ജയലളിത,കരുണാനിധി,ഉദയനിധി.. എതിരാളികളുടെ അറസ്റ്റ് തമിഴകരാഷ്ട്രീയത്തിൽ തുടർക്കഥ

ചെന്നൈ: വാക്പോരിലൊതുങ്ങുന്നതല്ല തമിഴ്നാട്ടിലെ രാഷ്ട്രീയവൈരം. ഭരണമാറ്റം വരുമ്പോൾ എതിരാളിക്കെതിരേ കേസെടുക്കുന്നതും അറസ്റ്റുചെയ്ത് ജയിലിലടയ്ക്കുന്നതും ദ്രാവിഡരാഷ്ട്രീയത്തിലെ തിരക്കഥകളിൽ പതിവാണ്. ഉദയനിധി സ്റ്റാലിന്റെ മുത്തച്ഛൻ കരുണാനിധിയെ പുലർച്ചെ കിടപ്പുമുറിയിൽനിന്ന് വലിച്ചിഴച്ച് അറസ്റ്റുചെയ്ത സംഭവമായിരുന്നു അക്കൂട്ടത്തിൽ ഏറ്റവും നാടകീയം.

അണ്ണാ ഡി.എം.കെ. നേതാവ് ജയലളിത രണ്ടാംവട്ടം മുഖ്യമന്ത്രിയായി അധികാരമേറ്റ ഉടനെ, 2001 ജൂൺ 30-നാണ് മുൻമുഖ്യമന്ത്രി എം. കരുണാനിധിയെയും കേന്ദ്രമന്ത്രിമാരായിരുന്ന മരുമകൻ മുരശൊലി മാരനെയും ടി.ആർ. ബാലുവിനെയും പോലീസ് അറസ്റ്റുചെയ്തത്. കരുണാനിധി മുഖ്യമന്ത്രിയായിരിക്കേ മേൽപ്പാത നിർമാണത്തിൽ അഴിമതിനടന്നെന്ന പരാതി ലഭിച്ചതിനു പിന്നാലെ ചെന്നൈ ക്രൈംബ്രാഞ്ച് കേസെടുത്ത് അറസ്റ്റിലേക്കു കടക്കുകയായിരുന്നു.

ജൂൺ 30-ന് പുലർച്ചെ 1.30-ഓടെ, വൻ പോലീസ് സംഘം മൈലാപ്പുരിലെ വസതിയിൽ ഇരച്ചുകയറി, ടെലിഫോൺ ബന്ധം വിച്ഛേദിച്ചശേഷം ഒന്നാം നിലയിലെ കിടപ്പുമുറിയിലെത്തി 77-കാരനായ കരുണാനിധിയെ വലിച്ചിഴച്ച് താഴേക്കുകൊണ്ടുവന്നു. കേന്ദ്ര വാണിജ്യവ്യവസായ മന്ത്രി മുരശൊലി മാരനും കേന്ദ്ര വനം മന്ത്രി ടി.ആർ. ബാലുവും വിവരമറിഞ്ഞ് സ്ഥലത്തെത്തി പ്രതിഷേധമുയർത്തിയപ്പോൾ അവരെയും ബലപ്രയോഗത്തിലൂടെ അറസ്റ്റുചെയ്തു. മുരശൊലി മാരന്റെ മകൻ കലാനിധി മാരന്റെ ഉടമസ്ഥതയിലുള്ള സൺ ടി.വി. ഈ ദൃശ്യങ്ങൾ തുടർച്ചയായി സംപ്രേഷണം ചെയ്തതോടെ ഇത് ദേശീയതലത്തിൽ ചർച്ചാവിഷയമായി. വീഡിയോയിലെ കരുണാനിധിയുടെ നിലവിളി എഡിറ്റുചെയ്തു ചേർത്തതായിരുന്നെന്ന് പിന്നീട് വെളിപ്പെട്ടു.

