നിരക്കുകളും സീസണൽ വ്യതിയാനങ്ങളും

ആഭ്യന്തര ഉത്പാദനം പര്യാപ്തമാകാതെ വരുമ്പോൾ കേരളം പുറത്തുനിന്നുള്ള വൈദ്യുതിയെയാണ് പ്രധാനമായും ആശ്രയിക്കുന്നത്. സംസ്ഥാനം അതിന്റെ മൊത്തം വൈദ്യുതി ആവശ്യത്തിന്റെ മുക്കാൽ ഭാഗത്തോളവും പുറത്തുനിന്ന് വാങ്ങുകയാണ്.

വൈകുന്നേരങ്ങളിലെ പീക്ക് സമയങ്ങളിൽ പവർ എക്സ്ചേഞ്ചുകളിൽ നിന്ന് ഉയർന്ന വിലയ്ക്കാണ് വൈദ്യുതി വാങ്ങേണ്ടി വരുന്നത്. സീസണൽ തിരക്കുകൾ കാരണം പലപ്പോഴും യൂണിറ്റിന് 10 രൂപയിൽ അധികം നൽകിയാണ് പവർ എക്സ്ചേഞ്ചുകളിൽ നിന്ന് കെ.എസ്.ഇ.ബി. വൈദ്യുതി ഇറക്കുമതി ചെയ്യുന്നത്. ഇത് ബോർഡിന്റെ സാമ്പത്തിക ബാധ്യത വർദ്ധിപ്പിക്കുന്നു.

കേരളത്തിൽ വൈദ്യുതി നിരക്കും സർച്ചാർജും കൂടും

വൈദ്യുതിബോർഡിന്റെ മുൻകാലനഷ്ടമായ 5000 കോടി രൂപ നാലുവർഷംകൊണ്ട് സർച്ചാർജിലൂടെ ഈടാക്കുന്നതിനുള്ള താരിഫ് നയം വൈദ്യുതി റെഗുലേറ്ററി കമ്മിഷൻ വിജ്ഞാപനംചെയ്തിരുന്നു. ഇതോടെ 2027 ഏപ്രിൽ ഒന്നുമുതൽ പുതുക്കിയ വൈദ്യുതിനിരക്കും സർച്ചാർജും നിലവിൽവരും. പുതിയ നയമനുസരിച്ചായിരിക്കും 2027-28 മുതൽ 2031-32 വരെയുള്ള അഞ്ചുവർഷത്തെ വൈദ്യുതിനിരക്ക് കമ്മിഷൻ നിശ്ചയിക്കുന്നത്. ഇതിൽ നാലുവർഷവും സർച്ചാർജുണ്ടാകും. വ്യാവസായിക ഉപഭോക്താക്കൾക്ക് ബില്ലിന്റെ നിശ്ചിത നിരക്കായിരിക്കും സർച്ചാർജ്. മറ്റുവിഭാഗങ്ങൾക്ക് ഫിക്‌സഡ് ഡിപ്പോസിറ്റിന്റെയും വൈദ്യുതിനിരക്കിന്റെയും നിശ്ചിതശതമാനവും.

പീക്ക് സമയം കൂടുന്നു; ബില്ലും കൂടും

വൈദ്യുതി റെഗുലേറ്ററി കമ്മിഷൻ വിജ്ഞാപനം പുറത്തിറങ്ങിയതോടെ വൈദ്യുതി കൂടുതൽ ആവശ്യമായിവരുന്ന പീക്ക് സമയത്തിന്റെ നിർവചനവും മാറിയിട്ടുണ്ട്. ഇതുവരെ വൈകീട്ട് ആറുമുതൽ 10 വരെയായിരുന്നു. ഇത് ആറുമുതൽ രാത്രി 11.30 വരെയാക്കി. പീക്ക് സമയത്ത് കൂടിയനിരക്ക് ഈടാക്കാൻ കൂടുതൽ വിഭാഗങ്ങൾക്ക് ടി.ഒ.ഡി. മീറ്റർ സ്ഥാപിക്കണമെന്നും നയം നിർദേശിക്കുന്നു. രാവിലെ എട്ടുമുതൽ വൈകുന്നേരം ആറുവരെയും രാത്രി 11.30 മുതൽ രാവിലെ എട്ടുവരെയും നിരക്ക് കുറയ്ക്കാനും നയം ആവശ്യപ്പെടുന്നു.

പരിഹാരമെന്ത്?

വർദ്ധിച്ചുവരുന്ന ഉപഭോഗത്തിനനുസരിച്ച് കേരളം നേരിടുന്ന ഊർജ്ജ പ്രതിസന്ധിക്ക് പരിഹാരം കാണാൻ ഉത്പാദനം വർദ്ധിപ്പിക്കുന്നതിനൊപ്പം ഊർജ്ജ സംരക്ഷണവും ബാറ്ററി സ്റ്റോറേജ് സംവിധാനങ്ങളും നടപ്പിലാക്കേണ്ടത് അത്യാവശ്യമാണ്. പകൽ ലഭിക്കുന്ന അധിക സൗരോർജ്ജം സംഭരിച്ചുവെച്ച് വൈകുന്നേരങ്ങളിലെ പീക്ക് സമയത്ത് ഉപയോഗിക്കാനായാൽ KSEB-ക്ക് വലിയ തോതിലുള്ള സാമ്പത്തിക നഷ്ടവും പുറത്തുനിന്നുള്ള ഉയർന്ന വിലയുള്ള വൈദ്യുതി ആശ്രിതത്വവും കുറയ്ക്കാൻ സാധിക്കും.

മറ്റ് സംസ്ഥാനങ്ങളെ അപേക്ഷിച്ച് കേരളത്തിൽ സോളാർ വൈദ്യുത ഉത്പാദനത്തിൽ ഗണ്യമായ വർധനയുണ്ടായതാണ് ഈ പ്രതിസന്ധി വലിയൊരളവ് വരെ ഒഴിവാക്കിയത്. കേരളത്തിൽ ഇന്ന് ഏറ്റവും കൂടുതൽ വൈദ്യുതി വരുന്നതും പുരപ്പുറ സോളാർ പദ്ധതിയിലൂടെയാണ്. കേന്ദ്ര സർക്കാരിന്റെ സൂര്യഘർ സബ്‌സിഡി സ്‌കീം പ്രകാരം മൂന്ന് കിലോവാട്ട് വരെ പരമാവധി 78,000 രൂപ സബ്‌സിഡി ലഭിക്കുന്നതും ആളുകളെ കൂടുതൽ ഇതിലേക്ക് ആകർഷിക്കുന്നു.

Content Highlights: Kerala's electricity consumption surged by 8,000 million units over five years., Sales reached 3,147 crore units in the 2025-26 fiscal year., Massive increase in AC usage (3 million units sold from 2021 to March 2026) is the primary driver., KSEB is forced to depend on expensive external power purchases during peak hours.