ഓഹരിവിപണിയിൽ തിരിമറി; സെബി മുൻ മേധാവി മാധബി പുരി ബുച്ചിനെതിരെ കേസെടുക്കാൻ നിർദേശം

മുംബൈ: സെക്യൂരിറ്റീസ് ആന്‍ഡ് എക്‌സ്‌ചേഞ്ച് ബോര്‍ഡ് ഓഫ് ഇന്ത്യയുടെ (സെബി) ഡയറക്ടര്‍ബോര്‍ഡ് അംഗമായിരിക്കെ ഓഹരി വിപണി തട്ടിപ്പ് നടത്തിയെന്ന ആരോപണത്തില്‍ മുൻ മേധാവി മാധബി പുരി ബുച്ചിനെതിരെ കേസെടുക്കാന്‍ കോടതി ഉത്തരവ്. ബോംബെ സ്‌റ്റോക്ക് എക്‌സ്‌ചേഞ്ചിലെ അഞ്ച് മുതിര്‍ന്ന ഉദ്യാഗസ്ഥര്‍ക്കെതിരേയും കേസെടുക്കാൻ മുംബൈ പോലീസിനോട് നിർദേശിച്ചിട്ടുണ്ട്. സ്‌പെഷ്യല്‍ ആന്റികറപ്ഷന്‍ ബ്യൂറോ(എ.സി.ബി) കോടതിയാണ് നിർദേശം നൽകിയിരിക്കുന്നത്.

കൃത്യനിർവഹണത്തിലെ വീഴ്ചകള്‍ക്കും ഗൂഡാലോചനയ്ക്കും പ്രഥമദൃഷ്ട്യാ തെളിവുണ്ട്. അതിനാൽ ന്യായവും നിഷ്പക്ഷവുമായ അന്വേഷണം ആവശ്യമാണെന്നും ശനിയാഴ്ച പുറപ്പെടുവിച്ച വിധിയില്‍ എസിബി കോടതി ജഡ്ജ് എസ്.ഇ. ബങ്കാര്‍ പ്രസ്താവിച്ചു. സ്‌പെഷ്യല്‍ ആന്റി കറപ്ഷന്‍ ബ്യൂറോയോട് 30 ദിവസത്തിനകം റിപ്പോര്‍ട്ട് സമര്‍പ്പിക്കാനും കോടതി ആവശ്യപ്പെട്ടിട്ടുണ്ട്.

ഗുരുതരമായ കുറ്റമാണ് ആരോപിക്കപ്പെട്ടിരിക്കുന്നതെന്നും അതിനാല്‍ അന്വേഷണം ആവശ്യമാണെന്നും കോടതി ചൂണ്ടിക്കാട്ടി. സിആര്‍പിസി പ്രകാരം ജുഡീഷ്യല്‍ ഇടപെടല്‍ ആവശ്യമാണെന്നും കോടതി കൂട്ടിച്ചേര്‍ത്തു. സെബി മേധാവിക്കും ബിഎസ്ഇ ഉദ്യോഗസ്ഥര്‍ക്കും എതിരെ വിപണിയിൽ കൃത്രിമത്വവും അഴിമതിയും നടത്തിയതായി ആരോപിച്ച് താനെ കേന്ദ്രീകരിച്ച് പ്രവര്‍ത്തിക്കുന്ന ജേണലിസ്റ്റ് സനാപ് ശ്രീവാസ്തവ സമര്‍പ്പിച്ച ഹര്‍ജി പരിഗണിക്കുകയായിരുന്നു കോടതി. 

സെബി ഡയറക്ടര്‍ബോര്‍ഡ് അംഗമായിരിക്കെ മാധബി പുരി ബുച്ച് ക്രമവിരുദ്ധമായി കണ്‍സള്‍ട്ടന്‍സി സ്ഥാപനത്തില്‍നിന്ന് വരുമാനംനേടിയെന്ന് നേരത്തെ ആരോപണമുണ്ടായിരുന്നു.

സിങ്കപ്പൂരിലെ കണ്‍സള്‍ട്ടന്‍സി കമ്പനിയായ അഗോറ പാര്‍ട്‌ണേഴ്‌സില്‍ മാധബിക്കുണ്ടായിരുന്ന ഓഹരികള്‍ 2022-ല്‍ സെബി ചെയര്‍പേഴ്‌സണായി ചുമതലയേറ്റ് രണ്ടാഴ്ചയ്ക്കിടെ ഭര്‍ത്താവിനു കൈമാറിയെന്ന് യു.എസ്. ഷോര്‍ട്ട് സെല്ലിങ് കമ്പനിയായ ഹിന്‍ഡെന്‍ബര്‍ഗ് റിസര്‍ച്ച് പറഞ്ഞിരുന്നു. അദാനി ഗ്രൂപ്പിനെതിരായ അന്വേഷണങ്ങളില്‍ സെബി ചെയര്‍പേഴ്‌സണ്‍ മാധബി പുരി ബുച്ചിന് ചില താത്പര്യങ്ങളുള്ളതായും ഹിന്‍ഡെന്‍ബര്‍ഗ് ആരോപിച്ചിരുന്നു.

Content Highlights: Madhabi Puri Buch Faces Market Scam Case