പലരെയും നിശ്ശബ്ദമായി പ്രചോദിപ്പിച്ച വ്യക്തി, ജെൻസികൾക്ക് മാതൃകയാക്കാം; അണ്ണാമലൈയെ സന്ദർശിച്ച് ഉണ്ണി

ബിജെപി നേതാവ് കെ. അണ്ണാമലൈയെ സന്ദർശിച്ച് നടൻ ഉണ്ണി മുകുന്ദൻ. പ്രധാനമന്ത്രി നരേന്ദ്ര മോദിയുടെ ബയോപിക് ആയ മാ വന്ദേയിൽ നായകനായി അഭിനയിക്കുന്നതിന് മുന്നോടിയായാണ് ഈ സന്ദർശനം. കൂടിക്കാഴ്ചയെക്കുറിച്ചുള്ള അനുഭവക്കുറിപ്പ് താരം ചിത്രത്തോടൊപ്പം പങ്കുവെച്ചു. പുതിയ തലമുറയ്ക്ക് മാതൃകയാക്കാവുന്ന വ്യക്തിയാണ് അണ്ണാമലൈ എന്ന് ഉണ്ണി മുകുന്ദൻ പറഞ്ഞു. അദ്ദേഹത്തിനൊപ്പം ഉച്ചഭക്ഷണം കഴിക്കാൻ സാധിച്ചത് ഭാഗ്യമാണെന്നും ഉണ്ണി കൂട്ടിച്ചേർത്തു.

ജീവിതം, രാഷ്ട്രീയം, കായികം, സിനിമ, നമ്മെ രൂപപ്പെടുത്തുന്ന തിരഞ്ഞെടുപ്പുകൾ എന്നിവയെല്ലാം ഉൾക്കൊള്ളുന്ന ഹൃദ്യമായ സംഭാഷണമായിരുന്നു അതെന്ന് ഉണ്ണി മുകുന്ദൻ വിവരിച്ചു. കഠിനവും ചിട്ടയായുമുള്ള ജീവിതം നയിച്ചിട്ടും ഇത്രയധികം വിനയമുള്ള ഒരാളെ കണ്ടുമുട്ടുന്നത് വിരളമാണെന്നും അദ്ദേഹം എടുത്തുപറഞ്ഞു.

ഒരു പോലീസ് ഓഫീസർ യൂണിഫോമിന്റെ സുരക്ഷിതത്വം വിട്ട് മുഖ്യധാരാ രാഷ്ട്രീയത്തിലേക്ക് കടന്നുവരുന്നത് പ്രചോദനകരമാണെന്ന് മുകുന്ദൻ അണ്ണാമലൈയുടെ കരിയറിനെക്കുറിച്ച് പറഞ്ഞു. അണ്ണാമലൈയുടെ 'ബിയോണ്ട് ഖാക്കി' എന്ന പുസ്തകത്തെക്കുറിച്ചും നടൻ പരാമർശിച്ചു. സുഖസൗകര്യങ്ങളേക്കാൾ ലക്ഷ്യബോധത്താൽ നയിക്കപ്പെടുന്ന യാത്രകളാണ് അർത്ഥവത്തായതെന്ന് വിശ്വസിക്കുന്ന ഒരാളെന്ന നിലയിൽ അത് തന്നെ സ്വാധീനിച്ചുവെന്നും 'മാർക്കോ' താരം കൂട്ടിച്ചേർത്തു.

