ജന്തർ മന്തർ ഇനി പ്രതിഷേധ വേദിയല്ല; ഡൽഹിയിൽ മൂന്ന് പുതിയ പ്രതിഷേധ വേദികൾ നിശ്ചയിച്ച് ഡൽഹി പോലീസ്

ന്യൂഡൽഹി: ജന്തർ മന്തറിനെ മാറ്റി, ഡൽഹിയിലെ പ്രതിഷേധത്തിനുള്ള സ്ഥിരം വേദിയായി പുതിയ ഇടങ്ങൾ നിശ്ചയിച്ച് ഡൽഹി പോലീസ്. രാംലീല മൈതാനം, ബുറാരി മൈതാനം, കിഴക്കൻ ഡൽഹിയിലെ സിബിഡി മൈതാനം എന്നിവയാണ് പുതിയ വേദികൾ. രാജ്യത്തെ പിടിച്ചുകുലുക്കിയ നിരവധി സമരങ്ങൾ നടന്ന ജന്തർ മന്തർ ഇനി പ്രതിഷേധവേദിയായിരിക്കില്ല.

പൗരന്മാർക്ക് പ്രതിഷേധങ്ങളും പ്രകടനങ്ങളും സംഘടിപ്പിക്കാനുള്ള അവകാശം വിനിയോഗിക്കാൻ ബദൽ വേദികൾ കണ്ടെത്തുന്നതിന് കേന്ദ്ര ആഭ്യന്തര മന്ത്രാലയം ഒരു സമിതി രൂപവത്കരിച്ചിരുന്നു. ഈ സമിതിയുടെ നിർദേശങ്ങളുടെ അടിസ്ഥാനത്തിലാണ് ഈ മാറ്റം.

എസ്‌ഐആർ വിഷയത്തിൽ മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ്‌കുമാറിന്റെ രാജി ആവശ്യപ്പെട്ട് സിജെപി ഉൾപ്പെടെയുള്ള പ്രതിപക്ഷ രാഷ്ട്രീയപാർട്ടികളുടെയും യുവജന സംഘടനകളുടെയും നേതൃത്വത്തിൽ ജന്തർ മന്തറിനും സമീപത്തുമായി പ്രതിഷേധം നടക്കുകയാണ്. വരുംദിവസങ്ങളിൽ ഇവിടെ പ്രതിഷേധങ്ങൾക്കുള്ള ആസൂത്രണവും നടക്കുന്നുണ്ട്. അതിനിടെയാണ് ജന്തർ മന്തർ പ്രതിഷേധത്തിനുള്ള വേദിയല്ലെന്നുള്ള പ്രഖ്യാപനം വരുന്നത്.

Content Highlights: Delhi Police designates Ramlila Maidan, Burari Ground, and CBD Ground as new protest venues., Jantar Mantar is no longer authorized for protests and demonstrations., The decision follows recommendations from a committee formed by the Union Ministry of Home Affairs.