കേന്ദ്രം ട്രംപിന്റെ ഭീഷണിക്ക് വഴങ്ങിയത് കേരളത്തെ ബാധിച്ചു-കെ.എൻ ബാലഗോപാൽ

തിരുവനന്തപുരം: പിണറായി സർക്കാരിന്റെ അവസാന ബജറ്റിൽ ട്രംപിന്റെ നടപടികളെ രൂക്ഷമായി വിമർശിച്ച് ധനമന്ത്രി കെ.എൻ ബാലഗോപാൽ. ട്രംപിന്റെ ഭീഷണിക്ക് വഴങ്ങി ജിഎസ്ടി നിരക്ക് കേന്ദ്രസർക്കാർ കുറച്ചത് കേരളത്തിന്റെ നികുതി വരുമാനത്തെ വലിയ രീതിയിൽ ബാധിച്ചുവെന്ന് അദ്ദേഹം പറഞ്ഞു. ട്രംപിന്റെ നടപടികൾ ലോകവ്യാപാര രംഗത്ത് വലിയ അനിശ്ചിതത്വം സൃഷ്ടിച്ചു. താരിഫുകൾ ഉയർത്തിയത് ആ അനിശ്ചിതത്വം വർധിപ്പിച്ചു. നമ്മുടെ സമുദ്ര ഉൽപ്പന്നങ്ങളുടെ കയറ്റുമതിയെയും സാരമായി ബാധിച്ചിട്ടുണ്ടെന്നും മന്ത്രി പറഞ്ഞു.

യൂറോപ്യൻ സാമ്പത്തിക സമൂഹവുമായി ഇന്ത്യ ഒപ്പിട്ടിട്ടുള്ള വ്യാപാര കരാറിന്റെ വിശദാംശങ്ങൾ പൂർണമായും പുറത്തുവന്നിട്ടില്ല. നമ്മുടെ ക്ഷീര കർഷകർ ഉൾപ്പെടെയുള്ളവർക്കും വ്യവസായ മേഖലകൾക്കും ഇതുമൂലം തിരിച്ചടിയുണ്ടാകുമോ എന്ന ആശങ്കയും ശക്തമാണ്. ഈ സാഹചര്യം ഉൾപ്പെടെ നേരിടാൻ നമുക്ക് മുൻകൂട്ടി സജ്ജരാകേണ്ടതുണ്ടെന്നും മന്ത്രി പറഞ്ഞു.

ലോകം ജനാധിപത്യക്രമത്തിൽ നിന്നും പിന്നോട്ടുരുളുന്ന കാഴ്ച ആശങ്കയുളവാക്കുന്നതാണ്. ഒരു റിപ്ലബ്ലിക്കിന്റെ തലവനെ അന്താരാഷ്ട്ര നിയമങ്ങൾ കാറ്റിൽ പറത്തി പ്രസിഡന്റ് മന്ദിരത്തിൽ നിന്നും അറസ്റ്റ് ചെയ്ത് അമേരിക്കയിലെ ജയിലിൽ അടച്ചതുപോലുള്ള സംഭവങ്ങൾ കോളനി ഭരണക്കാലത്ത് പോലും അപൂർവമായിരുന്നു. ഇത്തരം കാര്യങ്ങൾ നമുക്കും മുന്നറിയിപ്പാണ്. കേരളീയർ ഒറ്റക്കെട്ടായി സംസ്ഥാനത്തിന്റെ താൽപര്യത്തിന് വേണ്ടി നിന്നാൽ ഏത് പ്രതിസന്ധിയെയും മറികടക്കാം. നമ്മുടെ ചരിത്രം അതാണ് പഠിപ്പിക്കുന്നതെന്നും ബജറ്റ് പ്രസംഗത്തിൽ മന്ത്രി പറഞ്ഞു.

Content Highlights: Kerala`s Finance Minister K.N. Balagopal criticizes Trump`s actions, stating GST rate reduction due to threats significantly impacts state revenue and exports.