ഗുജറാത്ത് മോഡലിനെ പുകഴ്ത്തി ചീഫ് സെക്രട്ടറി വി.പി ജോയ്; ഡാഷ്ബോര്ഡ് സംവിധാനം മികച്ചതെന്ന് പ്രതികരണം
ന്യൂഡല്ഹി: ഗുജറാത്തിലെ ഡാഷ്ബോര്ഡ് മോണിറ്ററിങ് സംവിധാനം മികച്ചതെന്ന് ചീഫ് സെക്രട്ടറി വി.പി ജോയ്. സേവനങ്ങള് നല്കുന്നതിനുള്ള സമഗ്ര സംവിധാനമാണിതെന്നും ഗുജറാത്ത് മുഖ്യമന്ത്രിയുടെ വസതിയില് നടന്ന ഡാഷ്ബോര്ഡ് പഠനത്തിന് ശേഷം ചീഫ് സെക്രട്ടറി മാധ്യമങ്ങളോട് പ്രതികരിച്ചു. ഗുജറാത്തിലെ ഡാഷ്ബോര്ഡ് മോണിറ്ററിങ് സംവിധാനത്തേക്കുറിച്ച് പഠിക്കാന് ചീഫ് സെക്രട്ടറിയുടെ നേതൃത്വത്തിലുള്ള കേരള സംഘം കഴിഞ്ഞ ദിവസമാണ് അഹമ്മബാദിലെത്തിയത്.
വ്യാഴാഴ്ച രാവിലെ പതിനൊന്ന് മണിയോടെയാണ് മുഖ്യമന്ത്രിയുടെ വസതിയിലേക്ക് സംഘം എത്തിയത്. ഏകദേശം ഒന്നര മണിക്കൂറോളം ഡാഷ്ബോര്ഡ് സംവിധാനത്തെ കുറിച്ച് വിശദമായ പഠനം നടത്തി. ഇതിനുശേഷം മാധ്യമങ്ങളെ കണ്ടായിരുന്നു ചീഫ് സെക്രട്ടറിയുടെ പ്രതികരണം. ജനങ്ങളെ സംബന്ധിച്ച് വിവരങ്ങള് ലഭിക്കാനും അവരുടെ പ്രതികരണം ലഭിക്കാനും വലിയ ഗുണം നല്കുന്ന സംവിധാനമാണിതെന്നും വി.പി ജോയ് പറഞ്ഞു.
Read More - അന്ന് ഷിബു ബേബിജോണ് പഴികേട്ടു, അബ്ദുള്ളക്കുട്ടിയെ പുറത്താക്കി; ഇന്ന് തിരിച്ചടിച്ച് ഗുജറാത്ത് മോഡല്
ഇ-ഗവേണന്സിന്റെ ഭാഗമായി സര്ക്കാര് പദ്ധതികള് ജനങ്ങളിലേക്കെത്തിക്കാന് 2019-ലാണ് ഗുജറാത്തില് ഇത്തരമൊരു ഡാഷ്ബോര്ഡ് സംവിധാനം ഏര്പ്പെടുത്തിയത്. 21 വകുപ്പുകളുടെ പ്രവര്ത്തനം നിരീക്ഷിക്കാനും ആവശ്യമായ മാറ്റങ്ങള് വരുത്താനുമള്ള സൗകര്യവും ഇതിലുണ്ട്. ഈ സംവിധാനം ഗുണപരമാണോ, ഇത് കേരളത്തിലേക്ക് പകര്ത്താന് പറ്റുമോ എന്ന് പരിശോധിക്കലാണ് കേരള സംഘത്തിന്റെ ഗുജറാത്ത് യാത്രയുടെ പ്രധാന ലക്ഷ്യം.
സംസ്ഥാനത്തിനും പരിഗണിക്കാവുന്ന ഒരു സംവിധാനമാണിതെന്ന വിലയിരുത്തലിലാണ് കേരള സംഘമുള്ളതെന്നാണ് വിവരം. ഗുജറാത്തിലെ ഉദ്യോഗസ്ഥരുമായി കൂടുതല് ചര്ച്ചകള് നടത്തിയ ശേഷം വെള്ളിയാഴ്ചയേ കേരള സംഘം മടങ്ങുകയുള്ളു.
Content Highlights: kerala chief secretary vp joy praises gujarat model