ജാനിസ് ഷാക്കോവ്‌സ്‌കിയുമായി നടത്തിയ കൂടിക്കാഴ്ച ഇന്ത്യ വിരുദ്ധനിലപാടിന്റെ തെളിവ്-രാഹുലിനെതിരെ ബിജെപി

ന്യൂഡൽഹി: കോൺഗ്രസ് നേതാവ് രാഹുൽ ഗാന്ധിയും യു.എസ്. പാർലമെന്റ് അംഗം ജാനിസ് ഷാക്കോവ്‌സ്‌കിയും തമ്മിൽ 2024-ൽ നടന്ന കൂടിക്കാഴ്ചയെ രൂക്ഷമായി വിമർശിച്ച് ബിജെപി. ഇന്ത്യ വിരുദ്ധ നിലപാടിന്റെ തെളിവാണ് ഈ കൂടിക്കാഴ്ചയെന്ന് ബിജെപി വെള്ളിയാഴ്ച ആരോപിച്ചു. 2020-ലെ ഡൽഹി കലാപക്കേസിലെ പ്രതി ഉമർ ഖാലിദിനെ ജയിലിൽനിന്ന് മോചിപ്പിക്കണമെന്ന് കേന്ദ്രസർക്കാരിനോട് ഷാക്കോവ്‌സ്‌കി ഈയാഴ്ച ആവശ്യപ്പെട്ടതിനുപിന്നാലെയാണ് രാഹുലിനെതിരെ ബിജെപി രംഗത്തെത്തിയത്.

രാഹുലും ജാനിസ് ഷാക്കോവ്‌സ്‌കിയും മറ്റൊരു യു.എസ്. പാർലമെന്റ് അംഗമായ ഇൽഹാൻ ഉമറും ഒരുമിച്ചുള്ള ചിത്രം ബിജെപി ദേശീയ വക്താവ് പ്രദീപ് ഭണ്ഡാരി പങ്കുവെച്ചിരുന്നു. "പുറത്ത് ഇന്ത്യ വിരുദ്ധ പ്രചാരണങ്ങൾ നടക്കുമ്പോഴെല്ലാം പിന്നിൽ ഒരു പേര് ആവർത്തിച്ച് പ്രത്യക്ഷപ്പെടുന്നു... ഇന്ത്യയെ ദുർബലപ്പെടുത്താനും തിരഞ്ഞെടുക്കപ്പെട്ട സർക്കാരിനെ അപകീർത്തിപ്പെടുത്താനും ഇന്ത്യയുടെ ഭീകരവിരുദ്ധ നിയമങ്ങൾ ദുർബലപ്പെടുത്താനും ആഗ്രഹിക്കുന്നവർ ആ വ്യക്തിയുമായി ബന്ധപ്പെട്ടിരിക്കുന്നതായി കാണുന്നു," രാഹുൽ ഗാന്ധിയെ സൂചിപ്പിച്ചുകൊണ്ട് പ്രദീപ് ഭണ്ഡാരി കുറിച്ചു.

2024 ലെ രാഹുലിന്റെ യു.എസ്. സന്ദർശനവും ജാനിസ് ഷാക്കോവ്‌സ്‌കിയുമായും ഇൽഹാൻ ഉമറുമായുമുള്ള കൂടിക്കാഴ്ചയും 2025 ജനുവരിയിൽ അവതരിപ്പിച്ച കോംബാറ്റിങ് ഇന്റർനാഷണൽ ഇസ്ലാമോഫോബിയ ആക്ടും തമ്മിൽ ബന്ധമുണ്ടെന്നും ഭണ്ഡാരി തന്റെ പോസ്റ്റിൽ ആരോപിച്ചു.

