'ജനനായക'ന്റെ സെൻസർ സർട്ടിഫിക്കറ്റിനും വ്യാജൻ, വിവാദമായപ്പോൾ മാപ്പുപറഞ്ഞ് പിൻവലിച്ച് ഫാൻ പേജ്

ആരാധകർക്കിടയിൽ ആശയക്കുഴപ്പം സൃഷ്ടിച്ച് വിജയ് നായകനാകുന്ന 'ജനനായകൻ' സിനിമയുടെ വ്യാജ സെൻസർ സർട്ടിഫിക്കറ്റ്. സിനിമയ്ക്ക് സെൻസർ ബോർഡ് (CBFC) 'A' സർട്ടിഫിക്കറ്റ് നൽകിയെന്ന തരത്തിലുള്ള വാർത്തകൾ ശനിയാഴ്ച വ്യാപകമായി പ്രചരിക്കുകയായിരുന്നു. എച്ച്.വിനോദ് സംവിധാനം ചെയ്യുന്ന ചിത്രം റിലീസ് ചെയ്യുന്നതിലെ കാലതാമസം തുടരുന്നതിനിടെയാണ് വ്യാജ സെൻസർ സർട്ടിഫിക്കറ്റ് പ്രചരിച്ചത്.

ചിത്രത്തിന് വെള്ളിയാഴ്ച സെൻസർ സർട്ടിഫിക്കറ്റ് ലഭിച്ചുവെന്നും മൂന്ന് മണിക്കൂർ ദൈർഘ്യമുണ്ടെന്നും അവകാശപ്പെടുന്ന ഒരു വ്യാജ രേഖയാണ് സമൂഹമാധ്യമങ്ങളിൽ പ്രചരിച്ചത്. ചില അശ്ലീല പദങ്ങൾ ഒഴിവാക്കണമെന്നും രക്തച്ചൊരിച്ചിലും അക്രമവും നിറഞ്ഞ ദൃശ്യങ്ങളിൽ മാറ്റം വരുത്തണമെന്നും സെൻസർ ബോർഡ് നിർദ്ദേശിച്ചതായി ഈ വ്യാജ സർട്ടിഫിക്കറ്റിൽ രേഖപ്പെടുത്തിയിരുന്നു. എന്നാൽ ഈ വാർത്ത വലിയ ചർച്ചയായതോടെ, സർട്ടിഫിക്കറ്റ് പങ്കുവെച്ച ഫാൻ അക്കൗണ്ട് മാപ്പ് പറയുകയും അത് വ്യാജമാണെന്ന് തിരുത്തുകയും ചെയ്തു.

'ജനനായകൻ' ഇപ്പോഴും CBFC സർട്ടിഫിക്കറ്റിനായി കാത്തിരിക്കുകയാണ്. നിർമാണ കമ്പനിയായ കെ.വി.എൻ പ്രൊഡക്ഷൻസ് ഇക്കാര്യത്തിൽ ഔദ്യോഗിക പ്രസ്താവനകളൊന്നും നടത്തിയിട്ടില്ലെങ്കിലും, ഉടൻ തന്നെ സർട്ടിഫിക്കറ്റ് ലഭിക്കുമെന്ന പ്രതീക്ഷയിലാണ് അണിയറപ്രവർത്തകർ. സെൻസർ നടപടികൾ ഉടൻ പൂർത്തിയാകുമെന്ന് മെയ് മാസത്തിൽ നടത്തിയ ഒരു പത്രസമ്മേളനത്തിൽ നിർമാതാവ് വെങ്കട്ട് കെ. നാരായണ വ്യക്തമാക്കിയിരുന്നു.

കഴിഞ്ഞ ഏഴ് മാസമായി ചിത്രം വലിയ നിയമപോരാട്ടങ്ങളിലൂടെയും പ്രതിസന്ധികളിലൂടെയുമാണ് കടന്നുപോകുന്നത്. ഡിസംബറിൽ സെൻസറിങ്ങിന് സമർപ്പിച്ച ചിത്രം ചില മാറ്റങ്ങൾ വരുത്താൻ ആവശ്യപ്പെട്ട് സെൻസർ ബോർഡ് തിരിച്ചയച്ചിരുന്നു. തുടർന്ന് നിർമാതാക്കൾ കോടതിയെ സമീപിച്ചെങ്കിലും കാര്യമായ ആശ്വാസം ലഭിച്ചില്ല. ഇതിനിടെ ഏപ്രിൽ മാസത്തിൽ ചിത്രത്തിന്റെ എച്ച്ഡി പ്രിന്റ് ഇന്റർനെറ്റിൽ ചോർന്നത് അണിയറപ്രവർത്തകരെ കൂടുതൽ പ്രതിസന്ധിയിലാക്കി. ഈ ചോർച്ചയുമായി ബന്ധപ്പെട്ട് ഒരു ഫ്രീലാൻസ് എഡിറ്റർ ഉൾപ്പെടെ നിരവധി പേരെ പോലീസ് അറസ്റ്റ് ചെയ്തിട്ടുണ്ട്.

വിജയിയുടെ അവസാന ചിത്രമായി വിശേഷിപ്പിക്കപ്പെടുന്ന 'ജനനായകൻ', അദ്ദേഹം തമിഴ്‌നാട് മുഖ്യമന്ത്രിയായി അധികാരമേറ്റ ശേഷം റിലീസ് ചെയ്യാനിരിക്കുന്ന ആദ്യ ചിത്രം കൂടിയാണ്. ജൂണിൽ വിജയിയുടെ ജന്മദിനത്തോടനുബന്ധിച്ച് ചിത്രം റിലീസ് ചെയ്യുമെന്ന് റിപ്പോർട്ടുകൾ ഉണ്ടായിരുന്നുവെങ്കിലും അത് നടന്നില്ല. രാഷ്ട്രീയ വിജയത്തിന് ശേഷം വിജയിയുടെ സിനിമ കാണാൻ കാത്തിരിക്കുന്ന ആരാധകർക്ക് സിനിമയുടെ റിലീസ് സംബന്ധിച്ച അനിശ്ചിതത്വം വലിയ നിരാശയാണ് നൽകുന്നത്.

Content Highlights: Amid mounting anticipation and endless delays surrounding Thalapathy Vijay's highly awaited political action drama Jananayagan, a fake Central Board of Film Certification (CBFC) certificate went viral on social media on Saturday, triggering massive confusion among fans. The forged document claimed that the H. Vinoth directorial had been granted an 'A' (Adults Only) certification with a runtime of exactly three hours due to excessive gore and explicit language. However, the fan page behind the hoax quickly deleted the post and issued an unconditional apology.