ഭീകരവാദ ഫണ്ടിങ്, കള്ളപ്പണം വെളുപ്പിക്കല്; അൽ-ഫലാഹ് സർവകലാശാലാ സ്ഥാപകന് ജവാദ് അഹമ്മദ് സിദ്ദിഖി അറസ്റ്റില്
ന്യൂഡൽഹി: അൽ-ഫലാഹ് സർവകലാശാലാ സ്ഥാപകനും അൽ-ഫലാഹ് ഗ്രൂപ്പിന്റെ ചെയർമാനുമായ ജവാദ് അഹമ്മദ് സിദ്ദിഖിയെ എൻഫോഴ്സ്മെന്റ് ഡയറക്ടറേറ്റ് (ഇഡി) ചൊവ്വാഴ്ച അറസ്റ്റ് ചെയ്തു. ഭീകരവാദ ഫണ്ടിങ് ബന്ധങ്ങൾ ഉണ്ടാകാനുള്ള സാധ്യത കൂടി പരിശോധിക്കുന്ന കള്ളപ്പണം വെളുപ്പിക്കൽ കേസിലാണ് സിദ്ദിഖിയെ അറസ്റ്റ് ചെയ്തതെന്ന് അധികൃതർ അറിയിച്ചു.
നവംബർ 10 ന് ചെങ്കോട്ടയ്ക്ക് സമീപമുണ്ടായ സ്ഫോടനവുമായി ബന്ധമുള്ള ഒരു 'വൈറ്റ് കോളർ' ഭീകരവാദ ഘടകത്തിന്റെ പ്രഭവകേന്ദ്രമാണെന്ന് കരുതപ്പെടുന്ന അൽ-ഫലാഹ് സർവകലാശാലയെക്കുറിച്ചുള്ള കർശനമായ നിരീക്ഷണങ്ങൾക്കിടയിലാണ് ഈ നടപടി. സിദ്ദിഖിയെ ചോദ്യം ചെയ്തുവരികയാണെന്നും അദ്ദേഹത്തിന്റെ വസതിയിൽ തിരച്ചിൽ നടക്കുകയാണെന്നും നേരത്തെ റിപ്പോർട്ടുണ്ടായിരുന്നു. സർവകലാശാലാ പരിസരത്തും അൽ-ഫലാഹ് ഗ്രൂപ്പുമായി ബന്ധപ്പെട്ട മറ്റ് സ്ഥലങ്ങളിലും നടത്തിയ തിരച്ചിലിൽ ശേഖരിച്ച തെളിവുകൾ വിശദമായി പരിശോധിച്ചതിനെ തുടർന്നാണ് അറസ്റ്റെന്ന് ഇഡി ഉദ്യോഗസ്ഥർ പറഞ്ഞു.
വിദ്യാർഥികളെയും രക്ഷിതാക്കളെയും തെറ്റിധരിപ്പിക്കാനായി അൽ-ഫലാഹ് സർവകലാശാല വ്യാജ നാക് അക്രെഡിറ്റേഷൻ അവകാശവാദങ്ങൾ ഉന്നയിക്കുകയും യുജിസി നിയമത്തിലെ സെക്ഷൻ 12 (ബി) പ്രകാരം അംഗീകാരമുണ്ടെന്ന് തെറ്റായി പ്രചരിപ്പിക്കുകയും ചെയ്തുവെന്ന് ആരോപിച്ച് ഡൽഹി പോലീസ് ക്രൈംബ്രാഞ്ച് രണ്ട് എഫ്ഐആറുകൾ രജിസ്റ്റർ ചെയ്തതിനെ തുടർന്നാണ് ഇഡി അന്വേഷണം ആരംഭിച്ചതെന്ന് വൃത്തങ്ങൾ അറിയിച്ചു. സർവകലാശാല ഒരു സംസ്ഥാന സ്വകാര്യ സർവകലാശാല എന്ന നിലയിൽ സെക്ഷൻ 2 (എഫ്) പ്രകാരം മാത്രമാണ് ലിസ്റ്റ് ചെയ്തിട്ടുള്ളതെന്നും 12 (ബി) പ്രകാരമുള്ള ഗ്രാന്റുകൾക്ക് ഒരിക്കലും അർഹത നേടിയിട്ടില്ലെന്നും പിന്നീട് യുജിസി വ്യക്തമാക്കി.
