പോര്‍ വിളിച്ച് സഖാക്കള്‍, പകച്ച് സംസ്ഥാന നേതൃത്വം; കൊല്ലത്ത് സി.പി.എം. വിഭാഗീയത പൊട്ടിത്തെറിയിലേക്ക്
കൊല്ലം: സി.പി.എം. സംസ്ഥാന സമ്മേളനം നടക്കുന്ന കൊല്ലം ജില്ലയില്‍ പാര്‍ട്ടിയിലെ വിഭാഗീയത പൊട്ടിത്തെറിയിലേക്ക്. സംസ്ഥാന സെക്രട്ടറി എം.വി.ഗോവിന്ദന്‍ കൊല്ലത്തെത്തി ജില്ലാ സെക്രട്ടേറിയറ്റും ജില്ലാ കമ്മറ്റിയും വിളിച്ചു ചേര്‍ത്ത് കരുനാഗപ്പള്ളി ഏരിയാ കമ്മിറ്റി പിരിച്ചുവിട്ടതോടെ നേതാക്കള്‍ക്കെതിരെ ഗുരുതര ലൈംഗിക, അഴിമതി ആരോപണങ്ങളാണ് ഉയരുന്നത്. പക്ഷം തിരിഞ്ഞ് ആരോപണവും മറുപടിയും സാമൂഹിക മാധ്യമങ്ങള്‍ വഴി പ്രചരിപ്പിക്കുകയാണ്. ജില്ലാ സെക്രട്ടറി എസ്. സുദേവനെതിരേ മുന്‍ ജില്ലാ ഓഫീസ് സെക്രട്ടറി നല്‍കിയ പരാതി വീണ്ടും പ്രയോഗിക്കുന്നുണ്ട്. വീഡിയോകളും ഫോൺ സംഭാഷണങ്ങളുമെല്ലാം ആയുധമാക്കി ഗ്രൂപ്പ് യുദ്ധം തന്നെയാണ് ഇപ്പോള്‍ നടക്കുന്നത്.
സംസ്ഥാന സമ്മേളനം നടക്കേണ്ട ജില്ലയില്‍ ഏരിയ സമ്മേളനങ്ങള്‍ പൂര്‍ത്തിയാക്കാനാവാത്ത സാഹചര്യമുണ്ടായതില്‍ ജില്ലാ നേതൃത്വവും പ്രതിക്കൂട്ടിലാണ്. ഒരുമാസം മുമ്പ്, സംസ്ഥാന സെക്രട്ടറി എം.വി. ഗോവിന്ദന്‍ നേരിട്ടെത്തി താക്കീത് നല്‍കിയിട്ടും തര്‍ക്കവും കയ്യാങ്കളിയും തുടരുന്നത് സംസ്ഥാന നേതൃത്വത്തിനും നാണക്കേടായി.
Content Highlights: cpm-kollam-factionalism