നിങ്ങളെപോലെ താനും പച്ചമനുഷ്യനെന്ന് മന്ത്രി, ആറളം ഫാമിലെത്തി ശശീന്ദ്രൻ, പ്രതിഷേധം അവസാനിപ്പിച്ചു

കണ്ണൂർ: ആറളത്ത് ദമ്പതിമാരെ കാട്ടാന കൊലപ്പെടുത്തിയ സംഭവത്തിൽ മണിക്കൂറുകളായി തുടർന്ന പ്രതിഷേധം അവസാനിപ്പിച്ചു. വനം മന്ത്രി എ.കെ.ശശീന്ദ്രൻ ​ആറളം ഫാമിലെത്തി നാട്ടുകാരോട് നേരിട്ട് സംസാരിച്ചതിന് പിന്നാലെയാണ് പ്രതിഷേധം അവസാനിപ്പിച്ചത്. 

ആറളം പഞ്ചായത്ത് ഓഫീസിൽ ചേർന്ന സർവ്വകക്ഷി യോ​ഗത്തിനു ശേഷമായിരുന്നു മന്ത്രി നാട്ടുകാരെ കണ്ടത്. നിങ്ങളെപോലെ പച്ച മനുഷ്യനാണ് താനെന്നും നിങ്ങൾക്കുള്ളതുപോലെ ആ വേദന താനും പങ്കുവെയ്ക്കുകയാണെന്നും ശശീന്ദ്രൻ പറഞ്ഞു. 

മരിച്ചവരുടെ കുടുംബത്തിന്റെ താൽപര്യമനുസരിച്ച് മൃതദേഹങ്ങൾ സംസ്കരിക്കേണ്ടതുണ്ട്. ഇങ്ങനെയൊരു അനുഭവം ഈ നാട്ടുകാർക്ക് ഇനി ഉണ്ടാകാൻ പാടില്ല. അതിന് വളരെ ആസൂത്രിതമായ പദ്ധതികളും പ്രവർത്തനങ്ങളുമാണ് ആവശ്യമെന്നും മന്ത്രി കൂട്ടിച്ചേർത്തു. വനം മന്ത്രി നേരിട്ടെത്തിയാൽ മാത്രമേ മൃതദേഹങ്ങൾ സംസ്കരിക്കൂ എന്നായിരുന്നു പ്രതിഷേധക്കാരുടെ നിലപാട്.

സർവ്വകക്ഷിയോ​ഗ തീരുമാനങ്ങൾ

• ആറളം ഫാമിലുള്ള കാട്ടാനകളെ സമയബന്ധിതമായി തുരത്തും
• കൂടുതൽ ആർ.ആർ.ടി സംഘങ്ങളെ ഉപയോ​ഗിച്ച് രാത്രി മുതൽ ​ദൗത്യം തുടങ്ങും
• ആനമതിൽ സമയബന്ധിതമായി പൂർത്തിയാക്കാൻ ജില്ലാ കളക്ടറെ ചുമതലപ്പെടുത്തി
• ജനവാസ മേഖലയിൽ ലൈറ്റുകൾ സ്ഥാപിക്കും
• ചിലയിടത്ത് താതാകാലിക ഫെൻസിങ് സ്ഥാപിക്കും
• മരിച്ചവരുടെ കുടുംബത്തിലെ ഒരാൾക്ക് താത്കാലിക ജോലി നൽകും

Content Highlights: Aralam farm wild elephant attack Death