പഞ്ചസാരയിൽനിന്നുള്ള എഥനോൾ വേണ്ടെന്ന് എണ്ണക്കമ്പനികൾ; പുതിയ ടെൻഡറിൽ പഞ്ചസാര അധിഷ്ടിത എഥനോളില്ല

ന്യൂഡൽഹി: പെട്രോളിൽ ചേർക്കാനായി പഞ്ചസാരയിൽനിന്ന് ഉത്പാദിപ്പിക്കുന്ന എഥനോൾ വേണ്ടെന്ന് പൊതുമേഖലാ എണ്ണക്കമ്പനികൾ തീരുമാനിച്ചു. എഥനോൾ ചേർത്ത പെട്രോൾ പദ്ധതി തുടരുന്നതിനൊപ്പം ആഭ്യന്തരവിപണിയിൽ പഞ്ചസാരലഭ്യത ഉറപ്പാക്കാൻകൂടി ലക്ഷ്യമിട്ടാണ് കേന്ദ്ര നിർദേശത്തിന്റെ ഭാഗമായ നടപടി. 2026-27 വിതരണ വർഷത്തിൽ കരിമ്പുനീര്, പഞ്ചസാര സിറപ്പ്, ബി-ഹെവി മൊളാസസ് എന്നിവയിൽനിന്ന് ഉത്പാദിപ്പിക്കുന്ന എഥനോൾ വേണ്ടെന്നാണ് എണ്ണക്കമ്പനികളുടെ തീരുമാനം.

എഥനോൾ കലർത്തിയ പെട്രോൾ വാഹനങ്ങൾക്ക് കേടുപാടുകളുണ്ടാക്കുകയും ഇന്ധനക്ഷമത കുറയ്ക്കുകയും ചെയ്യുന്നുവെന്ന ആശങ്കകൾക്കുപുറമേ, ആഭ്യന്തരവിപണിയിൽ പഞ്ചസാരയുടെ വിലക്കയറ്റവും വിവാദമായിരുന്നു. പെട്രോളിയം ഇറക്കുമതിക്കൊപ്പം വാഹനങ്ങളുടെ പുകമലിനീകരണവും കുറയ്ക്കുന്നതിനുവേണ്ടിയാണ് എഥനോൾ കലർത്താൻ തീരുമാനിച്ചത്. വാഹനങ്ങളുമായി ബന്ധപ്പെട്ട വിവാദങ്ങൾക്കു പിന്നാലെ ഭക്ഷ്യ ആവശ്യത്തിനുള്ള പഞ്ചസാരലഭ്യതയിലും വിലയിലും ചലനങ്ങളുണ്ടായതോടെയാണ് കേന്ദ്ര ഇടപെടൽ.

2026 നവംബറിൽ തുടങ്ങുന്ന വിതരണവർഷത്തിലേക്ക് എണ്ണ മാർക്കറ്റിങ് കമ്പനികൾക്കായി ഭാരത് പെട്രോളിയം ഒക്ടോബർ 16-ന് വിളിച്ച ടെൻഡറിൽ 1100 കോടി ലിറ്റർ എഥനോളാണ് ആവശ്യപ്പെടുന്നത്. പഞ്ചസാര അധിഷ്ഠിത എഥനോൾ വേണ്ടെന്നുവെച്ചതിനുപുറമേ, ചോളത്തിൽനിന്ന് ഉത്പാദിപ്പിക്കുന്നതിന്റെ സംഭരണവില കുറയ്ക്കുകയും ചെയ്തു. ലിറ്ററിന് 71.86 രൂപയിൽനിന്ന് 68.86 രൂപയായാണ് കുറച്ചത്. എഥനോളിനുവേണ്ടി പഞ്ചസാര ഉപയോഗിക്കുന്നത് പൂജ്യത്തിൽ എത്തിക്കണമെന്ന കേന്ദ്ര നിർദേശത്തെത്തുടർന്നാണ് നടപടിയെന്ന് ടെൻഡർ രേഖയിൽ പറയുന്നു.

Content Highlights: Public sector oil companies decided not to use sugar-derived ethanol for petrol blending in the 2026-27 supply year., The move aims to ensure domestic sugar availability and control rising prices., Procurement price of maize-derived ethanol was reduced from Rs 71.86 to Rs 68.86 per liter., Bharat Petroleum tendered for 1100 crore liters of ethanol for the supply year starting November 2026.