‘മിസ്റ്റർ പ്രധാനമന്ത്രി താങ്കള്‍ വലിയവനാണ്’; ട്രംപിന്റെ കുറിപ്പോട് കൂടിയുള്ള ചിത്രം മോദിയ്ക്ക് നല്‍കി പുതിയ യുഎസ് സ്ഥാനപതി
ന്യൂഡല്‍ഹി: ഇന്ത്യയിലെ നിയുക്ത യുഎസ് അംബാസഡര്‍ സെര്‍ജിയോ ഗോര്‍ ശനിയാഴ്ച ന്യൂഡല്‍ഹിയില്‍ വെച്ച് പ്രധാനമന്ത്രി നരേന്ദ്ര മോദിയുമായും വിദേശകാര്യ മന്ത്രി എസ്. ജയശങ്കറുമായും കൂടിക്കാഴ്ച നടത്തി. സുപ്രധാനമായ ഈ നയതന്ത്ര പദവിയില്‍ നിയമിതനായതിന് ശേഷമുള്ള ഗോറിന്റെ ആദ്യ ഇന്ത്യ സന്ദര്‍നമാണിത്.
ഇന്ത്യക്ക് മേല്‍ അധികമായി 25% താരിഫ് ചുമത്തുന്നതിന് ദിവസങ്ങള്‍ക്ക് മുന്‍പ്, ഓഗസ്റ്റില്‍ ഡൊണാള്‍ഡ് ട്രംപാണ് ഇന്ത്യയുടെ അടുത്ത യുഎസ് അംബാസഡറായി ഗോറിനെ നാമനിര്‍ദ്ദേശം ചെയ്തത്. ഇന്ത്യയും അമേരിക്കയും വ്യാപാര ചര്‍ച്ചകളില്‍ ഏര്‍പ്പെട്ടിരിക്കുന്ന സമയത്താണ് അദ്ദേഹത്തിന്റെ ഇന്ത്യാ സന്ദര്‍ശനം.
ഡല്‍ഹിയിലെ കൂടിക്കാഴ്ചയില്‍ സെര്‍ജിയോ ഗോറും പ്രധാനമന്ത്രി മോദിയും ചര്‍ച്ച ചെയ്ത വിഷയങ്ങളില്‍ വ്യാപാരവും ഉള്‍പ്പെട്ടിരുന്നു. പ്രതിരോധ സഹകരണവുമായിരുന്നു മറ്റു വിഷയങ്ങള്‍. തന്റെ വിലപ്പെട്ട സുഹൃത്തായാണ് ട്രംപ് മോദിയെ കാണുന്നതെന്ന് ഗോര്‍ പറഞ്ഞു.
ആറ് ദിവസത്തെ സന്ദര്‍ശനത്തിനായി ഇന്ത്യയിലെത്തിയ ഗോര്‍, ന്യൂഡല്‍ഹിയിലേക്ക് പുറപ്പെടുന്നതിന് തൊട്ടുമുന്‍പ് ഇരു നേതാക്കളും ഫോണില്‍ സംസാരിച്ച കാര്യവും പങ്കുവെച്ചു. 'പ്രസിഡന്റ് ട്രംപ് മോദിയെ ഒരു വലിയ നേതാവായും വ്യക്തിപരമായ സുഹൃത്തായും കാണുന്നു. വാസ്തവത്തില്‍, ഞാന്‍ ന്യൂഡല്‍ഹിയിലേക്ക് പുറപ്പെടുന്നതിന് തൊട്ടുമുമ്പ്, അവര്‍ക്കിടയില്‍ മികച്ച ഒരു ഫോണ്‍ സംഭാഷണം നടന്നു. വരും ആഴ്ചകളിലും മാസങ്ങളിലും അത് തുടരും,' ഇന്ത്യയിലെ യുഎസ് എംബസിയുടെ പ്രസ്താവനയില്‍ ഗോര്‍ പറഞ്ഞതായി പറയുന്നു.
എസ് ജയശങ്കറുമായുള്ള കൂടിക്കാഴ്ചയ്ക്ക് ശേഷം, നിരവധി വിഷയങ്ങളില്‍ തങ്ങള്‍ക്കിടയില്‍ ക്രിയാത്മകമായ ചര്‍ച്ച നടന്നുവെന്ന് സെര്‍ജിയോ ഗോര്‍ പറഞ്ഞു. 'നമ്മുടെ തന്ത്രപരമായ പങ്കാളിത്തം കൂടുതല്‍ ശക്തമാക്കുന്നതിനും രാജ്യങ്ങളെ കൂടുതല്‍ സുരക്ഷിതവും സമൃദ്ധവുമാക്കുന്നതിനും ജയശങ്കറുമായി ചേര്‍ന്ന് പ്രവര്‍ത്തിക്കാന്‍ ഞാന്‍ ആഗ്രഹിക്കുന്നുവെന്നും അദ്ദേഹം കൂട്ടിച്ചേര്‍ത്തു.
