'ക്യാപ്റ്റന്റെ' പാർട്ടി ഇനി സ്റ്റാലിനൊപ്പം; ഡി.എം.കെ സഖ്യത്തിലേക്ക് ഡി.എം.ഡി.കെയും
ചെന്നൈ: തമിഴ്നാട് രാഷ്ട്രീയത്തിൽ നിർണ്ണായകമായ പുതിയ നീക്കം. ഭരണകക്ഷിയായ ഡി.എം.കെയും അന്തരിച്ച നടൻ വിജയകാന്തിന്റെ പാർട്ടിയായ ഡി.എം.ഡി.കെയും കൈകോർക്കുന്നു. വ്യാഴാഴ്ച രാവിലെ ചെന്നൈയിലെ മുഖ്യമന്ത്രിയുടെ വസതിയിൽ വെച്ച് ഡി.എം.ഡി.കെ നേതാവ് പ്രേമലത വിജയകാന്ത് മുഖ്യമന്ത്രി എം.കെ. സ്റ്റാലിനുമായി നടത്തിയ കൂടിക്കാഴ്ചയ്ക്ക് ശേഷമാണ് സഖ്യം ഔദ്യോഗികമായി സ്ഥിരീകരിച്ചത്. 'ദ്രാവിഡ മോഡൽ' ഭരണത്തിന്റെ തുടർച്ചയ്ക്കും തമിഴ്‌നാടിന്റെ സമഗ്രമായ പുരോഗതിക്കുമായി നമുക്ക് ഒരുമിച്ച് സഞ്ചരിക്കാമെന്ന് കൂടിക്കാഴ്ചയ്ക്ക് ശേഷം പ്രേമലത എക്സിൽ കുറിച്ചു.
സഖ്യം 200-ലധികം സീറ്റുകളിൽ വിജയിക്കുമെന്ന് പ്രേമലത ആത്മവിശ്വാസം പ്രകടിപ്പിച്ചു. ക്യാപ്റ്റൻ വിജയകാന്ത് ജീവിച്ചിരുന്നപ്പോൾ തന്നെ ഈ സഖ്യം രൂപപ്പെടേണ്ടതായിരുന്നുവെന്നും പാർട്ടി പ്രവർത്തകർക്ക് ഇതിൽ വലിയ താല്പര്യമുണ്ടായിരുന്നുവെന്നും അവർ കൂട്ടിച്ചേർത്തു. സീറ്റ് വിഭജനത്തെക്കുറിച്ചുള്ള കൂടുതൽ വിവരങ്ങൾ പിന്നീട് പ്രഖ്യാപിക്കുമെന്നും അവർ വ്യക്തമാക്കി.
முத்தமிழறிஞர் தலைவர் கலைஞர் மேல் மாறாத அன்பு கொண்டவர் நமது தலைவர் ‘கேப்டன்’ விஜயகாந்த் அவர்கள்.#DravidianModel ஆட்சி தொடரவும், தமிழ்நாடு அனைத்து வகையிலும் முன்னேறவும் இணைந்து பயணிப்போம்!#வெல்வோம்_ஒன்றாக!#dmdk #dmk pic.twitter.com/GyLN47Pwpp
— Premallatha Vijayakant (@PremallathaDmdk) February 19, 2026
ഡി.എം.ഡി.കെ സഖ്യത്തിലേക്ക് വന്നതിനെ സ്വാഗതം ചെയ്ത സ്റ്റാലിൻ, 'ക്യാപ്റ്റൻ' വിജയകാന്തിന് ആദരവ് അർപ്പിക്കുകയും പ്രേമലതയുടെ വരവ് തമിഴ്‌നാടിന്റെ അഭിവൃദ്ധിക്ക് കാരണമാകുമെന്ന് പ്രത്യാശിക്കുന്നതായും പറഞ്ഞു.
2011 മുതൽ എ.ഐ.എ.ഡി.എം.കെയുടെ ഭാഗമായിരുന്ന ഡി.എം.ഡി.കെ സഖ്യം വിട്ട് ഭരണസഖ്യത്തിന്റെ ഭാഗമാകുന്നത്‌ സ്റ്റാലിന്റെ വലിയൊരു രാഷ്ട്രീയ വിജയമായാണ് വിലയിരുത്തപ്പെടുന്നത്. തിരുച്ചിറപ്പള്ളി, പുതുക്കോട്ടൈ തുടങ്ങിയ മധ്യ തമിഴ്നാട് ജില്ലകളിൽ പാർട്ടിക്ക് ശക്തമായ സ്വാധീനമുണ്ട്. 2011ൽ 29 സീറ്റുകളും 7.9 ശതമാനം വോട്ടും നേടിയിരുന്നെങ്കിലും കഴിഞ്ഞ രണ്ട് നിയമസഭാ തിരഞ്ഞെടുപ്പുകളിലും പാർട്ടിക്ക് സീറ്റുകളൊന്നും നേടാൻ കഴിഞ്ഞിരുന്നില്ല. എങ്കിലും ഡി.എം.കെ നേതൃത്വത്തിലുള്ള സഖ്യത്തിലേക്ക് ഡി.എം.ഡി.കെ വരുന്നത് വോട്ടുവിഹിതം ഏകീകരിക്കാനും എതിർമുന്നണിയുടെ വോട്ടുകളിൽ വിള്ളലുണ്ടാക്കാനും സഹായിക്കുമെന്ന് നിരീക്ഷകർ കരുതുന്നു.
വിജയകാന്ത് ആദ്യമായി വിജയിച്ച കടലൂർ ജില്ലയിലെ വിരുദ്ധാചലം, റിഷിവന്ദ്യം, കള്ളക്കുറിച്ചി, ഉളുന്ദൂർപേട്ട് എന്നിവ ഡി.എം.ഡി.കെയുടെ ഉറച്ച കോട്ടകളായാണ് കണക്കാക്കപ്പെടുന്നത്. ഇതിൽ വിരുദ്ധാചലത്ത് കഴിഞ്ഞ മൂന്ന് പതിറ്റാണ്ടായി ഡി.എം.കെയ്ക്ക് വിജയിക്കാൻ കഴിഞ്ഞിട്ടില്ല എന്നതും ശ്രദ്ധേയമാണ്. 2023 ഡിസംബറിൽ അന്തരിച്ച വിജയകാന്തിന് ഗ്രാമീണ മേഖലകളിൽ ജനങ്ങൾക്കിടയിൽ വലിയ സ്വാധീനമുണ്ടായിരുന്നു. ഡി.എം.ഡി.കെയുടെ ഈ മാറ്റം ഭരണകക്ഷിക്ക് ഈ മേഖലകളിൽ പ്രതീക്ഷ നൽകുന്നു.
അതേസമയം, ഡി.എം.ഡി.കെയുടെ ഈ തീരുമാനത്തെ എ.ഐ.എ.ഡി.എം.കെ രൂക്ഷമായി വിമർശിച്ചു. വിജയകാന്തിന്റെ ആത്മാവ് ഈ തീരുമാനത്തിന് മാപ്പ് നൽകില്ലെന്ന് മുൻ എം.പി. എസ്‌. സെമ്മലൈ പറഞ്ഞു.
Content Highlights: DMK and DMDK form an alliance for the upcoming Tamil Nadu Assembly elections. Learn about the political implications and key constituencies.