യെച്ചൂരി: ബോദ്ധ്യത്തിന്റെ തെളിച്ചം | വഴിപോക്കൻ
അരിസ്റ്റോട്ടിലിന്റെ വിഖ്യാത വചനം സ്മരിച്ചുകൊണ്ടാണ് ഒരിക്കൽ സീതാറാം യെച്ചൂരി ഒരു സംഭാഷണം തുടങ്ങിയത് : ''രണ്ട് കൂട്ടർക്ക് മാത്രമേ അരാഷ്ട്രീയരാവാൻ കഴിയുകയുള്ളു, ദൈവങ്ങൾക്കും മൃഗങ്ങൾക്കും.'' യെച്ചൂരി ദൈവങ്ങളിൽ വിശ്വസിച്ചിരുന്നില്ല. മനുഷ്യരിലായിരുന്നു അദ്ദേഹത്തിന്റെ വിശ്വാസം. സവിശേഷ ബുദ്ധി ഉപയോഗിച്ച് ചരിത്രം നിർമ്മിക്കുന്ന മനുഷ്യരിലുള്ള ഈ വിശ്വാസമായിരുന്നു യെച്ചൂരിക്ക് കമ്മ്യൂണിസം. ഇടപെടേണ്ടത് ആർക്ക് വേണ്ടിയാണെന്നതിൽ ഒരു തരത്തിലുള്ള സംശയവും യെച്ചൂരിക്കുണ്ടായിരുന്നില്ല. 1970 കളിൽ ഡെൽഹിയിൽ സെന്റ് സ്റ്റീഫൻസ് കോളേജിൽ ബിരുദത്തിന് പഠിക്കുമ്പോൾ യെച്ചൂരിയും കുറച്ച് സുഹൃത്തുക്കളും തീവ്ര ഇടതുപക്ഷ പാതയിലായിരുന്നു. അന്ന് കോളേജിന്റെ മേൽക്കൂരയിൽ കോറിയിട്ട മുദ്രാവാക്യങ്ങൾ ''ചൈനയുടെ വഴി നമ്മുടെ വഴി, ചെയർമാൻ മാവോ നമ്മുടെ ചെയർമാൻ'' എന്നായിരുന്നു. കുടുംബ പാരമ്പര്യം സമ്മാനിച്ച പൂണൂൽ ഊരിമാറ്റി ഹാംഗറിൽ കൊളുത്തിയിട്ടതും ഈ കാലത്താണ്. യെച്ചൂരി പിന്നീട് എസ്എഫ്ഐയിലേക്കും സിപിഎമ്മിലേക്കും വന്നു. നക്സലുകളുടെയും മാവോയിസ്റ്റുകളുടെയും പോരാട്ട വീര്യം ഉൾക്കൊള്ളുമ്പോഴും അതല്ല ഇന്ത്യൻ കമ്മ്യൂണിസത്തിന്റെ വഴിയെന്ന് ചൂണ്ടിക്കാട്ടാൻ യെച്ചൂരിക്ക് കഴിഞ്ഞത് പണ്ടൊരിക്കൽ അതേ വഴിയിലൂടെ നടന്ന അനുഭവത്തിന്റെ വെളിച്ചത്തിലായിരുന്നു.
