വൈദ്യുത തൂണും ആഞ്ഞിലിമരവും ഒടിഞ്ഞുവീണു; MLAയും കുട്ടികളും അദ്ഭുതകരമായി രക്ഷപ്പെട്ടു
കരുനാഗപ്പള്ളി: സി.ആർ. മഹേഷ് എംഎൽഎ സഞ്ചരിച്ച കാറിനുമുന്നിൽ വൈദ്യുത തൂണും പിന്നിൽ ആഞ്ഞിലിമരവും ഒടിഞ്ഞുവീണു. എംഎൽഎയും റോഡിൽ ഉണ്ടായിരുന്ന കുട്ടികളും അദ്ഭുതകരമായി രക്ഷപ്പെട്ടു.
ശനിയാഴ്ച വൈകീട്ട് തഴവ മണപ്പള്ളി തെക്ക് ആയിരുന്നു സംഭവം. കഴിഞ്ഞദിവസം തൊടിയൂരിൽ കാറ്റിൽ തകർന്ന വീടുകൾ സന്ദർശിച്ചശേഷം മടങ്ങുകയായിരുന്നു എംഎൽഎ. ഈ സമയം ശക്തമായ കാറ്റും മഴയും ഉണ്ടായിരുന്നു. തുരുത്തിക്കാട്ട് മുക്കിനുസമീപം എത്തിയപ്പോൾ റോഡരികിൽനിന്ന കൂറ്റൻ ആഞ്ഞിലി റോഡിലേക്ക് വീണു. എംഎൽഎയുടെ കാറിന് പിൻവശത്താണ് മരംവീണത്. തൊട്ടുപിന്നാലെ വൈദ്യുത തൂൺ കാറിന് മുന്നിലേക്കും വീണു. എംഎൽഎയുടെ കാർ ആഞ്ഞിലിമരത്തിനും വൈദ്യുത തൂണിനും ഇടയിൽപ്പെട്ടു. ഈ സമയം മൂന്നു കുട്ടികളും റോഡിലുണ്ടായിരുന്നു. കുട്ടികൾ ഉടൻ ഓടിമാറി. എംഎൽഎയും ഡ്രൈവറും കാറിൽനിന്നിറങ്ങി സമീപത്തെ വീട്ടിലേക്ക് മാറി.
കാർ മരത്തിനും വൈദ്യുത തൂണിനും ഇടയിൽ കുടുങ്ങി. കെഎസ്ഇബി, അഗ്നിരക്ഷാസേനാ ഉദ്യോഗസ്ഥരെ വിവരമറിയിച്ചശേഷം മറ്റൊരു വാഹനത്തിലാണ് എംഎൽഎ മടങ്ങിയത്.
Content Highlights: cr mahesh mla electric post tree snapped