മംഗളൂരു എംആർപിഎൽ റിഫൈനറിയിൽ വൻ തീപ്പിടിത്തവും സ്ഫോടനവും: ഒരു മരണം; എട്ടുപേർക്ക് പരിക്ക്
മംഗളൂരു: മംഗളൂരു റിഫൈനറി ആൻഡ് പെട്രോ കെമിക്കൽസ് ലിമിറ്റഡിലെ (എംആർപിഎൽ) ഹൈഡ്രോ സൾഫർ ട്രീറ്റ്മെന്റ് യൂണിറ്റായ സി.എച്ച്.ടി. യൂണിറ്റിൽ വൻ സ്ഫോടനവും തീപ്പിടിത്തവും. അപകടത്തിൽ ഒരാൾ മരിച്ചു. എട്ടുപേർക്ക് പരിക്കേറ്റു. സ്ഥാപനത്തിൽ കരാറടിസ്ഥാനത്തിൽ ജോലിചെയ്ത മനീഷ് കർക്കര (30) ആണ് മരിച്ചത്. ഇദ്ദേഹത്തിന്റെ മൃതദേഹം കത്തിക്കരിഞ്ഞ നിലയിൽ കണ്ടെത്തി.
അപകടത്തിൽ ജീവനക്കാരിൽ ഒരാൾക്ക് 35 ശതമാനത്തോളം പൊള്ളലേറ്റിട്ടുണ്ട്. ഇദ്ദേഹത്തെ ആശുപത്രിയിൽ പ്രവേശിപ്പിച്ചു. സമീപത്തെ ഓഫീസിലുണ്ടായിരുന്ന ആറുപേരുടെ പരിക്കുകൾ സാരമുള്ളതല്ല. അപകടനില തരണം ചെയ്തതായാണ് വിവരം.
തീ പൂർണമായി നിയന്ത്രണവിധേയമാക്കിയതായി സിറ്റി പോലീസ് കമ്മീഷണർ സുധീർ കുമാർ റെഡ്ഡി അറിയിച്ചു. സ്‌ഫോടനത്തെത്തുടർന്ന് കിലോമീറ്ററുകളോളം ദൂരത്തിൽ വലിയ ശബ്ദം കേൾക്കുകയും കറുത്ത പുക ഉയരുകയും ചെയ്തു. ചിലയിടങ്ങളിലെ വീടുകൾ കുലുങ്ങുകയും വാതിലുകളിലും ജനലുകളിലും പ്രകമ്പനങ്ങൾ അനുഭവപ്പെടുകയും ചെയ്തതായി നാട്ടുകാർ പറഞ്ഞു.
മംഗളൂരു, കാവൂർ, കുളായ്, അങ്കരഗുണ്ടി, ബൈക്കംപാടി ഇൻഡസ്ട്രിയൽ ഏരിയ തുടങ്ങി കിലോമീറ്റർ അകലെവരെ സ്ഫോടനത്തിന്റെ ശബ്ദംകേട്ടു. ജോക്കട്ടെ ഗ്രാമപഞ്ചായത്തിലെ കെട്ടിടങ്ങളും വീടുകളും സ്ഫോടനത്തിൽ കുലുങ്ങി. ചില വീടുകളുടെയും ജോക്കാട്ടെ ഗ്രാമപഞ്ചായത്ത് ലൈബ്രറിയുടെയും വാതിലുകളും ജനലുകളും ഇളകി.
മംഗളൂരു വിമാനത്താവളം, മംഗളൂരു പുതു തുറമുഖം, കദ്രി, പാണ്ഡേശ്വർ എന്നിവിടങ്ങളിൽ നിന്നുള്ള ഫയർ എൻജിനുകൾ എത്തിയാണ് തീ അണച്ചത്.
മംഗളൂരു വിമാനത്താവളത്തിന്റെ അഡ്മിനിസ്‌ട്രേറ്റീവ് ഓഫീസിലെ ജനലുകൾവരെ സ്‌ഫോടന ശബ്ദത്തിൽ കുലുങ്ങി. അപകടത്തിന് പിന്നാലെ നിരവധി ഫയർ എൻജിനുകളും അടിയന്തര രക്ഷാപ്രവർത്തകരും ആംബുലൻസുകളും സ്ഥലത്തെത്തി.
സംഭവസ്ഥലത്ത് സിറ്റി പോലീസ് കമ്മിഷണർ, ഡെപ്യൂട്ടി കമ്മിഷണർ, ജില്ലാ പഞ്ചായത്ത് സി.ഇ.ഒ. എന്നിവർ നേരിട്ടെത്തി സ്ഥിതിഗതികൾ വിലയിരുത്തി. ആശങ്കപ്പെടേണ്ട സാഹചര്യമില്ലെന്നും മുൻകരുതൽ നടപടികൾ സ്വീകരിച്ചിട്ടുണ്ടെന്നും പോലീസ് അറിയിച്ചു. സംഭവത്തിൽ ആർക്കും ജീവഹാനി സംഭവിച്ചിട്ടില്ലെന്ന് സ്ഥിരീകരിച്ച എം.ആർ.പി.എൽ. അധികൃതർ, ജനങ്ങൾ പരിഭ്രാന്തരാകരുതെന്നും അഭ്യർഥിച്ചു.