"2026-ലെ ആദ്യ ദിവസം തന്നെ, എന്നെപ്പോലുള്ള പലരെയും നിശ്ശബ്ദമായി പ്രചോദിപ്പിച്ച വ്യക്തിക്കൊപ്പം ഉച്ചഭക്ഷണം കഴിക്കാൻ എനിക്ക് ഭാഗ്യം ലഭിച്ചു. കഠിനവും ചിട്ടയായുമുള്ളതും ധൈര്യപൂർണവുമായ ജീവിതം നയിച്ചിട്ടും ഇത്രയധികം വിനയമുള്ള ഒരാളെ കണ്ടുമുട്ടുന്നത് എത്ര വിരളമാണ്. ഒരു പോലീസ് ഓഫീസർ യൂണിഫോമിന്റെ സുരക്ഷിതത്വം വിട്ട്, വിശ്വാസത്താൽ മാത്രം നയിക്കപ്പെട്ട് മുഖ്യധാരാ രാഷ്ട്രീയത്തിന്റെ പ്രവചനാതീതമായ ലോകത്തേക്ക് കടന്നുവരുന്നത് എത്ര പ്രചോദനകരമാണെന്ന് ഞാൻ അദ്ദേഹത്തോട് പങ്കുവെച്ചു. അദ്ദേഹത്തിന്റെ 'ബിയോണ്ട് ഖാക്കി' എന്ന പുസ്തകം എന്നെ പ്രചോദിപ്പിച്ചിട്ടുണ്ട്. ഒരു വായനക്കാരനെന്ന നിലയിൽ മാത്രമല്ല, സുഖസൗകര്യങ്ങളേക്കാൾ ലക്ഷ്യബോധത്താൽ നയിക്കപ്പെടുന്ന യാത്രകളാണ് ഏറ്റവും അർത്ഥവത്തായതെന്ന് വിശ്വസിക്കുന്ന ഒരാളെന്ന നിലയിലും."

അണ്ണാമലൈക്കും കുടുംബത്തിനും അവരുടെ ആതിഥേയത്വത്തിന് മുകുന്ദൻ നന്ദി പറഞ്ഞു. കൂടിക്കാഴ്ച ഏറെക്കാലമായി മുടങ്ങിക്കിടക്കുകയായിരുന്നെങ്കിലും, പുതുവർഷത്തിന്റെ തുടക്കത്തിന് അനുയോജ്യമായ സമയത്താണ് ഈ കണ്ടുമുട്ടൽ നടന്നതെന്നും ഇപ്പോൾ അണ്ണാമലൈ തന്റെ പ്രിയ സുഹൃത്തുകൂടിയാണെന്നും ഉണ്ണി മുകുന്ദൻ പറഞ്ഞു.

കെ.കെ. സെന്തിൽ കുമാറാണ് ‘മാ വന്ദേ’യുടെ ഛായാഗ്രഹണം. രവി ബസ്രൂർ സംഗീത സംവിധാനം നിർവഹിക്കുന്നു. സാബു സിറിൾ ആണ് പ്രൊഡക്ഷൻ ഡിസൈൻ. മലയാളം, തമിഴ്, തെലുങ്ക്, ഹിന്ദി, ഇംഗ്ലീഷ് എന്നീ ഭാഷകളിൽ ഒരേസമയം റിലീസ് ചെയ്യുന്ന ഈ ചിത്രം ആധുനിക സാങ്കേതികവിദ്യകളും VFX-ഉം ഉപയോഗിച്ചാണ് നിർമിക്കുന്നത്. വമ്പൻ താരനിരയും ഉയർന്ന സാങ്കേതിക മികവും ‘മാ വന്ദേ’യെ ഒരു ശ്രദ്ധേയമായ പാൻ-ഇന്ത്യ പ്രോജക്ടായി മാറ്റും എന്നാണ് പ്രതീക്ഷിക്കുന്നത്. ചിത്രീകരണപ്രവർത്തനങ്ങൾ വേഗത്തിൽ പുരോഗമിക്കുന്നതായും, അടുത്ത ഘട്ടത്തിൽ കൂടുതൽ വിവരങ്ങൾ പുറത്തുവിടുമെന്നും നിർമാതാക്കൾ അറിയിച്ചു.

Content Highlights: Malayalam actor Unni Mukundan, set to play PM Modi, shares an inspiring meeting with BJP leader K Annamalai.