പ്രൗഢിയും ആധുനികതയും സമന്വയിക്കുന്നിടം; അജയ് ദേവ്ഗണിന്റേയും കജോളിന്റേയും മുംബൈയിലെ വീട്
ബോളിവുഡിന്റെ പ്രിയപ്പെട്ട താരജോഡികളാണ് കജോളും അജയ് ദേവ്ഗണും. നാല് വര്ഷം നീണ്ട പ്രണയത്തിനുശേഷമാണ് ഇരുവരും വിവാഹം കഴിച്ചത്. അജയ് ദേവ്ഗണിന് മുംബൈ നഗരത്തില് അതിമനോഹരമായ ഒരു വീടുണ്ട്. 'ശിവ്ശക്തി' എന്നാണ് ആരാധകര് ഈ വീടിനെ വിളിക്കുന്നത്. മുംബൈയിലെ ജുഹു പ്രദേശത്തുള്ള ഈ ബംഗ്ലാവിലാണ് അജയും കജോളും മക്കളായ നൈസയും യുഗും താമസിക്കുന്നത്.
നാലുപേരുടേയും വ്യക്തിത്വങ്ങളുമായി ഇണങ്ങുന്ന ലുക്കാണ് ശിവ്ശക്തിയുടേത്. അജയ് ദേവ്ഗണ് കടുത്ത ശിവഭക്തനായതിനാലാണ് വീടിന് ശിവ്ശക്തി എന്നു പേരിട്ടത്. ക്രീമും ബ്രൗണും നിറത്തിലുള്ള ഡിസൈനാണ് ഈ ബംഗ്ലാവിന്റേത്. 60 കോടി രൂപയ്ക്കാണ് അജയ് ഈ ബംഗ്ലാവ് വാങ്ങിയത്. മുംബൈയിലെ ഏറ്റവും പോഷ് ലൊക്കാലിറ്റികളില് ഒന്നാണ് ബംഗ്ലാവ് സ്ഥിതി ചെയ്യുന്ന ജുഹു. ഒട്ടനേകം ബോളിവുഡ് സെലിബ്രിറ്റികളുടെ വീട് ഈ പ്രദേശത്ത് സ്ഥിതി ചെയ്യുന്നുണ്ട്.
വീടിന്റെ മുന്വശത്തുതന്നെ രാജകീയമായ ഒരു കവാടമുണ്ട്. കല്ലുകൊണ്ടുള്ള ഭിത്തിയില് കെട്ടിയിരിക്കുന്ന ഈ എന്ട്രന്സ് വീടിന് ഒരു റസ്റ്റിക് വൈബ് പ്രദാനം ചെയ്യുന്നുണ്ട്. സ്റ്റെയര്കേസുവഴി ഒന്നാം നിലയിലേക്ക് ചെല്ലുന്നത് വിശാലമായ ലോബിയിലേക്കാണ്. ഒന്നാം നിലയിലെ വെളുത്ത മാര്ബിള് വിരിച്ച തറ സ്വര്ഗത്തിലെത്തിയതുപോലെയുള്ള പ്രതീതി നല്കും. സീലിങ് മുതല് ഫ്ളോര് വരെ നീളമുള്ള വലിയ ഗ്ലാസ് ജനാലകള് വീട്ടിനുള്ളിലേക്ക് നല്ലതുപോലെ സൂര്യപ്രകാശം കടത്തിവിടുന്നു.