ഗംഭീര ആക്ഷൻ കാണാൻ തയ്യാറെടുത്തോളൂ; ശിവ കാർത്തികേയൻ-മുരുഗദോസ് ചിത്രത്തിൽ വില്ലനായി വിദ്യുത്

ശിവ കാർത്തികേയനെ നായകനാക്കി എ.ആർ. മുരു​ഗദോസ് സംവിധാനംചെയ്യുന്ന ചിത്രത്തിൽ വില്ലനായി വിദ്യുത് ജംവാൾ. ചിത്രത്തിലേക്ക് വിദ്യുതിനെ സ്വാ​ഗതം ചെയ്തുകൊണ്ടുള്ള ലൊക്കേഷൻ വീഡിയോ അണിയറപ്രവർത്തകർ പുറത്തുവിട്ടു. ശിവ കാർത്തികേയന്റെ 23-ാമത്തെ ചിത്രമാണിത്.

10 വർഷത്തെ ഇടവേളയ്ക്ക് ശേഷം വിദ്യുത് തമിഴിലേക്ക് തിരിച്ചെത്തുന്ന ചിത്രമാണ് എസ്കെ 23. മുരു​ഗദോസിന്റെ സംവിധാനത്തിൽ 2012-ൽ പുറത്തിറങ്ങിയ വിജയ് ചിത്രം തുപ്പാക്കിയിലൂടെയാണ് വിദ്യുത് ജംവാൾ തമിഴിലെത്തിയത്. പിന്നീട് സൂര്യ നായകനായി 2014-ൽ റിലീസ് ചെയ്ത അഞ്ജാനിലും അദ്ദേഹം നിർണായകവേഷത്തിലെത്തിയിരുന്നു.

വിദ്യുത് ജംവാളിനെ തന്റെ പുതിയ ചിത്രത്തിലേക്ക് സ്വാ​ഗതം ചെയ്യുന്നതിൽ സന്തോഷമുണ്ടെന്ന് എ.ആർ മുരു​ഗദോസ് എക്സിൽ പോസ്റ്റ് ചെയ്തു. അദ്ദേഹത്തോടൊപ്പം വീണ്ടും പ്രവർത്തിക്കാനായതിന്റെ ത്രില്ലിലാണെന്നും മുരു​ഗദോസ് കുറിച്ചു. നിർമാതാക്കളായ ശ്രീലക്ഷ്മി മൂവീസിന്റെ പോസ്റ്റ് ഷെയർ ചെയ്തുകൊണ്ടായിരുന്നു സംവിധായകന്റെ വാക്കുകൾ.

ശിവകാർത്തികേയൻ്റെ കരിയറിലെ ഏറ്റവും ഉയർന്ന ബജറ്റിലാണ് സിനിമയൊരുങ്ങുന്നത്. ഇത് ആദ്യമായാണ് എ ആർ മുരുഗദോസ് സംവിധാനം ചെയ്യുന്ന ചിത്രത്തിൽ ശിവകാർത്തികേയൻ അഭിനയിക്കുന്നത്. മുമ്പ് 2014ൽ പുറത്തിറങ്ങിയ 'മാൻ കരാട്ടെ' എന്ന ശിവകാർത്തികേയൻ നായകനായ ചിത്രത്തിന്റെ നിർമ്മാതാവ് മുരുഗദോസായിരുന്നു.

ആക്ഷൻ ത്രില്ലറായി ഒരുങ്ങുന്ന ചിത്രത്തിന് പേരിട്ടിട്ടില്ല. കന്നഡ താരം രു​ഗ്മിണി വസന്ത് ആണ് നായികയാവുന്നത്. മലയാളത്തിൽനിന്ന് ബിജു മേനോൻ ചിത്രത്തിലുണ്ടാവുമെന്ന് റിപ്പോർട്ടുകളുണ്ട്.

Content Highlights: vidyut jamwal in siva karthikeyan and ar murugadoss uniting movie