നിതി ആയോഗ് യോഗം ബഹിഷ്‌കരിക്കില്ലെന്ന് മമത; 'ബജറ്റിലെ അവഗണനയ്‌ക്കെതിരെ പ്രതിഷേധിക്കും'

കൊൽക്കത്ത: ശനിയാഴ്ച ചേരുന്ന നിതി ആയോഗ് യോ​ഗത്തിൽ പങ്കെടുക്കുന്നതിന് ബം​ഗാൾ മുഖ്യമന്ത്രി മമതാ ബാനർജി ഡൽഹിയിലേക്ക് പുറപ്പെട്ടു. ബജറ്റിൽ പ്രതിപക്ഷം ഭരിക്കുന്ന സംസ്ഥാനങ്ങളോടുള്ള കേന്ദ്രത്തിന്റെ ചിറ്റമ്മനയത്തിനെതിരേ താൻ വിമർശനമുന്നയിക്കുമെന്ന് മമത വ്യക്തമാക്കി.

ബജറ്റിന് മുമ്പ് തന്നെ യോ​ഗത്തിൽ പങ്കെടുക്കുമെന്ന് അറിയിച്ചിരുന്നു. ബജറ്റിന് ശേഷം പ്രതിപക്ഷം ഭരിക്കുന്ന സംസ്ഥാനങ്ങൾ ഏത് രീതിയിലാണ് അവ​ഗണിക്കപ്പെട്ടതെന്ന് തനിക്ക് വ്യക്തമായി. ഇത്തരം സംസ്ഥാനങ്ങളോട് ചിറ്റമ്മനയമാണ് കേന്ദ്രത്തിന്. ഇതിനെക്കുറിച്ച് സംസാരിക്കാൻ താൻ ആ​ഗ്രഹിക്കുന്നതായും മമത കൂട്ടിച്ചേർത്തു. 

ബജറ്റ് വിവേചനപരമാണെന്നാരോപിച്ച് നിതി ആയോ​ഗ് യോ​ഗം ബഹിഷ്കരിക്കാൻ നാല് സംസ്ഥാനങ്ങളിലെ മുഖ്യമന്ത്രിമാര്‍ നേരത്തെ തീരുമാനിച്ചിരുന്നു. തെലങ്കാന മുഖ്യമന്ത്രി രേവന്ത് റെഡ്ഡി, കര്‍ണാടക മുഖ്യമന്ത്രി സിദ്ധരാമയ്യ, ഹിമാചല്‍ പ്രദേശ് മുഖ്യമന്ത്രി സുഖ്വിന്ദര്‍ സിങ് സുഖു, തമിഴ്നാട് മുഖ്യമന്ത്രി എം.കെ.സ്റ്റാലിൻ എന്നിവരാണ് യോഗം ബഹിഷ്‌കരിക്കുമെന്ന് പ്രഖ്യാപിച്ചിട്ടുള്ളത്.

Content Highlights: Will attend Niti Aayog meeting to protest anti opposition budget, Mamata Banerjee