മഹാരാഷ്ട്രയിലെ അഹമ്മദ് നഗർ ഇനി 'അഹല്യ നഗര്‍'; എട്ട് റെയിൽവേ സ്റ്റേഷനുകളുടെ പേരിലും മാറ്റം

മുംബൈ: ഔറംഗബാദിന്‍റെയും ഒസ്മാനാബാദിന്‍റെയും പേരുമാറ്റത്തിന് ശേഷം മഹാരാഷ്ട്രയിൽ വീണ്ടും സ്ഥലപ്പേരുകൾ മാറ്റി സംസ്ഥാന സർക്കാർ. അഹ്മദ്‌നഗറിന്‍റെ പേര് 'അഹല്യ നഗര്‍' എന്നാണ് പുനർ നാമകരണം ചെയ്തിരിക്കുന്നത്. മഹാരാഷ്ട്ര മുഖ്യമന്ത്രി ഏക്‌നാഥ് ഷിന്ദേ ആണ് എക്‌സിലൂടെ ഇക്കാര്യം അറിയിച്ചത്. 

18-ാം നൂറ്റാണ്ടില്‍ ജീവിച്ചിരുന്ന മറാത്ത രാജ്ഞിയാണ് അഹല്യാഭായ് ഹോൽക്കർ. അഹല്യ ഹോല്‍ക്കറുടെ 298-ാം ജന്മവാര്‍ഷികത്തിലാണ് ഉത്തരവിറങ്ങിയിരിക്കുന്നത്. 2022 ജൂണിൽ ഔറംഗബാദ്‌ ജില്ലയെ ഛത്രപതി സംബാജിനഗറെന്നും ഒസ്മാനാബാദിനെ ധാരാശിവ് എന്നും മഹാരാഷ്ട്ര സർക്കാർ പുനർ നാമകരണം ചെയ്തിരുന്നു.

ബ്രിട്ടീഷ് ഭരണകാലത്ത് നാമകരണം ചെയ്ത മുംബൈയിലെ എട്ട് റെയില്‍വേ സ്റ്റേഷനുകളുടെ പേര് മാറ്റാനും മന്ത്രിസഭ തീരുമാനിച്ചിട്ടുണ്ട്. കറി റോഡ് സ്‌റ്റേഷന്‍ ലാല്‍ബാഗെന്നും സന്ദേര്‍സ്റ്റ് റോഡ് സ്‌റ്റേഷന്‍ ഡോഗ്രീ എന്നും മറൈന്‍ ലൈൻസ്  മുംബാദേവിയെന്നും ഛാര്‍നി റോഡ് ഗിര്‍ഗാവോൺ എന്നും കോട്ടണ്‍ ഗ്രീന്‍ കാലാചൗകിയെന്നും ഡോക്ക്‌യാര്‍ഡ് സ്‌റ്റേഷന്‍ മാസ്ഗാവോൺ എന്നും കിങ്‌സ് സര്‍ക്കിള്‍ തിര്‍ത്തങ്കര്‍ പര്‍സ്വാനത് എന്നുമാണ് പുനര്‍നാമകരണം ചെയ്തിരിക്കുന്നത്.

Content Highlights: maharashtra cabinet approves renaming of cities, ahmednagar will be known as ahilyanagar