രാഷ്ട്രപതിയുടെ റഫറന്സില് സുപ്രീംകോടതിയുടെ മറുപടി നാളെ; കേരളത്തിന് നിര്ണായകം
ന്യൂഡല്ഹി: ബില്ലുകളില് തീരുമാനമെടുക്കുന്നതില് രാഷ്ട്രപതിക്കും ഗവര്ണര്ക്കും സമയപരിധി നിശ്ചയിച്ച സുപ്രീംകോടതി വിധിയുമായി ബന്ധപ്പെട്ട രാഷ്ട്രപതിയുടെ റഫറന്സില് ഭരണഘടനാ ബെഞ്ച് വ്യാഴാഴ്ച അഭിപ്രായം അറിയിക്കും.സുപ്രീംകോടതി ചീഫ് ജസ്റ്റിസ് ബി.ആര്. ഗവായ് അധ്യക്ഷനായ ബെഞ്ചാണ് റഫറന്സിന് വ്യക്തത നല്കുക. 14 വിഷയങ്ങളിലാണ് രാഷ്ട്രപതി ദ്രൗപതി മുര്മു റഫന്സില് വ്യക്തത തേടിയിരിക്കുന്നത്.
ഭരണഘടനയുടെ 143-ാം അനുച്ഛേദപ്രകാരമാണ് രാഷ്ട്രപതി 14 വിഷയങ്ങളില് വ്യക്ത തേടി സുപ്രീംകോടതിയെ സമീപിച്ചത്. സംസ്ഥാനങ്ങളില് നിയമസഭ പാസാക്കുന്ന ബില്ലുകളില് തീരുമാനമെടുക്കാന് രാഷ്ട്രപതിക്കും ഗവര്ണര്മാര്ക്കും സുപ്രീംകോടതി സമയം നിശ്ചയിച്ചിരുന്നു. ഇതിന് സുപ്രീംകോടതിക്ക് അധികാരമുണ്ടോ എന്നതടക്കമുള്ള വിഷയങ്ങളിലാണ് രാഷ്ട്രപതി വ്യക്തത തേടിയിരിക്കുന്നത്.
ഭരണഘടനയുടെ 200, 201 അനുച്ഛേദങ്ങള് പ്രകാരമുള്ള വിഷയങ്ങളിലാണ് രാഷ്ട്രപതി വ്യക്തത തേടിയിരുന്നത്. രാഷ്ട്രപതിയുടെ റഫറന്സ് മടക്കണമെന്ന് കേരളം, തമിഴ്നാട്, പശ്ചിമബംഗാള്, പഞ്ചാബ് എന്നീ സംസ്ഥാനങ്ങള് സുപ്രീംകോടതിയോട് ആവശ്യപ്പെട്ടിരുന്നു. പ്രതിപക്ഷ ഭരണ സംസ്ഥാനങ്ങളെ സംബന്ധിച്ചിടത്തോളം നാളത്തെ വിധി നിര്ണായകമാണ്. ഗവര്ണര്മാരുടെ അധികാരവുമായി ബന്ധപ്പെട്ട തര്ക്കത്തില് ഈ വിധി നിര്ണായക സ്വാധീനം ചെലുത്തും.
Content Highlights: Supreme Court to deliver verdict on President Droupadi Murmu's reference regarding time limits for Governors & President on bills passed by state legislatures. Crucial for state powers.