ടയറിന് മുന്നില്‍ വെച്ച കട്ട തെന്നിമാറി; വീടിന്റെ മതില്‍ തകര്‍ത്ത് തടിയുമായെത്തിയ പിക്ക്അപ്പ് |Video
കൊല്ലം: തടികയറ്റിയെത്തിയ പിക്ക്അപ്പ് ട്രക്ക് നിയന്ത്രണം വിട്ട് വീട്ടുമുറ്റത്തേക്ക് ഇടിച്ചുകയറി. കൊല്ലം ജില്ലയിലെ കടയ്ക്കല്‍ പള്ളിമുക്കിലാണ് അപകടമുണ്ടായത്. സംഭവത്തില്‍ ആര്‍ക്കും പരിക്കില്ല. അപകടത്തിന്റെ സി.സി.ടി.വി. ദൃശ്യങ്ങള്‍ പുറത്തുവന്നിട്ടുണ്ട്.
അപകടത്തില്‍പെട്ട വാഹനത്തില്‍ നിന്ന് വലിയ ലോറിയിലേക്ക് തടിമാറ്റുകയായിരുന്നു. വാഹനം മുന്നോട്ട് ഉരുണ്ട് പോകാതിരിക്കാനായി ടയറുകള്‍ക്ക് മുന്നില്‍ തടിവെച്ചിരുന്നു. ഇത് ഉരുണ്ടുമാറിയതോടെയാണ് ഈ പിക്ക്അപ്പ് മുന്നിലേക്ക് ഉരുണ്ട് നീങ്ങിയത്. പിന്നീട് ഇത് വേഗത്തിലാകുകയും സമീപത്തുണ്ടായിരുന്ന മതിലിലേക്ക് ഇടിച്ചുകയറുകയുമായിരുന്നു.
സ്ഥിരമായി വാഹനങ്ങള്‍ കടന്നുപോകുന്ന റോഡ് മറികടന്നാണ് പിക്ക്അപ്പ് മതിലിലേക്ക് ഇടിച്ചുകയറിയത്. ഈ സമയത്ത് റോഡില്‍ മറ്റ് വാഹനങ്ങള്‍ ഇല്ലാതിരുന്നതിനാലാണ് വലിയ അപകടങ്ങള്‍ ഒഴിവായത്. പിക്ക്അപ്പ് ഇടിച്ചതിനെ തുടര്‍ന്ന് വീടിന്റെ മതില്‍ പൂര്‍ണമായും തകര്‍ന്നു. വാഹനത്തിന്റെ മുകളില്‍ ഉണ്ടായിരുന്ന ആളുകളും പരിക്കേല്‍ക്കാതെ രക്ഷപ്പെട്ടു.
Content Highlights: A pick-up truck loaded with timber crashed into a house