ദേവസ്വം മന്ത്രിയുടെ നിസ്സഹകരണത്തിൽ അമർഷം; കെ. ജയകുമാർ മുഖ്യമന്ത്രിയെ കാണും

തിരുവനന്തപുരം: ദേവസ്വം മന്ത്രിയുടെയും വകുപ്പിന്റെയും ഭാഗത്തുനിന്നുള്ള കടുത്ത നിസ്സഹകരണത്തിൽ അമർഷമറിയിച്ച് ദേവസ്വം ബോർഡ് പ്രസിഡന്റ് കെ. ജയകുമാർ ഇന്ന് മുഖ്യമന്ത്രിയെ കാണും. സർക്കാരിന്റെ പിന്തുണയില്ലാതെ ബോർഡിന് മുന്നോട്ടുപോകാൻ സാധിക്കില്ലെന്ന വിഷയം അദ്ദേഹം മുഖ്യമന്ത്രിയോട് വിശദീകരിക്കും.

അരവണ പ്ലാന്റിന്റെ ശേഷി വർധിപ്പിക്കുന്ന വിപുലീകരണ പ്രവർത്തനങ്ങളുമായി ബന്ധപ്പെട്ട് ഉന്നയിക്കപ്പെട്ട വിമർശനങ്ങളാണ് നിലവിലെ അതൃപ്തിക്ക് കാരണം. പ്ലാന്റിന്റെ പ്രവർത്തനങ്ങളെക്കുറിച്ച് സർക്കാരിനും മുഖ്യമന്ത്രിക്കും നേരത്തെ തന്നെ അറിവുണ്ടായിരുന്നു. എന്നിട്ടും മന്ത്രിയുടെ ഓഫീസ് അനാവശ്യ വിവാദങ്ങൾ ഉണ്ടാക്കുന്നതിലാണ് ബോർഡ് പ്രസിഡന്റ് അമർഷവും നിരാശയും പ്രകടിപ്പിക്കുന്നത്.

ശബരിമലയിൽ ചെയ്ത കാര്യങ്ങളെല്ലാം കെ. ജയകുമാർ മുഖ്യമന്ത്രിയോട് വിശദീകരിക്കും. സർക്കാരിന്റെ പിന്തുണയില്ലെങ്കിൽ അല്ലെങ്കിൽ താൻ രാജിവെച്ചൊഴിയണമെന്നാണ് സർക്കാർ ആഗ്രഹിക്കുന്നതെങ്കിൽ അതിനും തയ്യാറാണെന്ന നിലപാടിലാണ് അദ്ദേഹം. ഈ വിഷയത്തിൽ സ്വയം രാജിവെച്ചു പോകുന്നത് ശരിയല്ലെങ്കിലും, ഒഴിഞ്ഞു പോകാനാണ് സർക്കാരിന്റെ താല്പര്യമെങ്കിൽ കടുത്ത തീരുമാനങ്ങൾ എടുത്തേക്കുമെന്നും അദ്ദേഹം വ്യക്തമാക്കുന്നു.

Content Highlights: Travancore Devaswom Board President K. Jayakumar is scheduled to meet the Kerala Chief Minister to convey his displeasure over the Devaswom minister's alleged non-cooperation regarding Sabarimala administration.