നീറ്റ് പരീക്ഷയോ അതോ യുദ്ധമോ? സൈനിക തലത്തിലുള്ള സുരക്ഷാ സന്നാഹങ്ങൾക്കെതിരെ അണ്ണാമലൈ

ന്യൂഡൽഹി: ജൂൺ 21-ന് നടക്കാനിരിക്കുന്ന നീറ്റ്-യുജി പുനഃപരീക്ഷയ്ക്കായി ഏർപ്പെടുത്തിയിരിക്കുന്ന അമിതമായ സുരക്ഷാ സന്നാഹങ്ങളെ വിമർശിച്ച് തമിഴ്‌നാട് മുൻ ബിജെപി സംസ്ഥാന അധ്യക്ഷൻ കെ. അണ്ണാമലൈ. സിആർപിഎഫ്, സിഐഎസ്എഫ് കേന്ദ്ര സേനകളുടെ സാന്നിധ്യവും പ്രധാനമന്ത്രിയുടെ ഓഫീസിന്റെ നേരിട്ടുള്ള നിരീക്ഷണവും ഉൾപ്പെടെയുള്ള സംവിധാനങ്ങൾ സൈനിക തലത്തിലുള്ള സോഫ്റ്റ്‌വെയർ വാങ്ങുന്നതിന് തുല്യമാണെന്ന് അദ്ദേഹം പരിഹസിച്ചു. ഇത്തരം കടുത്ത നിയന്ത്രണങ്ങൾ പരീക്ഷാർഥികളുടെ മാനസിക സമ്മർദ്ദം വർദ്ധിപ്പിക്കാൻ മാത്രമേ ഉപകരിക്കൂ എന്നും അദ്ദേഹം എക്സിൽ പങ്കുവെച്ച കുറിപ്പിൽ വ്യക്തമാക്കി.

പരീക്ഷാ പേപ്പറുകൾ സുരക്ഷിതമായി എത്തിക്കുന്നതിനായി വ്യോമസേനയുടെ സഹായവും പരീക്ഷാ കേന്ദ്രങ്ങളിൽ ആർട്ടിഫിഷ്യൽ ഇന്റലിജൻസ് അധിഷ്ഠിത നാലുതല സിസിടിവി നിരീക്ഷണവും ഏർപ്പെടുത്തിയിട്ടുണ്ട്. ഇതിനുപുറമെ, ബയോമെട്രിക്, ഫേഷ്യൽ റെക്കഗ്നിഷൻ സംവിധാനങ്ങൾ, ഒന്നിലധികം ഘട്ടങ്ങളായുള്ള ദേഹപരിശോധന എന്നിവയും പരീക്ഷാ കേന്ദ്രങ്ങളിൽ നടപ്പിലാക്കും. ചോദ്യപേപ്പർ ചോർച്ച തടയാൻ സർക്കാർ നടത്തുന്ന ശ്രമങ്ങളെ വിദ്യാർഥികൾ അഭിനന്ദിക്കുമെങ്കിലും, ഇത്തരം കടമ്പകൾ മറികടന്ന് പരീക്ഷാ ഹാളിലെത്തുന്നത് അവരിൽ വലിയ ഭാരമുണ്ടാക്കുമെന്ന് അണ്ണാമലൈ ചൂണ്ടിക്കാട്ടി.

വിദ്യാർഥികളുടെ പരീക്ഷാ സമ്മർദ്ദം കുറയ്ക്കുക എന്ന ലക്ഷ്യത്തോടെ കൊണ്ടുവന്ന ദേശീയ വിദ്യാഭ്യാസ നയത്തിന്റെ ഉദ്ദേശ്യശുദ്ധിക്ക് വിരുദ്ധമാണ് ഈ നടപടികളെന്നും അദ്ദേഹം വിമർശിച്ചു. പരീക്ഷാ സമയം 180 മിനിറ്റിൽ നിന്ന് 195 മിനിറ്റായി വർദ്ധിപ്പിച്ചത് സുരക്ഷാ പരിശോധനകൾക്ക് വേണ്ടിയാണെങ്കിലും അത് വിദ്യാർഥികളുടെ ഉത്കണ്ഠ വർദ്ധിപ്പിക്കും. കൂടാതെ, അഡ്മിറ്റ് കാർഡുകൾ ഡൗൺലോഡ് ചെയ്യുന്നതിൽ നേരിടുന്ന സാങ്കേതിക തടസ്സങ്ങൾ പരിഹരിക്കാൻ അധികൃതർ ഉടനടി ഇടപെടണമെന്നും ലോജിസ്റ്റിക് പ്രശ്നങ്ങൾ വിദ്യാർഥികളെ കൂടുതൽ വലയ്ക്കരുതെന്നും അദ്ദേഹം ആവശ്യപ്പെട്ടു.

അണ്ണാമലൈയുടെ വിമർശനങ്ങൾക്ക് മറുപടിയുമായി ബിജെപി നേതാവ് സെൽവകുമാർ രംഗത്തെത്തി. നീറ്റ് ചോദ്യപേപ്പർ ചോർച്ചാ വിഷയം പ്രധാനമന്ത്രി നരേന്ദ്ര മോദി നേരിട്ട് നിരീക്ഷിക്കുന്നുണ്ടെന്നും വിദ്യാഭ്യാസ മന്ത്രി ധർമ്മേന്ദ്ര പ്രധാൻ പ്രശ്നപരിഹാരത്തിനായി കഴിഞ്ഞ ഒരു മാസമായി രാപ്പകൽ പ്രവർത്തിക്കുകയാണെന്നും അദ്ദേഹം പറഞ്ഞു. പ്രതിരോധം, വാർത്താവിനിമയം, വിദ്യാഭ്യാസം എന്നീ മന്ത്രാലയങ്ങളുമായി കൂടിയാലോചിച്ചാണ് ഈ സുരക്ഷാ ചട്ടക്കൂട് തയ്യാറാക്കിയതെന്നും ഇത് സുപ്രീം കോടതിയുടെ മുൻപാകെ സമർപ്പിച്ചിട്ടുണ്ടെന്നും അദ്ദേഹം വ്യക്തമാക്കി.

സുരക്ഷാ പരിശോധനകൾക്കായി വിദ്യാർഥികൾക്ക് 15 മിനിറ്റ് അധികമായി ചെലവഴിക്കേണ്ടി വരുന്നത് ഒരു താത്കാലിക നടപടി മാത്രമാണെന്ന് സെൽവകുമാർ അറിയിച്ചു. വരും കാലങ്ങളിൽ പരീക്ഷകൾ പൂർണ്ണമായും കമ്പ്യൂട്ടർ അധിഷ്ഠിതമായി മാറ്റുന്നതോടെ ഇത്തരം കടുത്ത സുരക്ഷാ പരിശോധനകൾ ഒഴിവാകുമെന്നും അദ്ദേഹം പറഞ്ഞു. ചോദ്യ ചോർച്ചയില്ലാത്ത സുരക്ഷിതമായ അന്തരീക്ഷം ഉറപ്പാക്കാനാണ് ഈ ഒറ്റത്തവണ ക്രമീകരണങ്ങൾ നടത്തുന്നതെന്നും അദ്ദേഹം കൂട്ടിച്ചേർത്തു.

Content Highlights: Ex-BJP leader K Annamalai criticizes the intense security for the June 21, 2026, NEET-UG re-exam.