ഡൽഹിയിൽ പുകമഞ്ഞ് കനക്കുന്നു: കാഴ്ച മങ്ങിയതുമൂലം ഒറ്റദിവസം റദ്ദാക്കിയത് 110 വിമാനങ്ങൾ

ഡൽഹി: ഡൽഹിയിൽ പുകമഞ്ഞ് ഭീഷണി തുടരുന്നു. പുകമഞ്ഞും മലിനീകരണവും കനത്തതോടെ കാഴ്ചാ പരിധി കുറഞ്ഞതുമൂലം വിമാന സർവീസുകൾ റദ്ദാക്കി. ഡൽഹി ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ (ഐജിഐ) ഞായറാഴ്ച 110 വിമാനങ്ങൾ റദ്ദാക്കിയതായും 370-ലധികം വിമാനങ്ങൾ വൈകിയതായും വിമാനത്താവള അധികൃതർ അറിയിച്ചു. 

ഫ്ലൈറ്റ് റഡാർ 24-ൽ നിന്നുള്ള വിവരങ്ങൾ പ്രകാരം ശരാശരി 26 മിനിറ്റോളം വൈകിയാണ് മിക്ക വിമാനങ്ങളും സർവീസ് നടത്തുന്നത്. പ്രതിദിനം ഏകദേശം 1,300 വിമാന സർവീസുകൾ കൈകാര്യംചെയ്യുന്ന രാജ്യത്തെ ഏറ്റവും വലിയ വിമാനത്താവളമായ ഐജിഐയിൽ സർവീസുകൾ തടസ്സപ്പെടുന്നത് രാജ്യമൊട്ടാകെയുള്ള വിമാനയാത്രക്കാരെ ബാധിക്കും.

നിലവിൽ തടസ്സങ്ങൾ നേരിടുന്നുണ്ടെങ്കിലും വിമാനത്താവളത്തിന്റെ പ്രവർത്തനം സുഗമമാണെന്ന് ഡൽഹി ഇന്റർനാഷണൽ എയർപോർട്ട് ലിമിറ്റഡ് (DIAL) അറിയിച്ചിട്ടുണ്ട്. കഴിഞ്ഞ കുറച്ച് ദിവസങ്ങളായി പുകമഞ്ഞ് ഡൽഹിക്ക് പുറമെ ഉത്തരേന്ത്യയിലെ മറ്റ് പല വിമാനത്താവളങ്ങളെയും പ്രതികൂലമായി ബാധിച്ചിട്ടുണ്ട്.

അതിനിടെ, തലസ്ഥാനത്തെ വായു ഗുണനിലവാരവും ആശങ്കാജനകമാണ്. കേന്ദ്ര മലിനീകരണ നിയന്ത്രണ ബോർഡിന്റെ (സിപിസിബി) കണക്കുകൾ പ്രകാരം ഞായറാഴ്ച രാവിലെ വായു ഗുണനിലവാര സൂചിക 386 രേഖപ്പെടുത്തി. ഇത് 'വളരെ മോശം' എന്ന വിഭാഗത്തിലാണ്.

നഗരത്തിലെ 16 നിരീക്ഷണ കേന്ദ്രങ്ങളിൽ വായു ഗുണനിലവാരം 'അതീവ ഗുരുതരം' എന്ന വിഭാഗത്തിലാണ്. കനത്ത ശൈത്യവും ഡൽഹിക്ക് തിരിച്ചടിയാകുന്നുണ്ട്. നഗരത്തിലെ അന്തരീക്ഷ ഈർപ്പം 91 ശതമാനത്തിലെത്തിയതായും മൂടൽമഞ്ഞിന് സാധ്യതയുള്ളതിനാൽ മഞ്ഞ അലർട്ട് പ്രഖ്യാപിച്ചതായും കാലാവസ്ഥാ വകുപ്പ് അറിയിച്ചു.

മഞ്ഞുവീഴ്ചയെത്തുടർന്ന് കശ്മീർ മേഖലയിലും വിമാന സർവീസുകൾ തടസ്സപ്പെട്ടിരിക്കുകയാണ്. ശ്രീനഗർ അന്താരാഷ്ട്ര വിമാനത്താവളത്തിൽ ഞായറാഴ്ച 11 വിമാനങ്ങൾ റദ്ദാക്കി. കശ്മീരിലെ ഉയർന്ന പ്രദേശങ്ങളിലെ മഞ്ഞുവീഴ്ചയും സമതലങ്ങളിലെ മഴയുമാണ് തടസ്സങ്ങൾക്ക് കാരണമാകുന്നതെന്ന് കാലാവസ്ഥാ വകുപ്പ് ഉദ്യോഗസ്ഥർ പറഞ്ഞു. നിലവിൽ നാല് വിമാനങ്ങൾ സ്റ്റാൻഡ്‌ബൈയിലാണെന്നും കാലാവസ്ഥ മെച്ചപ്പെടുന്നതിനനുസരിച്ച് വിമാനങ്ങൾ പുനരാരംഭിക്കുമെന്നും അധികൃതർ കൂട്ടിച്ചേർത്തു.

Content Highlights: Dense fog and severe air pollution in Delhi have led to flight cancellations and delays. Check the latest updates on travel disruptions and air quality in the capital.