ത്രിപുര പോലീസ് മേധാവി ഓഫീസിൽ മരിച്ച നിലയിൽ; സ്വയം വെടിവെച്ചതെന്ന് സംശയം

അഗർത്തല: ത്രിപുര പോലീസ് മേധാവി (DGP) അനുരാഗ് ധങ്കറിനെ തിങ്കളാഴ്ച അഗർത്തലയിലെ പോലീസ് ആസ്ഥാനത്ത് മരിച്ച നിലയിൽ കണ്ടെത്തി. അദ്ദേഹം ആത്മഹത്യ ചെയ്തതാണെന്നാണ് പോലീസ് സംശയിക്കുന്നത്. 1994 ബാച്ച് ഐപിഎസ് ഓഫീസർ ആണ് അനുരാഗ് ധങ്കർ.

പ്രാഥമിക വിവരങ്ങൾ പ്രകാരം, ധങ്കർ തന്റെ സ്വന്തം സർവീസ് പിസ്റ്റൾ ഉപയോഗിച്ച് സ്വയം വെടിവെച്ചതായാണ് കരുതപ്പെടുന്നത്. ഉടൻ തന്നെ അദ്ദേഹത്തെ അഗർത്തലയിലെ ഗോവിന്ദ് വല്ലഭ് പന്ത് (GB) ആശുപത്രിയിൽ എത്തിച്ചെങ്കിലും ഡോക്ടർമാർ മരണം സ്ഥിരീകരിച്ചു.

സംഭവത്തിലേക്ക് നയിച്ച സാഹചര്യങ്ങൾ വ്യക്തമല്ല. കേസിൽ ഔദ്യോഗിക അന്വേഷണം ആരംഭിച്ചിട്ടുണ്ട്. അമിതാഭ് രഞ്ജന് ശേഷം 2025 മെയ് മാസത്തിലാണ് അനുരാഗ് ധങ്കർ ത്രിപുര ഡിജിപിയായി ചുമതലയേറ്റത്.

സംസ്ഥാന പോലീസ് മേധാവിയാകുന്നതിന് മുമ്പ് ത്രിപുരയിൽ ഡയറക്ടർ ജനറൽ (ഇന്റലിജൻസ്) ആയി അദ്ദേഹം സേവനമനുഷ്ഠിച്ചിരുന്നു. കൂടാതെ സിബിഐയിൽ പ്രവർത്തിച്ചിരുന്ന കാലയളവിൽ നിരവധി ഉന്നതതല അന്വേഷണങ്ങൾ അദ്ദേഹം കൈകാര്യം ചെയ്തിട്ടുണ്ട്.

സംസ്ഥാനത്തെ ഏറ്റവും മുതിർന്ന ഐപിഎസ് ഓഫീസർമാരിൽ ഒരാളായ ധങ്കർ പ്രൊഫഷണൽ സമീപനത്തിനും വിപുലമായ പോലീസ് സേവന പരിചയത്തിനും പേരുകേട്ട ഉദ്യോഗസ്ഥനാണ്. അദ്ദേഹത്തിന്റെ മരണം സർക്കാർ തലത്തിലും സേനയിലും വലിയ ഞെട്ടലുളവാക്കിയിട്ടുണ്ട്.

(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല, മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാൻ ശ്രമിക്കുക. അത്തരം ചിന്തകളുളളപ്പോൾ 'ദിശ' ഹെൽപ് ലൈനിൽ വിളിക്കുക: 1056, 0471-2552056)

Content Highlights: Tripura DGP Anurag Dhankar found dead in his Agartala office, Preliminary reports suggest suicide using a service pistol, Official investigation into the death has been initiated, Dhankar assumed the DGP role in May 2025.