കരുണാനിധി ഭരണകാലത്ത് 1996 ഡിസംബർ ഏഴിന് ജയലളിതയെ അറസ്റ്റുചെയ്തതിനുള്ള പ്രതികാരമായിരുന്നു ഈ അറസ്റ്റ്. ജയലളിത മുഖ്യമന്ത്രിയായിരിക്കേ, ഗ്രാമപ്പഞ്ചായത്തുകളിലേക്ക് ടെലിവിഷൻ വാങ്ങിയതിൽ അഴിമതിനടന്നെന്നും അവിഹിത സ്വത്തുസമ്പാദിച്ചെന്നുമുള്ള പരാതികളിലായിരുന്നു കേസ്. മുൻകൂർ ജാമ്യാപേക്ഷ കോടതി തള്ളിയതോടെ പോയസ് ഗാർഡനിലുള്ള വസതി വളഞ്ഞ് അണ്ണാ ഡി.എം.കെ. പ്രവർത്തകരുടെ പ്രതിഷേധം അടിച്ചമർത്തി പോലീസ് ജയയെയും തോഴി വി.കെ. ശശികലയെയും അറസ്റ്റുചെയ്തു. റിമാൻഡ് ചെയ്യപ്പെട്ട് സെൻട്രൽ ജയിലിൽ അടയ്ക്കപ്പെട്ട അവർക്ക് 1997 ജനുവരി മൂന്നിനാണ് ജാമ്യം ലഭിച്ചത്. ഏറെ വൈകി, 2014 സെപ്റ്റംബർ 27-നാണ് അനധികൃത സ്വത്തുസമ്പാദനക്കേസിൽ ശിക്ഷിക്കപ്പെട്ട് ജയലളിത ജയിലിലടയ്ക്കപ്പെട്ടത്. അപ്പോഴവർ മുഖ്യമന്ത്രിയായിരുന്നെന്നതുകൊണ്ട് അറസ്റ്റ് നടപടികൾ ഔപചാരികമായിരുന്നു.

മുൻ കേന്ദ്ര ആഭ്യന്തരമന്ത്രിയും തമിഴ്നാട്ടിൽനിന്നുള്ള മുതിർന്ന കോൺഗ്രസ് നേതാവുമായ പി. ചിദംബരത്തിന്റെ അറസ്റ്റും നാടകീയമായിരുന്നു. വിദേശനാണയച്ചട്ടവും കള്ളപ്പണ ഇടപാടും നടത്തിയെന്ന കേസിൽ 2019 ഓഗസ്റ്റ് 21-ന് ബി.ജെ.പി. ഭരണകാലത്ത് സി.ബി.ഐ.യാണ് അദ്ദേഹത്തെ അറസ്റ്റുചെയ്തത്. ഡൽഹിയിലെ ചിദംബരത്തിന്റെ വസതിയുടെ പ്രധാന ഗേറ്റ് പൂട്ടിയിരുന്നതിനാൽ മതിൽ ചാടിക്കടന്നാണ് സി.ബി.ഐ. ഉദ്യോഗസ്ഥർ അകത്തുകയറിയത്. 106 ദിവസം ജയിലിൽക്കിടന്നശേഷമാണ് അദ്ദേഹത്തിന് ജാമ്യം ലഭിച്ചത്.

അഴിമതിയാരോപണങ്ങളിൽ രാഷ്ട്രീയ എതിരാളികൾക്കെതിരേ വിജിലൻസ് കേസെടുക്കുന്നതും ശിക്ഷിക്കുന്നതും തമിഴ്നാട്ടിൽ ഓരോ ഭരണമാറ്റത്തിലും തുടരുമെങ്കിലും ജയലളിതയുടെ പിൻഗാമികളായിവന്ന ഒ. പനീർശെൽവവും എടപ്പാടി പളനിസ്വാമിയും നാടകീയമായ അറസ്റ്റുകൾക്കൊന്നും മുതിർന്നില്ല. കരുണാനിധിയുടെ മകൻ എം.കെ. സ്റ്റാലിൻ മുഖ്യമന്ത്രിയായപ്പോഴും അത്തരം നടപടികൾക്കു മുതിർന്നില്ല. സ്റ്റാലിൻ ഭരണകാലത്ത് മന്ത്രിയായിരിക്കേ സെന്തിൽ ബാലാജിയെ അറസ്റ്റുചെയ്ത് ജയിലിലിട്ടത് കേന്ദ്രത്തിന്റെ എൻഫോഴ്സ്മെന്റ് ഡയറക്ടറേറ്റ് ആയിരുന്നു.

ഡി.എം.കെ.യെയും അണ്ണാ ഡി.എം.കെ.യെയും തറപറ്റിച്ച് നാടകീയ വിജയം നേടിയ ടി.വി.കെ. സർക്കാർ ജയലളിതയുടെയും കരുണാനിധിയുടെയും മാതൃകയാണ് പിന്തുടരാനുദ്ദേശിക്കുന്നതെന്ന സൂചനയാണ് ഉദയനിധി സ്റ്റാലിന്റെ അറസ്റ്റ് നൽകുന്നത്. ഡി.എം.കെ. സർക്കാരിലെ മന്ത്രിമാർക്കുനേരേ ഒന്നൊന്നായി വിജിലൻസ് കേസുകൾ വരുന്നുണ്ട്. വൈകാതെ അവയും അറസ്റ്റിലേക്കു നീങ്ങിയേക്കും. 

Content Highlights: Historical overview of revenge-driven political arrests in Tamil Nadu., Analysis of the 2001 Karunanidhi arrest and 1996 Jayalalithaa arrest., Contextualizing the shift from state-led arrests to central agency involvement (ED/CBI)., Speculation on the 2026 political landscape and potential legal actions against DMK ministers.