സിദ്ദിഖി സ്ഥാപകനും മാനേജിങ് ട്രസ്റ്റിയുമായി 1995ൽ സ്ഥാപിതമായ അൽ-ഫലാഹ് ചാരിറ്റബിൾ ട്രസ്റ്റാണ് അൽ-ഫലാഹ് ഗ്രൂപ്പിന് കീഴിലുള്ള എല്ലാ വിദ്യാഭ്യാസ സ്ഥാപനങ്ങളുടെയും ഉടമസ്ഥാവകാശവും സാമ്പത്തിക ഏകീകരണവും നടത്തുന്നതെന്ന് വൃത്തങ്ങൾ അറിയിച്ചു. 1990 മുതൽ ട്രസ്റ്റും അതിൻ്റെ സ്ഥാപനങ്ങളും അതിവേഗം വളർന്നെങ്കിലും, ഈ വളർച്ചയ്ക്ക് അനുസൃതമായ സാമ്പത്തിക രേഖകൾ ഇല്ലെന്ന് അന്വേഷണ ഉദ്യോഗസ്ഥർ പറയുന്നു.
സർവകലാശാലയിലും പ്രധാന ഉദ്യോഗസ്ഥരുടെ താമസസ്ഥലങ്ങളിലും നടത്തിയ തിരച്ചിലിൽ, കുറ്റകൃത്യത്തിലൂടെ സമ്പാദിച്ച കോടിക്കണക്കിന് രൂപ ഉണ്ടാക്കുകയും വകമാറ്റുകയും ചെയ്തതായി കണ്ടെത്തി. ട്രസ്റ്റിൽ നിന്നുള്ള ഫണ്ടുകൾ കുടുംബത്തിൻ്റെ ഉടമസ്ഥതയിലുള്ള സ്ഥാപനങ്ങളിലേക്ക് മാറ്റിയതിനും നിർമ്മാണ, കാറ്ററിങ് കരാറുകൾ സിദ്ദിഖിയുടെ ഭാര്യക്കും മക്കൾക്കും ബന്ധമുള്ള സ്ഥാപനങ്ങൾക്ക് നൽകിയതിനും അന്വേഷണ ഉദ്യോഗസ്ഥർക്ക് തെളിവുകൾ ലഭിച്ചു. 48 ലക്ഷം രൂപയും ഡിജിറ്റൽ ഉപകരണങ്ങളും നിരവധി രേഖകളും ഇഡി പിടിച്ചെടുത്തു. മറ്റ് നിരവധി നിയമലംഘനങ്ങളെക്കുറിച്ചുള്ള സംശയങ്ങൾക്കൊപ്പം, ഗ്രൂപ്പുമായി ബന്ധമുള്ള നിരവധി വ്യാജ കമ്പനികളെയും അന്വേഷണ ഏജൻസി തിരിച്ചറിഞ്ഞിട്ടുണ്ട്.
അന്വേഷണത്തിൽ കണ്ടെത്തിയ തെളിവുകൾ പ്രകാരം, സ്ഥാപനത്തിൻ്റെ സാമ്പത്തിക കാര്യങ്ങളിലും തീരുമാനങ്ങളെടുക്കുന്നതിലും സിദ്ദിഖിയുടെ പൂർണ്ണനിയന്ത്രണത്തിൽ ഫണ്ട് വകമാറ്റൽ, പല തട്ടുകളായി പണം കൈമാറൽ, ട്രസ്റ്റ് ഫണ്ടുകളുടെ ദുരുപയോഗം എന്നിവ വ്യക്തമായി നടന്നിട്ടുണ്ടെന്ന് വൃത്തങ്ങൾ അറിയിച്ചു. സാമ്പത്തിക അന്വേഷണത്തോടൊപ്പം സ്ഫോടനവുമായി ബന്ധമുള്ള വ്യക്തികളിലേക്ക് വെളുപ്പിച്ച പണത്തിന്റെ ഏതെങ്കിലും ഭാഗം എത്തിയിട്ടുണ്ടോ എന്നും ഇഡി പരിശോധിക്കുന്നുണ്ട്. ഈ വഴിക്കുള്ള അന്വേഷണം തുടരുകയാണ്. കുറ്റകൃത്യത്തിലൂടെ പണം സമ്പാദിക്കുന്നതിലും അത് പല തട്ടുകളായി കൈമാറുന്നതിലും സിദ്ദിഖിയുടെ പങ്ക് വ്യക്തമായതിനെ തുടർന്ന് നിയമപരമായ നടപടിക്രമങ്ങൾ പാലിച്ചാണ് അറസ്റ്റ്.
Content Highlights: Enforcement Directorate arrests Javad Ahmed Siddiqui, Chairman of Al-Falah Group and founder of Al-Falah University, in a money laundering case linked to terror funding