ഭീഷണിപ്പെടുത്തിയെന്ന ദീപാ നിശാന്തിന്റെ പരാതി; തുടർനടപടി തടഞ്ഞ് കോടതി

കൊച്ചി: ഫെയ്സ്ബുക്ക് പോസ്റ്റിലൂടെ ഭീഷണിപ്പെടുത്താന്‍ ശ്രമിച്ചെന്നാരോപിച്ച് കോളേജ് അധ്യാപിക ദീപാ നിശാന്ത് നല്‍കിയ പരാതിയില്‍ എടുത്ത കേസിലെ തുടര്‍നടപടികള്‍ ഹൈക്കോടതി തടഞ്ഞു.

തൃശ്ശൂര്‍ വെസ്റ്റ് പോലീസ് എടുത്ത കേസിനെതിരേ തിരുവനന്തപുരം സ്വദേശി ബിജു നായരുടെ ഹര്‍ജിയിലാണ് ജസ്റ്റിസ് പി. ഗോപിനാഥിന്റെ നിര്‍ദേശം. 2018-ലെ ഫെയ്സ്ബുക്ക് പോസ്റ്റുമായി ബന്ധപ്പെട്ടതാണ് കേസ്. 

എച്ച്.പി. ഇന്ത്യ ജീവനക്കാരനായിരുന്ന ദീപക് ശങ്കരനാരായണന്‍ ബി.ജെ.പി.ക്ക് വോട്ടുചെയ്തവരെ വിമര്‍ശിച്ച് ഫെയ്സ്ബുക്കില്‍ പോസ്റ്റിട്ടു. ഇത് ദീപാ നിശാന്ത് പങ്കുവെച്ചിരുന്നു. ഫെയ്സ്ബുക്ക് പോസ്റ്റിനെ തുടര്‍ന്ന് ദീപക്കിനെ ജോലിയില്‍നിന്ന് പിരിച്ചുവിട്ടു.

ഇതേത്തുടര്‍ന്ന് ദീപാ നിശാന്തിനെതിരേ നിയമനടപടിക്ക് താന്‍ മുന്‍കൈയെടുക്കും എന്നതരത്തില്‍ ബിജു ഫെയ്സ്ബുക്കില്‍ ഒരു പോസ്റ്റിട്ടു. ഇതിലൂടെ തന്നെ ഭീഷണിപ്പെടുത്തുകയാണെന്നുകാട്ടിയാണ് ബിജുവിനെതിരേ ദീപാ നിശാന്ത് പരാതിനല്‍കിയത്. യാതൊരു അടിസ്ഥാനവുമില്ലാത്ത കേസ് റദ്ദാക്കണമെന്നാവശ്യപ്പെട്ടാണ് ബിജു ഹര്‍ജിനല്‍കിയത്.

Content Highlights: court stays further action on deepa nishanth's complaint