ഗോവയിലെ നിശാക്ലബിലെ മരണം 25 ആയി; അഗ്നിപടരുന്ന ഞെട്ടിക്കുന്ന ദൃശ്യങ്ങള് പുറത്ത്
പനജി: ഗോവയിലെ അര്പോറ ഗ്രാമത്തിലുള്ള നിശാക്ലബ്ബിലുണ്ടായ തീപിടുത്തത്തില് മരണസംഖ്യ 25 ആയി ഉയര്ന്നു. ഗോവ പോലീസിന്റെ ഔദ്യോഗിക പ്രസ്താവനയിലാണ് മരണസംഖ്യ സ്ഥിരീകരിച്ചത്. പരിക്കേറ്റവര് ആശുപത്രിയില് ചികിത്സയിലാണ്.
ശനിയാഴ്ച അര്ധരാത്രിയോടെയാണ് അപകടമുണ്ടായത്. ബാഗയിലെ ബിര്ച്ച് ബൈ റോമിയോ ലേന് എന്ന ക്ലബ്ബിലാണ് അഗ്നിബാധയുണ്ടായത്. ഗ്യാസ് സിലിണ്ടര് പൊട്ടിത്തെറിച്ച് അപകടമുണ്ടായെന്നാണ് വിലയിരുത്തല്. താഴത്തെ നിലയിലെ അടുക്കളയിലും പരിസരത്തുമാണ് തീ പടര്ന്നത്.
മരിച്ചവരില് ഏറെയും ക്ലബ്ബിലെ ജീവനക്കാരാണ് എന്നാണ് പുറത്ത് വരുന്ന വിവരം. മരിച്ചവരില് മൂന്ന് വിനോദസഞ്ചാരികളുമുണ്ടെന്നാണ് റിപ്പോര്ട്ടുകള്. അപകടത്തില് മൂന്നുപേര് പൊള്ളലേറ്റും മറ്റുള്ളവര് തീപ്പിടിത്തവും പുകയും മൂലം ശ്വാസം മുട്ടിയാണ് മരിച്ചതെന്നാണ് റിപ്പോര്ട്ടുകള്.
അപകടത്തിന്റെ നടക്കുന്ന ദൃശ്യങ്ങള് പ്രചരിക്കുന്നുണ്ട്. കെട്ടിടത്തെ തീ വിഴുങ്ങുകയും കനത്ത പുക രാത്രി ആകാശത്തേക്ക് ഉയരുകയും ചെയ്യുന്നത് വീഡിയോയില് കാണം. തീ അണയ്ക്കാനും നിയന്ത്രണത്തിലാക്കാനും അഗ്നിശമന സേനയും രക്ഷാപ്രവര്ത്തകരും സ്ഥലത്തെത്തി.
ഗോവ മുഖ്യമന്ത്രി പ്രമോദ് സാവന്തും എംഎല്എ മൈക്കല് ലോബോയും സ്ഥലത്തെത്തി. അഗ്നിസുരക്ഷാ മാനദണ്ഡങ്ങള് ലംഘിച്ച് പ്രവര്ത്തിപ്പിച്ചതിന് നിശാക്ലബ്ബിന്റെ നടത്തിപ്പുകാര്ക്കെതിരെ കടുത്ത നടപടിയെടുക്കുമെന്ന് മുഖ്യമന്ത്രി പ്രമോദ് സാവന്ത് അറിയിച്ചു. സംഭവത്തില് വിശദമായ അന്വേഷണം നടത്താന് ഉത്തരവിട്ടിട്ടുണ്ടെന്നും കുറ്റക്കാര്ക്കെതിരെ ശക്തമായ നടപടിയെടുക്കുമെന്നും അദ്ദേഹം പറഞ്ഞു.
ദുരന്തത്തില് താന് അതീവ ദുഃഖിതനാണെന്ന് ലോബോ പറഞ്ഞു. കൊല്ലപ്പെട്ടവരില് മൂന്ന് സ്ത്രീകളും 20 പുരുഷന്മാരും ഉള്പ്പെടുന്നുവെന്നും, ചിലര് വിനോദസഞ്ചാരികളും ഭൂരിഭാഗവും ബേസ്മെന്റില് ജോലി ചെയ്യുന്നവരുമാണെന്നും അദ്ദേഹം സ്ഥിരീകരിച്ചു. ഇത്തരം സംഭവങ്ങള് തടയാന് ഗോവയിലെ എല്ലാ ക്ലബ്ബുകളിലും റെസ്റ്റോറന്റുകളിലും സുരക്ഷാ ഓഡിറ്റുകള് നടത്തേണ്ടതിന്റെ ആവശ്യകത അദ്ദേഹം ഊന്നിപ്പറഞ്ഞു.
ദുരന്തത്തില് മരിച്ചവര്ക്കും പരിക്കേറ്റവര്ക്കും കേന്ദ്ര സര്ക്കാര് ധനസഹായം പ്രഖ്യാപിച്ചു. മരിച്ചവര്ക്ക് രണ്ട് ലക്ഷവും പരിക്കേറ്റവര്ക്ക് 50000 രൂപയും നല്കുമെന്ന് പ്രധാനമന്ത്രി നരേന്ദ്രമോദി അറിയിച്ചു.
Content Highlights: Tragic fire at Goa`s Birch Bay by Romeo Lane nightclub claims 25 lives. Gas cylinder blast suspected. Shocking visuals emerge as rescue operations continue. Strict action promised.