ആംബുലൻസ് കുഴിയിൽ വീണു, ‘അനുഗ്രഹമായി’, യുപിയിൽ അൻപതുകാരിയ്ക്ക് പുനർജന്മം

പട്ന: റോഡിലെ കുണ്ടും കുഴിയും ഒരിക്കലെങ്കിലും ചാടിക്കടക്കാത്തവർ കുറവായിരിക്കും. ഇരുചക്രവാഹനത്തിൽ സഞ്ചരിക്കുമ്പോൾ കുഴി കണ്ട് വെട്ടിച്ച് സാഹസികമായി വണ്ടി ബാലൻസ് ചെയ്തവരും ഓട്ടോറിക്ഷയിൽ പോകുമ്പോൾ കുണ്ടിൽച്ചാടി തല റിക്ഷയുടെ മുകളിലെ കമ്പിയിലിടിച്ച് നിലവിളിച്ച് റോഡ് നന്നാക്കാത്തവരെ പഴിച്ചവരും കുറവല്ല. എന്നാൽ റോഡിലെ കുഴി കാരണം ഉത്തർപ്രദേശിൽ ഒരു സ്ത്രീയ്ക്ക് പുനർജന്മം ലഭിച്ചിരിക്കുകയാണ്. ശരീരത്തിൽ ജീവൻ്റെ യാതൊരു സൂചനയുമില്ല എന്ന് ഡോക്ടർമാർ പ്രഖ്യാപിച്ച 50 കാരിയായ വിനീത ശുക്ലയ്ക്കാണ് റോഡിലെ കുഴി അനുഗ്രഹമായി മാറിയിരിക്കുന്നത്. ബറേലി-ഹരിദ്വാർ NH-74 ലെ ഒരു കുഴിയാണ് വിനീതയ്ക്ക് അപ്രതീക്ഷിതമായി പുനർജന്മമേകിയത്.

ടൈംസ് ഓഫ് ഇന്ത്യ റിപ്പോർട്ട് അനുസരിച്ച്, ബറേലിയിലെ ഒരു ആശുപത്രിയിൽ നിന്ന് രക്ഷപ്പെടാൻ സാധ്യതയില്ലെന്ന അവസ്ഥയിൽ വിനീതയെ ഫെബ്രുവരി 24 ന് ഡിസ്ചാർജ് ചെയ്തു. ഭർത്താവ് കുൽദീപ് കുമാർ ശുക്ല പറയുന്നതനുസരിച്ച്, ഡോക്ടർമാർ രക്ഷപ്പെടാൻ വലിയ പ്രതീക്ഷയൊന്നും നൽകിയിരുന്നില്ല, കുടുംബം അവരുടെ അവസാന ചടങ്ങുകൾക്ക് തയ്യാറെടുപ്പുകൾ ആരംഭിച്ചിരുന്നു. കുൽദീപ് കുമാർ ശുക്ല ആംബുലൻസിൽ വിനീതയെ വീട്ടിലേക്ക് കൊണ്ടുപോകുന്നതിനിടെ ഹൈവേയിലെ ഒരു കുഴിയിൽ വാഹനം ഇടിക്കുകയായിരുന്നു.

ഹാഫിസ്ഗഞ്ചന് സമീപം ആംബുലൻസ് ഒരു വലിയ കുഴിയിൽ ഇടിച്ച് ശക്തമായ ഒരു കുലുക്കം ഉണ്ടായതായി കുൽദീപ് പറഞ്ഞു. നിമിഷങ്ങൾക്ക് ശേഷം, വിനീത സാധാരണനിലയിൽ ശ്വാസമെടുക്കാൻ തുടങ്ങി. ഉടൻ തന്നെ വിനീതയെ പിലിബിത്തിലെ ന്യൂറോസിറ്റി ആശുപത്രിയിൽ പ്രവേശിപ്പിച്ചു, അവിടെ അവർക്ക് അടിയന്തര ചികിത്സ നൽകി. തിങ്കളാഴ്ച ഭാര്യ വീട്ടിലേക്ക് മടങ്ങിയെന്നും ഇപ്പോൾ കുടുംബാംഗങ്ങളുമായി സംസാരിക്കുന്നുണ്ടെന്നും കുൽദീപ് പിന്നീട് പറഞ്ഞു.

ന്യൂറോസിറ്റി ആശുപത്രിയിലെ ന്യൂറോസർജൻ ഡോ. രാകേഷ് സിങ്, ചികിത്സ ആരംഭിക്കുന്നതിന് മുമ്പ് ബറേലിയിൽ നിന്നുള്ള അവരുടെ മുൻ മെഡിക്കൽ രേഖകൾ പരിശോധിച്ചു. അവരുടെ ബ്രെയിൻസ്റ്റെം റിഫ്ലെക്സുകൾ ഇല്ലായിരുന്നുവെന്നും ഗ്ലാസ്ഗോ കോമ സ്കെയിൽ മൂന്ന് പോയിന്റായി കുറഞ്ഞുവെന്നും സാധാരണ നിലയായ 15 ൽ നിന്ന് വളരെ താഴെയായിരുന്നുവെന്നും, ഇത് പൂർണ്ണമായ പ്രതികരണമില്ലായ്മ സൂചിപ്പിക്കുന്നുവെന്നും അദ്ദേഹം പറഞ്ഞു. അവരുടെ കണ്ണിലെ കൃഷ്ണമണികൾ വികസിച്ചിരുന്നു, രക്തത്തിലും ലിംഫ് സിസ്റ്റത്തിലും ഗുരുതരമായ ന്യൂറോടോക്സിനുകൾ കണ്ടെത്തിയതായും പരിശോധനയിൽ തെളിഞ്ഞു. ലക്ഷണങ്ങൾ പാമ്പുകടിയേറ്റതിന്റേതാകാമെന്ന് വിലയിരുത്തി പാമ്പിൻ വിഷത്തിനുള്ള പ്രതിമരുന്ന് നൽകി ഐസിയുവിൽ രോഗിയെ ചികിത്സിക്കുകയായിരുന്നു. തുടർന്നാണ് ഇവർ ആരോഗ്യത്തിലേക്ക് തിരിച്ചെത്തിയത്. രോഗനിർണയവും ചികിത്സയും അവരുടെ വീണ്ടെടുപ്പിന് സഹായിച്ചതായി ഡോക്ടർമാർ പറഞ്ഞു.

പിലിബിത്തിലെ ജുഡീഷ്യൽ കോടതിയിൽ കോപ്പി വിഭാഗത്തിലെ സീനിയർ അസിസ്റ്റന്റ് ആയിരുന്ന വിനീത, ഫെബ്രുവരി 22 ന് വീട്ടിലെ ജോലികൾ ചെയ്യുന്നതിനിടയിൽ ബോധരഹിതയാകുകയായിരുന്നു. ബന്ധുക്കൾ ആദ്യം പിലിബിത്തിലെ ഓട്ടോണമസ് സ്റ്റേറ്റ് മെഡിക്കൽ കോളേജിൽ എത്തിച്ചെങ്കിലും, അവിടുത്തെ ഡോക്ടർമാർ ബറേലിയിലെ മികച്ച മെഡിക്കൽ സ്ഥാപനത്തിലേക്ക് റഫർ ചെയ്യുകയായിരുന്നു.

Content Highlights: A 50-year-old woman, Vineeta Shukla, was declared terminal and taken home., The ambulance hit a massive pothole on NH-74, causing a physical jolt., The patient began breathing normally shortly after the impact., She was successfully treated at Neurocity Hospital, Pilibhit, after the incident., Doctors confirmed her miraculous recovery from a state of total non-responsiveness.