തീർഥാടകരുടെ ഇടയിലേക്ക് കാർ പാഞ്ഞുകയറി ഒരാൾ മരിച്ചു; ഡ്രൈവറെ തടഞ്ഞുവെച്ചു, കാറിന് തീയിട്ട് ജനക്കൂട്ടം

അഹമ്മദാബാദ്:ഗുജറാത്തിലെ ഹിമ്മത്‌നഗറിന് സമീപം അമിതവേഗതയിലെത്തിയ കാർ തീർഥാടകരുടെ ഇടയിലേക്ക് പാഞ്ഞുകയറി ഒരാൾ കൊല്ലപ്പെട്ടു. പത്തിലധികം പേർക്ക് പരിക്കേറ്റു. അപകടത്തിന് ശേഷം കടന്നുകളയാൻ ശ്രമിച്ച ഡ്രൈവറെ തടഞ്ഞുവെച്ച ജനക്കൂട്ടം വാഹനം തല്ലിത്തകർക്കുകയും തീയിടുകയും ചെയ്തു.

ഹിമ്മത്‌നഗറിലെ ദോൽഗഢ്-പാടിയ ഹൈവേ ജങ്ഷന് സമീപമാണ് അപകടമുണ്ടായത്. പ്രശസ്തമായ അംബാജി ക്ഷേത്രത്തിലേക്ക് കാൽനടയായി പോവുകയായിരുന്ന ഭക്തരുടെ കൂട്ടത്തിലേക്കാണ് അമിതവേഗതയിലെത്തിയ പുതിയ സ്‌കോർപിയോ എൻ കാർ പാഞ്ഞുകയറിയത്.

അപകടമുണ്ടാക്കിയ ശേഷം ഡ്രൈവർ വാഹനം നിർത്താതെ ഓടിച്ചുപോകാൻ ശ്രമിച്ചു. എന്നാൽ സമീപത്തുണ്ടായിരുന്ന നാട്ടുകാരും തീർഥാടകരും ചേർന്ന് വാഹനം തടഞ്ഞു. തുടർന്ന് രോഷാകുലരായ ജനക്കൂട്ടം വടികൾ ഉപയോഗിച്ച് കാറിന്റെ ചില്ലുകളും ബോണറ്റും തല്ലിത്തകർക്കുകയും ഹൈവേയിൽ വെച്ച് കാറിന് തീയിടുകയും ചെയ്തു.

ഡ്രൈവർ മദ്യപിച്ചിരുന്നതായി നാട്ടുകാർ ആരോപിച്ചു. വാഹനത്തിനുള്ളിൽ നിന്ന് കാലിയായ മദ്യക്കുപ്പി കണ്ടെത്തിയതിന്റെ ദൃശ്യങ്ങളും പുറത്തുവന്നിട്ടുണ്ട്. പൂർണ്ണ മദ്യനിരോധനം നിലനിൽക്കുന്ന ഗുജറാത്തിലാണ് ഈ സംഭവം നടന്നത്.

അപകടത്തെ തുടർന്ന് പ്രദേശത്ത് വൻ സംഘർഷാവസ്ഥ ഉടലെടുത്തു. സ്ഥിതിഗതികൾ ശാന്തമാക്കുന്നതിനായി സമീപ ജില്ലകളിൽ നിന്നുള്ള വൻ പോലീസ് സംഘം സ്ഥലത്തെത്തി. അന്വേഷണം ആരംഭിച്ചു.

ഈ വർഷം 40 ലക്ഷത്തോളം ഭക്തർ എത്തുമെന്ന് പ്രതീക്ഷിക്കുന്ന അംബാജി ക്ഷേത്ര ഉത്സവത്തിന്റെ ഭാഗമായി ലക്ഷക്കണക്കിന് ആളുകളാണ് പാതയോരങ്ങളിലൂടെ കാൽനടയായി സഞ്ചരിക്കുന്നത്. പ്രാദേശിക ഭരണകൂടത്തിന്റെ മുന്നറിയിപ്പ് ബോർഡുകൾ ഉണ്ടായിരുന്നിട്ടും ഈ പാതയിൽ വാഹനങ്ങളുടെ അമിതവേഗതയും അശ്രദ്ധമായ ഡ്രൈവിംഗും പതിവാണെന്ന് തീർഥാടകർ പരാതി ഉന്നയിക്കുന്നുണ്ട്. 

Content Highlights: A speeding car hit walking pilgrims near Himmatnagar in Gujarat, resulting in one death and over ten injuries., The incident occurred on the Dolgadh-Padiya highway while victims were heading to the Ambaji temple., An enraged mob intercepted the vehicle, vandalized it, and set it on fire., Locals alleged the driver was drunk, pointing to empty liquor bottles found inside the car in the dry state of Gujarat., Heavy police deployment was brought in to control the resulting tension in the area.