സിന്ധു നദീജല കരാർ മരവിപ്പിച്ചത് തുടരും; ഭീകരവാദം അവസാനിക്കാതെ വിട്ടുവീഴ്ചയില്ലെന്ന് ഇന്ത്യ

ന്യൂഡൽഹി: സിന്ധു നദീജല കരാർ നിർത്തിവെക്കാനുള്ള മുൻനിലപാടിൽ മാറ്റമില്ലെന്ന് ഇന്ത്യ. പാകിസ്താൻ അതിർത്തി കടന്നുള്ള ഭീകരവാദത്തിന് നൽകുന്ന പിന്തുണ തുടരുന്ന സാഹചര്യത്തിലാണ് കരാർ മരവിപ്പിക്കാൻ ഇന്ത്യ തീരുമാനിച്ചതെന്നും പാകിസ്താന്റെ ഭാഗത്തുനിന്നുള്ള ഭീകരപ്രവർത്തനങ്ങൾ ഇന്ത്യൻ നിലപാടിനെ നേരിട്ട് സ്വാധീനിക്കുന്നുണ്ടെന്നും വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ വാർത്താ സമ്മേളനത്തിൽ പറഞ്ഞു.

പാകിസ്താൻ വിശ്വസനീയമായ രീതിയിൽ ഭീകരവാദത്തിനുള്ള പിന്തുണ അവസാനിപ്പിക്കണമെന്നാണ് ഇന്ത്യയുടെ പ്രധാന ആവശ്യം. കഴിഞ്ഞ വർഷം ഏപ്രിൽ 22-ന് പഹൽഗാമിലുണ്ടായ ഭീകരാക്രമണത്തെത്തുടർന്നാണ് കരാർ മരവിപ്പിക്കുന്നത് ഉൾപ്പെടെയുള്ള നയതന്ത്ര നടപടികൾ ഇന്ത്യ സ്വീകരിച്ചത്.

ഇന്ത്യ ജലത്തെ ഒരു തന്ത്രപരമായ ആയുധമായി ഉപയോഗിക്കുകയാണെന്നാണ് പാക് ആരോപണം. കരാർ പ്രകാരം പാകിസ്താന് ലഭിക്കേണ്ട നിയമപരമായ ജലവിഹിതം തടയുന്നതിനായി ഭീകരവാദം എന്ന ആരോപണത്തെ ഇന്ത്യ ഒരു ഒഴികഴിവായി ഉപയോഗിക്കുകയാണെന്ന് പാകിസ്താൻ വിദേശകാര്യ മന്ത്രാലയ വക്താവ് താഹിർ അന്ദ്രാബി പറഞ്ഞിരുന്നു.

സിന്ധു നദീജല കരാർ മരവിപ്പിച്ചു നിർത്തിയതിനെതിരെ പാകിസ്താൻ നേതാക്കളുടെ ഭാഗത്തുനിന്ന് കടുത്ത ഭാഷയിലുള്ള പ്രതികരണങ്ങളാണ് വരുന്നത്. പ്രശ്നം ഉടൻ പരിഹരിച്ചില്ലെങ്കിൽ ഗുരുതരമായ പ്രത്യാഘാതങ്ങൾ ഉണ്ടാകുമെന്ന് പാകിസ്താൻ ഭീഷണി മുഴക്കി. പാകിസ്താന്റെ ജലവിഹിതം തടയാൻ ശ്രമിക്കുന്നവരുടെ കൈകൾ വെട്ടിക്കളയുമെന്നായിരുന്നു പാകിസ്താൻ കാലാവസ്ഥാ വ്യതിയാന മന്ത്രി മുസാദിക് മാലികിന്റെ ഭീഷണി. ജലത്തെ ഒരു തർക്കവിഷയമാക്കി ഇന്ത്യ മാറ്റുകയാണെന്നും, ആണവായുധങ്ങൾ കൈവശമുള്ള രണ്ട് അയൽരാജ്യങ്ങൾ തമ്മിലുള്ള ബന്ധം ഇതോടെ കൂടുതൽ വഷളാകുമെന്നും പാകിസ്താൻ പ്രതിരോധ മന്ത്രി ഖ്വാജ ആസിഫ് പറ‍ഞ്ഞു.

അന്താരാഷ്ട്ര നിയമപ്രകാരം ഇന്ത്യയുടെ ഈ നടപടി നിലനിൽക്കില്ലെന്നാണ് പാകിസ്താൻ ഉപപ്രധാനമന്ത്രിയും വിദേശകാര്യ മന്ത്രിയുമായ ഇഷാഖ് ദാർ വാദിക്കുന്നത്. 1960-ലെ കരാർ പ്രകാരം ഒരു രാജ്യത്തിന് മാത്രമായി കരാറിലെ വ്യവസ്ഥകൾ ഏകപക്ഷീയമായി റദ്ദാക്കാനോ മരവിപ്പിക്കാനോ കഴിയില്ലെന്ന് ഇഷാഖ് പറഞ്ഞു.

1960-ൽ ഒമ്പത് വർഷത്തെ നീണ്ട ചർച്ചകൾക്ക് ശേഷം ലോകബാങ്കിന്റെ മധ്യസ്ഥതയിലാണ് ഇന്ത്യയും പാകിസ്താനും സിന്ധു നദീജല കരാറിൽ ഒപ്പിട്ടത്. കരാർ പുനരാരംഭിക്കാൻ പാകിസ്താൻ ആവർത്തിച്ച് ആവശ്യപ്പെടുന്നുണ്ടെങ്കിലും, അതിർത്തി കടന്നുള്ള ഭീകരവാദത്തോടുള്ള പാകിസ്താന്റെ സമീപനം മാറാതെ യാതൊരു വിട്ടുവീഴ്ചയ്ക്കും തയ്യാറല്ലെന്ന ഉറച്ച നിലപാടിലാണ് ഇന്ത്യ.

Content Highlights: India maintains the Indus Waters Treaty remains in abeyance due to cross-border terrorism.