‘ചിലരുടെ വിചാരം പ്രതിപക്ഷനേതാവ് സഭയ്ക്ക് മീതെയാണെന്നും എന്തും പറയാമെന്നുമാണ്’, രാഹുലിനെതിരെ ഓം ബിർള

ന്യൂഡൽഹി: ലോക്സഭയിൽ തന്റെ നടപടികൾ നിഷ്പക്ഷമാണെന്ന് പ്രതികരിച്ച് സ്പീക്കർ ഓം ബിർള. സ്പീക്കർക്കെതിരെയുള്ള പ്രതിപക്ഷത്തിന്റെ പ്രമേയം ലോക്‌സഭയിൽ പരാജയപ്പെട്ടതിനെത്തുടർന്ന് വ്യാഴാഴ്ച ഓം ബിർള ചുമതലകൾ ഏറ്റെടുത്തപ്പോഴായിരുന്നു പ്രതികരണം. ലോക്‌സഭയിൽ എല്ലാ എംപിമാർക്കും സംസാരിക്കാൻ അവസരം നൽകാൻ താൻ എപ്പോഴും ശ്രമിച്ചിട്ടുണ്ടെന്ന് ബിർള പറഞ്ഞു, പ്രതിപക്ഷ നേതാവ് രാഹുൽ ഗാന്ധിക്കെതിരെ സ്പീക്കർ പരോക്ഷ വിമർശനങ്ങൾ ഉന്നയിക്കുകയും ചെയ്തു. 

"പ്രതിപക്ഷ നേതാവ് സഭയ്ക്ക് മുകളിലാണെന്നും ഏത് വിഷയത്തെക്കുറിച്ചും സംസാരിക്കാമെന്നും ചില അംഗങ്ങൾ അഭിപ്രായപ്പെട്ടിരുന്നു. അങ്ങനെയൊരു പ്രത്യേകാനുകൂല്യം ആർക്കും ലഭ്യമല്ല. സഭ അതിൻ്റെ ചട്ടങ്ങൾക്കനുസരിച്ചാണ് പ്രവർത്തിക്കുന്നത്," ബിർള പറഞ്ഞു. പ്രധാനമന്ത്രിക്കും മന്ത്രിമാർക്കും പോലും പ്രസ്താവനകൾ നടത്താൻ സഭാചട്ടങ്ങൾക്കനുസരിച്ച് നോട്ടീസ് നൽകേണ്ടതുണ്ടെന്നും സ്പീക്കർ കൂട്ടിച്ചേർത്തു.

ബുധനാഴ്ച പ്രതിപക്ഷ പാർട്ടികൾ ഓം ബിർളയ്‌ക്കെതിരെ കൊണ്ടുവന്ന അവകാശലംഘന പ്രമേയം ലോക്‌സഭയിൽ 12 മണിക്കൂർ നീണ്ട ചർച്ചകൾക്കിടയിൽ ശബ്ദവോട്ടോടെ തള്ളിക്കളയുകയായിരുന്നു. ബജറ്റ് സമ്മേളനത്തിൻ്റെ ആദ്യഘട്ടത്തിൽ, രാഹുലിന് സഭയിൽ സംസാരിക്കാൻ അവസരം നൽകാത്തതിൻ്റെ പേരിൽ കോൺഗ്രസ് സ്പീക്കറെ ആവർത്തിച്ച് വിമർശിച്ചിരുന്നു.

ഫെബ്രുവരിയിൽ, മുൻ സൈനിക മേധാവി എം.എം. നരവണെയുടെ പ്രസിദ്ധീകരിക്കാത്ത ഓർമ്മക്കുറിപ്പിനെക്കുറിച്ച് ലോക്‌സഭയിൽ സംസാരിക്കുന്നതിൽ നിന്ന് പ്രതിപക്ഷ നേതാവിനെ തടഞ്ഞത് വലിയ കോലാഹലങ്ങൾക്ക് വഴിവെച്ചു. എട്ട് കോൺഗ്രസ് എംപിമാരുടെ സസ്പെൻഷൻ്റെ ഫലമായി സംഘർഷങ്ങൾ വർധിക്കുകയും സ്പീക്കറെ പുറത്താക്കാനുള്ള അവകാശലംഘന നോട്ടീസ് സമർപ്പിക്കാൻ പ്രതിപക്ഷത്തെ പ്രേരിപ്പിക്കുകയും ചെയ്തു. 118 എംപിമാർ ഈ നോട്ടീസിൽ ഒപ്പുവെച്ചിരുന്നു.

എംപിമാരുടെ മൈക്രോഫോണുകൾ നിയന്ത്രിക്കുന്നു എന്ന ആരോപണങ്ങൾ അടിസ്ഥാനരഹിതമാണെന്ന് ബിർള പറഞ്ഞു. തൻ്റെ കൈവശം മൈക്രോഫോണുകൾ ഓൺ ചെയ്യാനോ ഓഫ് ചെയ്യാനോ ഒരു സ്വിച്ച് ഇല്ലെന്നും സ്പീക്കർ പറഞ്ഞു. സംസാരിക്കാൻ അനുമതി ലഭിച്ച അംഗത്തിന് മാത്രമേ മൈക്രോഫോൺ ഓൺ ചെയ്യാനാകു. ആ അംഗത്തിൻ്റെ മൈക്രോഫോൺ മാത്രമേ പ്രവർത്തിക്കൂ, ബിർള പറഞ്ഞു. സഭാ നടപടികളിൽ പങ്കെടുക്കാൻ മടിക്കുന്നവരെ താൻ എപ്പോഴും പ്രോത്സാഹിപ്പിച്ചിട്ടുണ്ടെന്നും ബിർള കൂട്ടിച്ചേർത്തു.

Content Highlights: Speaker Om Birla asserts impartiality in Lok Sabha proceedings., Opposition motion against the Speaker rejected by voice vote., Clarification on microphone control and parliamentary rules., Emphasis that no member is above the rules of the House.