കണ്ണനു മുന്നില്‍ വിവാഹിതയായി; താലികെട്ട് കഴിഞ്ഞയുടന്‍ നിര്‍ധനയായ യുവതിക്ക് അഞ്ചു പവന്‍ നല്‍കി വധു

ഗുരുവായൂര്‍: കണ്ണനു മുന്നില്‍ വിവാഹിതയായശേഷം വധു നിര്‍ധനയായ യുവതിക്ക് വിവാഹസമ്മാനമായി നല്‍കിയത് അഞ്ചു പവന്‍ സ്വര്‍ണവും നാലരലക്ഷം രൂപയും. എറണാകുളം വൈപ്പിന്‍ സ്വദേശി മണിക്കുട്ടന്‍-ശാരി ദമ്പതിമാരുടെ മകള്‍ ഡോ. ഐശ്വര്യയുടെ വിവാഹമായിരുന്നു ബുധനാഴ്ച ഗുരുവായൂരില്‍. ആലപ്പുഴ സ്വദേശി ശംഭുവാണ് വരന്‍.

താലികെട്ട് കഴിഞ്ഞയുടന്‍ എറണാകുളം ഫാക്ട് ക്വാര്‍ട്ടേഴ്സില്‍ താമസിക്കുന്ന യുവതിക്കാണ് സഹായം നല്‍കിയത്. ഇവരുടെ വിവാഹം ഓഗസ്റ്റ് 17-നാണ്. പാലക്കാട് ദയ ചാരിറ്റബിള്‍ട്രസ്റ്റിന്റെ ഫെയ്സ്ബുക്ക് പോസ്റ്റ് വഴിയാണ് വിവാഹത്തിന് പ്രയാസം നേരിടുന്ന നിര്‍ധനയുവതിയുടെ കഥ ഐശ്വര്യ അറിയുന്നത്.

തന്റെ വിവാഹം ഗുരുവായൂരില്‍ 23-ന് നടക്കുന്നുവെന്നും യുവതിക്ക് വിവാഹ സഹായം നല്‍കാന്‍ തയ്യാറാണെന്നും ഐശ്വര്യ ഫെയ്സ്ബുക്ക് പോസ്റ്റില്‍ മറുപടി കുറിച്ചു. ദയ ട്രസ്റ്റ് ഭാരവാഹികളുടെ സാന്നിധ്യത്തില്‍ ഐശ്വര്യയുടെ അമ്മ ശാരി, അഞ്ചു പവന്‍ സ്വര്‍ണവും വസ്ത്രവും മറ്റും വാങ്ങാന്‍ നാലര ലക്ഷം രൂപയുടെ ചെക്കും കൈമാറി.

Content Highlights: A bride gifted 5 sovereign gold and ₹4.5 lakhs to a needy woman at her Guruvayur wedding