'നടപ്പാകുന്നത് രാജീവ് ഗാന്ധിയുടെ സ്വപ്നം'; വനിതാ ബില്ലിൽ പിന്നാക്കസംവരണം ഉൾപ്പെടുത്തണമെന്ന് സോണിയ

ന്യൂഡല്‍ഹി: വനിതാ സംവരണ ബിൽ നടപ്പാക്കുമ്പോൾ പട്ടികജാതി/പട്ടികവര്‍ഗ, ഒ.ബി.സി. വിഭാഗങ്ങള്‍ക്ക് പ്രത്യേക സംവരണം ഉൾപ്പെടുത്തണമെന്ന് കോണ്‍ഗ്രസ് മുന്‍ അധ്യക്ഷയും പാര്‍ലമെന്ററി പാര്‍ട്ടി നേതാവുമായ സോണിയാ ഗാന്ധി. ബില്‍ നടപ്പാക്കുന്നതിൽ ഏതുതരത്തിലുള്ള കാലതാമസമുണ്ടായാലും അത് ഇന്ത്യന്‍ സ്ത്രീകളോടുള്ള കടുത്ത അനീതിയായിരിക്കും. കോൺഗ്രസ് ബില്ലിനെ പിന്തുണയ്ക്കുന്നതായും സോണിയ സഭയില്‍ അറിയിച്ചു. 

എനിക്ക് ഇതൊരു വൈകാരിക നിമിഷമാണ്. തദ്ദേശ സ്വയംഭരണ സ്ഥാപനങ്ങളില്‍ വനിതാ സംവരണം ആദ്യമായി കൊണ്ടുവന്നത് രാജീവ് ഗാന്ധിയാണ്. അദ്ദേഹത്തിന്റെ സ്വപ്‌നം ഭാഗികമായേ പൂര്‍ത്തീകരിക്കപ്പെട്ടിട്ടുള്ളൂ. ഈ ബില്‍ പാസാകുന്നതോടെ അത് പൂര്‍ണമാകും. തടസ്സങ്ങളെല്ലാം നീക്കി ബില്‍ എത്രയും പെട്ടെന്ന് നടപ്പാക്കണമെന്നും സോണിയ പറഞ്ഞു. 

പുകനിറഞ്ഞ അടുക്കള മുതല്‍ ഫ്‌ളഡ്‌ലിറ്റ് സ്റ്റേഡിയംവരെ നീണ്ടതാണ് ഇന്ത്യന്‍ സ്ത്രീകളുടെ യാത്ര. അത് ഒടുവില്‍ ലക്ഷ്യസ്ഥാനത്തെത്തിയിരിക്കുന്നു. വിശ്രമിക്കുന്നതിനെക്കുറിച്ച് ഒരിക്കലും അവര്‍ ചിന്തിക്കുന്നില്ലെന്നും സോണിയ കൂട്ടിച്ചേര്‍ത്തു. പാര്‍ലമെന്റ് അംഗങ്ങള്‍ക്കു നല്‍കിയ ഭരണഘടനാ കോപ്പിയുടെ ആമുഖത്തിൽ സോഷ്യലിസ്റ്റ്, മതനിരപേക്ഷത എന്നീ വാക്കുകൾ ഒഴിവാക്കപ്പെട്ടതിനെയും അവര്‍ വിമര്‍ശിച്ചു. 

അതിനിടെ, കോണ്‍ഗ്രസിന് മറുപടിയുമായി ബി.ജെ.പി. എം.പി. നിഷികാന്ത് ദുബെ രംഗത്തെത്തി. പിന്നാക്ക വിഭാഗങ്ങള്‍ക്ക് സംവരണം വേണമെന്ന കോണ്‍ഗ്രസ് ആവശ്യം രാഷ്ട്രീയമാണെന്നും മുന്‍പ് സംവരണ വിഷയത്തില്‍ ഒ.ബി.സി. സംവരണത്തെക്കുറിച്ച് സംസാരിച്ചിരുന്നില്ലെന്നും ദുബെ ആരോപിച്ചു.
 

Content Highlights: sonia gandhi supports women's reservation bill and requiring obc sub quota