നിലപാടുകളിലും ബോദ്ധ്യങ്ങളിലുമുള്ള തെളിച്ചമായിരുന്നു യെച്ചൂരിയുടെ മുഖമുദ്ര. മാർക്സിസ്റ്റ് നയങ്ങളും പദ്ധതികളും യെച്ചൂരി വിശദീകരിക്കുമ്പോൾ കേട്ടിരിക്കുന്നവർക്ക് അത് മനസ്സിലാവുമായിരുന്നു. കാര്യങ്ങൾ അറിയാവുന്നവർ സംസാരിക്കുമ്പോഴാണ് ഈ വ്യക്തതയും തെളിച്ചവുമുണ്ടാവുക. ഒരുപക്ഷേ, പി സുന്ദരയ്യയുടെ ശിക്ഷണമായിരുന്നിരിക്കണം ഈ തെളിച്ചത്തിലേക്ക് യെച്ചൂരിയെ നയിച്ചത്. രണ്ടുകൊല്ലം മുമ്പ് കൊച്ചിയിൽ സിപിഎമ്മിന്റെ സംസ്ഥാന സമ്മേളനത്തിനിടെ നടത്തിയ അഭിമുഖം ഓർമ്മ വരുന്നു. മുഖ്യമന്ത്രി പിണറായി വിജയൻ അവതരിപ്പിച്ച നവ കേരള ദർശന രേഖയായിരുന്നു കൊച്ചി സമ്മേളനത്തിലെ സുപ്രധാന വിഷയം. വിദ്യാഭ്യാസ മേഖലയിൽ സ്വകാര്യ സംരംഭങ്ങൾക്ക് പ്രോത്സാഹനം നൽകുന്ന ഈ ദർശന രേഖ വ്യാപകമായി ചർച്ച ചെയ്യപ്പെട്ടു. അഭിമുഖത്തിന്റെ കേന്ദ്ര ബിന്ദുവും ഈ രേഖയായിരുന്നു. സ്വകാര്യസർവ്വകലാശാലകൾ വരുമ്പോൾ സംവരണം ഉൾപ്പെടെയുള്ള സാമൂഹ്യ നീതി അട്ടിമറിക്കപ്പെടില്ലേ എന്ന ചോദ്യത്തിന് യെച്ചൂരിക്ക് കൃത്യമായ മറുപടിയുണ്ടായിരുന്നു. സംവരണം ഉറപ്പാക്കാൻ നിയമം കൊണ്ടുവരുമെന്നും സാമൂഹ്യ നീതി ഉറപ്പാക്കുമെന്നും യെച്ചൂരി പറഞ്ഞു. സ്വകാര്യ മേഖലയുടെ ലക്ഷ്യം ലാഭമാണെന്നിരിക്കെ സംവരണം അനുശാസിക്കുന്ന സംരംഭങ്ങളിൽ മുതൽ മുടക്കാൻ വ്യവസായികൾ തയ്യാറാവുമോ എന്ന ചോദ്യത്തിനും യെച്ചൂരിക്ക് മറുപടിയുണ്ടായിരുന്നു. ലാഭം മാത്രം നോക്കി നടത്തുന്ന വിദ്യാഭ്യാസ കേന്ദ്രങ്ങൾ ഉയർന്ന നിലവാരത്തിലേക്കെത്താനുള്ള സാദ്ധ്യത കുറവാണെന്നും സാമൂഹ്യ യാഥാർത്ഥ്യങ്ങൾ സ്വകാര്യ സംരംഭകർ മനസ്സിലാക്കണമെന്നും യെച്ചൂരി പറഞ്ഞു. സമൂഹത്തോടുള്ള ധാർമ്മിക ബാദ്ധ്യതകളിൽ നിന്ന് ഒളിച്ചോടുന്നതെങ്ങിനെയാണെന്നും യെച്ചൂരി ചോദിച്ചു. അതേ സമയം തന്നെ
സ്വകാര്യ സംരംഭകരെ പ്രോത്സാഹിപ്പിക്കുന്ന നയം കാലത്തിന്റെ ചുവരെഴുത്തുകൾ കൃത്യമായി വായിക്കാൻ സിപിഎമ്മിനാവുന്നതുകൊണ്ടാണെന്നും യെച്ചൂരി ചൂണ്ടിക്കാട്ടി. സമൂർത്ത സാഹചര്യങ്ങളോടുള്ള സമൂർത്തമായ പ്രതികരണമാണ് മാർക്സിസം എന്ന് ഓർമ്മിപ്പിക്കുകയും ചെയ്തു യെച്ചൂരി.
Content Highlights: cpm general secretary Sitaram Yechury nomore