എടയാര് വ്യാവസായിക മേഖലയിൽ തീപ്പിടിത്തം; വ്യാപക നാശനഷ്ടം, ആളപായമില്ല
കൊച്ചി: എടയാറില് വ്യവസായ സ്ഥാപനത്തില് തീപ്പിടിത്തം. എടയാര് വ്യവസായ മേഖലയിലെ ജ്യോതിസ് കെമിക്കല്സ് എന്ന കമ്പനിയിലാണ് ചൊവ്വാഴ്ച രാത്രി ഏഴുമണിയോടെ തീപ്പിടിത്തമുണ്ടായത്. സ്ഥാപനത്തിനകത്തുനിന്ന് തീ ഉയരുന്നതുകണ്ട് സമീപത്തുള്ളവരാണ് ഫയര്ഫോഴ്സിനെ വിവരമറിയിച്ചത്. ഏലൂരില്നിന്നും ആലുവയില്നിന്നുമായി ആറ് ഫയര് യൂണിറ്റുകളെത്തി രണ്ടുമണിക്കൂര്നീണ്ട ശ്രമത്തിനൊടുവിലാണ് തീയണയ്ക്കാനായത്. ലക്ഷങ്ങളുടെ ഉത്പന്നങ്ങള് കത്തിനശിച്ചതായാണ് പ്രാഥമിക നിഗമനം.
ഈ കമ്പനിയുടെ ഉടമസ്ഥന് എടയാര് വ്യവസായമേഖലയില് മൂന്ന് യൂണിറ്റുകളാണുള്ളത്. ഇതില് പാതാളം പാലത്തിനുസമീപത്തുള്ള സ്ഥാപനത്തിലാണ് തീപ്പിടിത്തമുണ്ടായത്. ഉത്പന്നങ്ങളും യന്ത്രങ്ങളുമെല്ലാം പൂര്ണമായും കത്തിനശിച്ചുപോയി. ആളപായമൊന്നും സംഭവിച്ചില്ല.
വാഹനങ്ങളുടെ ഉള്പ്പടെ ക്ലീനിങ്ങ് ഉത്പന്നങ്ങളാണ് ഇവിടെ തയ്യാറാക്കുന്നത്. അവയിലെല്ലാം പെട്ടെന്നുതന്നെ തീപടര്ന്നുപിടിക്കുകയായിരുന്നു. സമീപത്തുതന്നെ പെട്രോളിയം ഉത്പന്നങ്ങള്കൊണ്ട് പാവ ഉണ്ടാക്കുന്ന കമ്പനിയും പ്ലാസ്റ്റ് ചാക്ക് നിര്മാണയൂണിറ്റുകളെല്ലാമുണ്ട്. അവിടേക്കെല്ലാം തീപടര്ന്നാല് വ്യാപക നഷ്ടമായിരിക്കും ഉണ്ടാകുന്നത്. അതുകൊണ്ട് ധ്രുതഗതിയില് തീയണക്കാനുള്ള ശ്രമമാണ് ഫയര്ഫോഴ്സ് നടത്തിയത്.
കമ്പനിയുടെ ഷട്ടര് പൊളിച്ച് അകത്തുകടന്നാണ് തീ അണക്കാൻ ശ്രമിച്ചത്. ഉത്പന്നങ്ങള് നിറയ്ക്കാന് ഉപയോഗിക്കുന്ന പ്ലാസ്റ്റിക് കുപ്പികള് ഇവിടെ ധാരാളമായി സൂക്ഷിച്ചിരുന്നു. തീയണച്ചിട്ടും പ്ലാസ്റ്റിക് കുപ്പികളില്നിന്ന് വലിയതോതില് പുക ഉയരുന്നതുകൊണ്ട് പൂര്ണമായും അണയ്ക്കാനുള്ള ശ്രമം ഫയര്ഫോഴ്സ് തുടരുന്നുണ്ട്.
Content Highlights: major fire broke out at Jyothis Chemicals in Edayar industrial area