പഞ്ചാബ് തിരഞ്ഞെടുപ്പ്: 40 സ്ഥാനാർഥികളുടെ ആദ്യ പട്ടിക പുറത്തുവിട്ട് എഎപി; ഭഗവന്ത് മൻ ധൂരിയിൽ മത്സരിക്കും

ന്യൂഡൽഹി: 2027-ലെ പഞ്ചാബ് നിയമസഭാ തിരഞ്ഞെടുപ്പിന് മുന്നോടിയായി 40 സ്ഥാനാർഥികളുടെ ആദ്യ പട്ടിക പ്രഖ്യാപിച്ച് ആം ആദ്മി പാർട്ടി (എഎപി). ജനങ്ങളുടെ താൽപര്യവും സർവേകളും പരിഗണിച്ചാണ്  സ്ഥാനാർഥികളെ തിരഞ്ഞെടുത്തതെന്ന് പഞ്ചാബ് മുഖ്യമന്ത്രി ഭഗവന്ത് മൻ വ്യക്തമാക്കി. ശനിയാഴ്ച നടന്ന പാർട്ടിയുടെ പൊളിറ്റിക്കൽ അഫയേഴ്സ് കമ്മിറ്റി (പിഎസി) യോഗത്തിലാണ് സ്ഥാനാർഥി നിർണയം സംബന്ധിച്ച് ചർച്ച നടന്നത്.

മുഖ്യമന്ത്രി ഭഗവന്ത് മൻ തന്റെ മണ്ഡലമായ ധൂരിയിൽ മത്സരിക്കും. നിയമസഭാ സ്പീക്കർ കുൽതാർ സിങ് സന്ധ്വാൻ കോട്കാപുരയിൽനിന്നും നിലവിൽ ജയിലിൽ കഴിയുന്ന മന്ത്രി സഞ്ജീവ് അറോറ ലുധിയാന വെസ്റ്റിൽനിന്നും ജനവിധി തേടും. കൂടാതെ, മന്ത്രിമാരായ കുൽദീപ് സിങ് ധലിവാൾ (അജ്നാല), ബൽകാർ സിങ് (കർതാർപൂർ), ജയ് കിഷൻ സിങ് റൗറി (ഗഡ്ശങ്കർ), കുൽവന്ത് സിങ് (എസ്.എ.എസ്. നഗർ), ലാഭ് സിങ് ഉഗോകെ (ഭദൗർ) എന്നിവരും ആദ്യ പട്ടികയിൽ ഇടം നേടിയിട്ടുണ്ട്.

അമൻദീപ് കൗർ അറോറ (മോഗ), അമൻഷേർ സിങ് (ബറ്റാല), ഇന്ദർബീർ സിങ് നിജ്ജർ (അമൃത്സർ സൗത്ത്), ഹർമീത് സിങ് സന്ധു (തർൺ തരൺ), സർവൻ സിങ് ധുൻ (ഖേം കരൺ), ഇന്ദർജീത് കൗർ മാൻ (നകോദർ), കരംബീർ സിങ് ഘുമൻ (ദസൂയ), ജസ്ബീർ സിങ് രാജാ ഗിൽ (ഉർമർ) എന്നിവരാണ് പട്ടികയിലെ മറ്റ് പ്രധാന സ്ഥാനാർഥികൾ.

117 അംഗ നിയമസഭയിൽ കഴിഞ്ഞ തവണ 92 സീറ്റുകൾ നേടി കൈവരിച്ച വിജയം നിലനിർത്തുകയാണ് എഎപിയുടെ ലക്ഷ്യം. സ്ഥാനാർഥി പ്രഖ്യാപനത്തിന് പിന്നാലെ എഎപി ദേശീയ കൺവീനർ അരവിന്ദ് കെജ്‌രിവാളും ഭഗവന്ത് മനും സ്ഥാനാർഥികൾക്ക് ആശംസകൾ അറിയിച്ചു.

Content Highlights: AAP released the first list of 40 candidates for the 2027 Punjab Legislative Assembly elections., Chief Minister Bhagwant Mann will contest from the Dhuri assembly constituency., Key ministers and leaders like Kultar Singh Sandhwan and Sanjeev Arora are included in the first list., AAP aims to retain power in the 117-member Punjab assembly after winning 92 seats previously.