ഇസ്ലാമോഫോബിയ നിരീക്ഷിക്കാനും നേരിടാനുമുള്ള ഒരു ഓഫീസ് സ്ഥാപിക്കാനും ബന്ധപ്പെട്ട വിഷയങ്ങൾ കൈകാര്യം ചെയ്യാനുമായാണ് ബിൽ കൊണ്ടുവന്നത്. വിദേശ രാജ്യങ്ങളിലെ മനുഷ്യാവകാശങ്ങളെയും മതസ്വാതന്ത്ര്യത്തെയും കുറിച്ചുള്ള വാർഷിക റിപ്പോർട്ടുകളിൽ ഇസ്ലാമോഫോബിയയെയും സർക്കാർ നിയന്ത്രണത്തിലുള്ള മാധ്യമങ്ങളിലെ മുസ്ലിം വിരുദ്ധ പ്രചാരണങ്ങളെയും കുറിച്ചുള്ള വിവരങ്ങൾ ഉൾപ്പെടുത്തണമെന്നും ബില്ലിൽ നിർദേശിച്ചിരുന്നു.

ഡിസംബർ 30-ന് ജാനിസ് ഷാക്കോവ്‌സ്‌കി എഴുതിയ കത്തിൽ ഖാലിദിന് ജാമ്യം നൽകാനും അന്താരാഷ്ട്ര നിയമങ്ങൾക്കനുസൃതമായി വിചാരണ ഉറപ്പാക്കാനും ഇന്ത്യൻ സർക്കാരിനോട് ആവശ്യപ്പെട്ടു. എട്ട് യു.എസ്. പാർലമെന്റ് അംഗങ്ങളും ഖാലിദിന്റെ സഹപ്രതികൾക്കും സമാനമായ ന്യായമായ പരിഗണന ഉറപ്പാക്കാൻ സർക്കാരിനോട് ആവശ്യപ്പെട്ടിട്ടുണ്ട്. കത്തിൽ ഒപ്പിട്ടവരിൽ ഒരാളായ ഡെമോക്രാറ്റ് ജിം മക്ഗവേൺ, അതിന്റെ ഒരു പകർപ്പ് എക്സിൽ പോസ്റ്റ് ചെയ്യുകയും ഈ മാസം ആദ്യം ഇന്ത്യയിൽ വിചാരണ കൂടാതെ അഞ്ചു വർഷത്തിലേറെയായി ജയിലിൽ കഴിയുന്ന ഉമർ ഖാലിദിന്റെ മാതാപിതാക്കളെ കണ്ടു എന്ന് പറയുകയും ചെയ്തു.

ഖാലിദിനെതിരെ ഭീകരവാദക്കുറ്റം ചുമത്താൻ ഉപയോഗിച്ച തെളിവുകൾ ദുർബലമാണ് എന്നും മനുഷ്യാവകാശ ഗ്രൂപ്പുകളുടെ സ്വതന്ത്ര അന്വേഷണങ്ങളിൽ ഖാലിദിനെ ഭീകരവാദ പ്രവർത്തനങ്ങളുമായി ബന്ധിപ്പിക്കുന്ന തെളിവുകൾ കണ്ടെത്താനായില്ല എന്നും കത്തിൽ പറഞ്ഞു.

സിവിൽ, രാഷ്ട്രീയ അവകാശങ്ങൾക്കായുള്ള അന്താരാഷ്ട്ര ഉടമ്പടിയിൽ ഒപ്പിട്ട രാജ്യമെന്ന നിലയിൽ, ന്യായമായ സമയത്തിനുള്ളിൽ വിചാരണ നടത്താനുള്ള വ്യക്തികളുടെ അവകാശം ഉയർത്തിപ്പിടിക്കുകയോ അവരെ മോചിപ്പിക്കുകയോ ചെയ്യണം എന്നും ഇന്ത്യയോട് ആവശ്യപ്പെട്ടു.

അതേസമയം, ഖാലിദിന്റെ ജാമ്യാപേക്ഷ സുപ്രീം കോടതിയിലെത്തിയിട്ടുണ്ട്. ജസ്റ്റിസ് അരവിന്ദ് കുമാർ, ജസ്റ്റിസ് എൻ.വി. അൻജരിയ എന്നിവരടങ്ങിയ ബെഞ്ച് ഡിസംബറിൽ വാദം കേട്ട് വിധി സ്റ്റേ ചെയ്തിരുന്നു.

Content Highlights: BJP criticizes Rahul Gandhi`s meeting with US lawmakers, alleging an anti-India agenda. The controversy links to demands for Umar Khalid`s release.