ഇന്ത്യയ്ക്ക് മേല്‍ ട്രംപ് 50% അധിക താരിഫ് ചുമത്തിയതിനെ തുടര്‍ന്ന് ഇന്ത്യ-യുഎസ് ബന്ധത്തില്‍ മാറ്റങ്ങള്‍ വരുന്നതിനിടെയാണ് ഗോറിന്റെ പരാമര്‍ശങ്ങള്‍. റഷ്യയുമായി ഇന്ത്യ എണ്ണ വ്യാപാരം തുടരുന്നതിനുള്ള പിഴയായാണ് ഈ തീരുവകളുടെ പകുതിയും ചുമത്തിയതെന്നാണ് റിപ്പോര്‍ട്ട്. ഈ വ്യാപാരം നിയന്ത്രിക്കണമെന്ന് അമേരിക്ക ലോകരാജ്യങ്ങളോട് ആവശ്യപ്പെട്ടിരുന്നു.
നിയുക്ത യുഎസ് അംബാസഡര്‍ പ്രധാനമന്ത്രി മോദിയുടെയും ഡൊണാള്‍ഡ് ട്രംപിന്റെയും ഒരു ചിത്രം ഇന്ത്യയിലേക്ക് കൊണ്ടുവന്നിരുന്നു. പ്രധാനമന്ത്രിക്ക് കൈമാറിയ ഈ ചിത്രത്തില്‍, 'മിസ്റ്റര്‍ പ്രധാനമന്ത്രി, താങ്കള്‍ വലിയവനാണ്' എന്ന് എഴുതിയിരുന്നു. ഇത് വലിയൊരു മാര്‍ക്കര്‍ പേന കൊണ്ട് ട്രംപ് കൈകൊണ്ട് എഴുതിയ സന്ദേശമാണെന്ന് റിപ്പോര്‍ട്ടുകള്‍.
കഴിഞ്ഞ മാസം ഡൊണാള്‍ഡ് ട്രംപും മോദിയും തമ്മില്‍ നടന്ന ക്രിയാത്മകമായ ചര്‍ച്ചയെ തുടര്‍ന്ന് ഇരു രാജ്യങ്ങളും തമ്മിലുള്ള ബന്ധത്തില്‍ ഒരു വഴിത്തിരിവുണ്ടായി. താരിഫ് സമയപരിധി അവസാനിച്ചതിന് ദിവസങ്ങള്‍ക്ക് ശേഷം, താന്‍ മോദിയുമായി 'എല്ലായ്പ്പോഴും സുഹൃത്തുക്കളായിരിക്കുമെന്ന്' ട്രംപ് പറഞ്ഞു, പ്രധാനമന്ത്രിയും അതേ രീതിയില്‍ പ്രതികരിച്ചു.
'ഞാന്‍ എപ്പോഴും മോദിയുടെ സുഹൃത്തായിരിക്കും, അദ്ദേഹം ഒരു മികച്ച പ്രധാനമന്ത്രിയാണ്, അദ്ദേഹം വലിയവനാണ്,' ട്രംപ് പറഞ്ഞു. പക്ഷേ അദ്ദേഹം ഇപ്പോള്‍ ചെയ്യുന്ന കാര്യങ്ങള്‍ തനിക്ക് അഭിപ്രായ വ്യത്യാസമുണ്ട്. എങ്കിലും ഇന്ത്യയും യുഎസും തമ്മില്‍ ഒരു പ്രത്യേക ബന്ധമുണ്ട്. വിഷമിക്കാന്‍ ഒന്നുമില്ല,' ഇന്ത്യ-റഷ്യ എണ്ണ വ്യാപാരത്തിലുള്ള തന്റെ അതൃപ്തി പ്രകടിപ്പിച്ചുകൊണ്ട് ട്രംപ് പറഞ്ഞിരുന്നു.
Content Highlights: New US Ambassador Sergio G. G has met with PM Narendra Modi and EAM S. Jaishankar. Discussions covered trade and defense cooperation, with G conveying Trump`s admiration for Modi.