യഷിന്‍റെ 'ടോക്സിക്' കേരളത്തിലെത്തിക്കാൻ പനോരമ സ്റ്റുഡിയോസും സെഞ്ച്വറി ഫിലിംസും, റിലീസ് ഓഗസ്റ്റ് 26ന്

തരംഗമായി മാറിയ 'കെ.ജി.എഫ്: ചാപ്റ്റർ 2'-വിന് ശേഷം യഷ് നായകനായി എത്തുന്ന ഏറ്റവും പുതിയ പാൻ-ഇന്ത്യൻ ചിത്രം 'ടോക്സിക്: എ ഫെയറി ടെയിൽ ഫോർ ഗ്രോൺ-അപ്സ്' കേരളത്തിൽ തിയേറ്ററുകളിലെത്തിക്കാൻ പനോരമ സ്റ്റുഡിയോസ്. പ്രമുഖ നിർമാണ കമ്പനിയായ സെഞ്ച്വറി ഫിലിംസുമായി സഹകരിച്ചാണ് പനോരമ സ്റ്റുഡിയോസ് ചിത്രത്തിന്‍റെ കേരളത്തിലെ വിതരണാവകാശം സ്വന്തമാക്കിയിരിക്കുന്നത്. യഷിന്‍റെ മോൺസ്റ്റർ മൈൻഡ് ക്രിയേഷൻസ്, കെ.വി.എൻ പ്രൊഡക്ഷൻസ് എന്നിവരുമായുള്ള സഹകരണത്തിലൂടെയാണ് ഈ പങ്കാളിത്തം സാധ്യമാക്കിയിരിക്കുന്നത്. ഗീതു മോഹൻദാസ് സംവിധാനം ചെയ്യുന്ന ചിത്രം 2026 ഓഗസ്റ്റ് 26-ന് ലോകമെമ്പാടുമുള്ള തിയേറ്ററുകളിൽ പ്രദർശനത്തിനെത്തും.

തെന്നിന്ത്യൻ സിനിമയിൽ ഈ വർഷം പുറത്തിറങ്ങുന്ന ഏറ്റവും വലിയ തിയേറ്റർ റിലീസുകളിൽ ഒന്നാണ് 'ടോക്സിക്'. യഷിന് പുറമെ കിയാര അദ്വാനി, നയൻതാര, ഹുമ ഖുറേഷി, താര സുതാരിയ, രുക്മിണി വസന്ത് എന്നിവരടങ്ങുന്ന വൻ താരനിരയാണ് ചിത്രത്തിൽ അണിനിരക്കുന്നത്. കഴിഞ്ഞ കാലത്തെ ഗോവയുടെ പശ്ചാത്തലത്തിൽ ഒരുങ്ങുന്ന ചിത്രം കുറ്റകൃത്യങ്ങൾ, അധികാരം, ആഗ്രഹം, വഞ്ചന എന്നിവയുടെ കഥയാണ് പറയുന്നത്. 'രായാ' എന്ന കഥാപാത്രമായാണ് യഷ് ചിത്രത്തിൽ എത്തുന്നത്.

തങ്ങളുടെ സാന്നിധ്യം ദക്ഷിണേന്ത്യയിൽ ശക്തമാക്കുന്നതിന്‍റെ ഭാഗമായാണ് പനോരമ സ്റ്റുഡിയോസിന്‍റെ ഈ നീക്കം. മലയാളത്തിൽ പനോരമ സ്റ്റുഡിയോസിൻറേതായെത്തിയ 'അനോമി', 'ഉന്മദം' എന്നീ ചിത്രങ്ങൾ ഇതിനകം ശ്രദ്ധ നേടി കഴിഞ്ഞിട്ടുണ്ട്. 'ടിക്കി ടാക്ക', ടൊവിനോ തോമസ് നായകനാകുന്ന 'പ്രൊഡക്ഷൻ നമ്പർ 4', 'മുൻപേ' എന്നീ ചിത്രങ്ങളും പനോരമ സ്റ്റുഡിയോസിന്‍റെ നിർമാണത്തിൽ ഒരുങ്ങുന്നുണ്ട്. കൂടാതെ നിവിൻ പോളി, ഫഹദ് ഫാസിൽ തുടങ്ങിയ പ്രമുഖ താരങ്ങളുമായും പനോരമ സ്റ്റുഡിയോസ് ഒരുമിക്കുന്നുണ്ട്.

കേരളത്തിൽ യഷിനുള്ള വൻ ജനപ്രീതിയും ഗീതു മോഹൻദാസിന്‍റെ വേറിട്ട മേക്കിംഗും കണക്കിലെടുക്കുമ്പോൾ 'ടോക്സിക്' കേരളത്തിലെ തിയേറ്ററുകളിൽ വലിയ തരംഗം സൃഷ്ടിക്കുമെന്നാണ് പ്രതീക്ഷിക്കുന്നത്. സെഞ്ച്വറി ഫിലിംസുമായി ചേർന്ന് ചിത്രം അതർഹിക്കുന്ന രീതിയിൽ വൻതോതിൽ തിയേറ്ററുകളിൽ എത്തിക്കാനുള്ള തയ്യാറെടുപ്പിലാണ് പനോരമ സ്റ്റുഡിയോസ്.

Content Highlights: Panorama Studios has partnered with Century Films to acquire the Kerala theatrical distribution rights for Rocking Star Yash's highly anticipated pan-Indian movie Toxic: A Fairy Tale for Grown-Ups, directed by Geethu Mohandas and set for release on August 26, 2026.