'അതെ, ഇത് എ.ഐ ആണ്'; മോദിയും മാക്രോണും ചേർത്തുവെച്ച 'എ.ഐ ഹൃദയം'

ന്യൂഡൽഹി: ഫ്രഞ്ച് പ്രസിഡന്റ് ഇമ്മാനുവൽ മാക്രോൺ എക്സിൽ പങ്കുവെച്ച എ.ഐ ചിത്രം സമൂഹമാധ്യമങ്ങളിൽ തരംഗമാകുന്നു. പ്രധാനമന്ത്രി നരേന്ദ്ര മോദിക്കൊപ്പമുള്ള ചിത്രമാണ് അദ്ദേഹം പങ്കുവെച്ചത്. ഇരുനേതാക്കളും പുഞ്ചിരിയോടെ കൈകോർത്ത് ഇരു കൈകളാൽ ഹൃദയചിഹ്നം നിർമ്മിക്കുന്ന ഈ ചിത്രത്തിൽ ഇന്ത്യയുടെയും ഫ്രാൻസിന്റെയും ദേശീയ പതാകകൾ ആലേഖനം ചെയ്ത കപ്പുകളും കാണാം. 'അതെ, ഇത് എ.ഐ ആണ്' എന്ന അടിക്കുറിപ്പോടെ പങ്കുവെച്ച പോസ്റ്റിൽ, സുഹൃത്തുക്കൾ ഒന്നിക്കുമ്പോൾ നവീകരണങ്ങൾ ഉണ്ടാകുന്നുവെന്നും മാക്രോൺ കുറിച്ചു. മൂന്ന് ദിവസത്തെ സന്ദർശനത്തിനായി ന്യൂഡൽഹിയിലെത്തിയ അദ്ദേഹം എ.ഐ ഇംപാക്ട് സമ്മിറ്റിൽ പങ്കെടുക്കുന്നുണ്ട്. 

ഡൽഹിയിലെ ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസിൽ നടന്ന പരിപാടിയിൽ സംസാരിക്കവെ, ആർട്ടിഫിഷ്യൽ ഇന്റലിജൻസിന്റെ ഭാവിയിൽ ഇന്ത്യയും ഫ്രാൻസും ഒരുമിച്ച് നിൽക്കേണ്ടതിന്റെ പ്രാധാന്യം മാക്രോൺ എടുത്തുപറഞ്ഞു. അമേരിക്കയുടെയും ചൈനയുടെയും എ.ഐ മാതൃകകളെ അമിതമായി ആശ്രയിക്കുന്നത് ഒഴിവാക്കാൻ ഇരുരാജ്യങ്ങളും ലക്ഷ്യമിടുന്നു. സ്വന്തമായി സമതുലിതമായ മാതൃകകൾ വികസിപ്പിക്കുക എന്നത് ഇന്ത്യയുടെയും ഫ്രാൻസിന്റെയും യൂറോപ്പിന്റെയും പൊതുവായ ലക്ഷ്യമാണെന്നും, ഈ മേഖലയിൽ മറ്റുള്ളവരെ മാത്രം ആശ്രയിക്കാൻ ആഗ്രഹിക്കുന്നില്ലെന്നും അദ്ദേഹം വ്യക്തമാക്കി.

ഈ മാസം 16 മുതൽ 20 വരെയാണ് എ.ഐ ഇംപാക്ട് സമ്മിറ്റ് നടക്കുന്നത്. മനുഷ്യർ, ഗ്രഹം, പുരോഗതി എന്നീ മൂന്ന് പ്രധാന തൂണുകളെ ആസ്പദമാക്കിയാണ് ഈ ഉച്ചക്കോടി സംഘടിപ്പിച്ചിരിക്കുന്നത്. 2025-ൽ പാരീസിൽ നടന്ന എ.ഐ ആക്ഷൻ സമ്മിറ്റ് പോലുള്ള മുൻകാല ആഗോള സംരംഭങ്ങളുടെ തുടർച്ചയായാണ് ഈ സമ്മേളനം നടക്കുന്നത്. ആഗോളതലത്തിൽ നടക്കുന്ന ഇത്തരം ചർച്ചകൾ ഉത്തരവാദിത്തമുള്ള എ.ഐ വികസനത്തിന് അനിവാര്യമാണെന്ന് മാക്രോൺ അഭിപ്രായപ്പെട്ടു.

സമ്മിറ്റിന്റെ ഉദ്ഘാടന പ്രസംഗത്തിൽ എ.ഐ സാങ്കേതികവിദ്യയുമായി ബന്ധപ്പെട്ട ഇന്ത്യയുടെ വിപുലമായ കാഴ്ചപ്പാടുകൾ പ്രധാനമന്ത്രി നരേന്ദ്ര മോദി അവതരിപ്പിച്ചു. എല്ലാവരെയും ഉൾക്കൊള്ളുന്നതും വിശ്വസനീയവുമായ എ.ഐ വികസനമാണ് ഇന്ത്യ ലക്ഷ്യമിടുന്നതെന്ന് അദ്ദേഹം പറഞ്ഞു. ഗ്ലോബൽ സൗത്തിൽ നടക്കുന്ന ആദ്യത്തെ പ്രധാന എ.ഐ സമ്മേളനമാണിത്. ഇതിൽ 20-ലധികം രാഷ്ട്രത്തലവന്മാരും നിരവധി സാങ്കേതിക വിദഗ്ധരും പങ്കെടുക്കുന്നുണ്ട്.

Content Highlights: French President Macron and PM Modi share an AI-generated heart image, symbolizing India-France collaboration in AI innovation.