വീണ് അഞ്ച് വാരിയെല്ലുകൾ ഒടിഞ്ഞു, ഒരെണ്ണം ശ്വാസകോശത്തിൽ തറച്ചു, സമ്പൂർണ വിശ്രമം നിർദേശിച്ചിരിക്കുകയാണ് -ടിന്നു ആനന്ദ്

മുതിർന്ന ചലച്ചിത്ര നടനും സംവിധായകനുമായ ടിന്നു ആനന്ദ് തീവ്രപരിചരണ വിഭാഗത്തിലെ (ICU) ചികിത്സയ്ക്ക് ശേഷം ആശുപത്രിയിൽ നിന്ന് വീട്ടിലേക്ക് മടങ്ങി. നടക്കുന്നതിനിടെ വീണ് വാരിയെല്ലുകൾ ഒടിഞ്ഞതിനെത്തുടർന്നാണ് അദ്ദേഹം ചികിത്സ തേടിയത്. മുംബൈയിലെ കോകിലാബെൻ ധീരുഭായ് അംബാനി ആശുപത്രിയിലായിരുന്നു അദ്ദേഹത്തെ പ്രവേശിപ്പിച്ചിരുന്നത്. അപകടകരമായ അവസ്ഥ തരണം ചെയ്ത അദ്ദേഹം നിലവിൽ വീട്ടിൽ വിശ്രമത്തിൽ തുടരുകയാണ്.

വീഴ്ചയെത്തുടർന്ന് അഞ്ച് വാരിയെല്ലുകൾക്ക് ഒടിവ് സംഭവിക്കുകയും, അതിലൊന്ന് ശ്വാസകോശത്തിൽ തുളച്ചുകയറുകയും ചെയ്തതിനെത്തുടർന്നാണ് ടിന്നു ആനന്ദിനെ ആശുപത്രിയിൽ പ്രവേശിപ്പിച്ചത്. ഐസിയുവിൽ 12 ദിവസത്തെ ചികിത്സയ്ക്ക് ശേഷമാണ് അദ്ദേഹത്തിന്റെ ആരോഗ്യം മെച്ചപ്പെട്ടത്. നിലവിൽ അദ്ദേഹം അപകടനില തരണം ചെയ്തിട്ടുണ്ടെങ്കിലും, ദൈനംദിന ചലനങ്ങളിൽ കഠിനമായ വേദനയും ബുദ്ധിമുട്ടും അനുഭവപ്പെടുന്നുണ്ട്.

"ഞാൻ രാത്രിയിൽ ഇരുട്ടിൽ തട്ടിത്തടഞ്ഞ് വീഴുകയായിരുന്നു. അത് കാര്യമാക്കാതെ ഉറങ്ങി. പിറ്റേദിവസം രാവിലെയാണ് ഒടിവുണ്ടെന്ന് തിരിച്ചറിഞ്ഞത്. മകളാണ് ആശുപത്രിയിലെത്തിച്ചത്. സിടി സ്കാൻ ചെയ്തപ്പോഴാണ് വാരിയെല്ലിന് അഞ്ച് ഒടിവുകൾ ഉള്ളതായി അറിഞ്ഞത്. ആ സമയം ഞാൻ എങ്ങനെയാണ് ചെലവഴിച്ചതെന്ന് എനിക്ക് ഓർമ്മയില്ല, പക്ഷേ ഇപ്പോൾ കുഴപ്പമില്ല,” ടിന്നു ആനന്ദ് പറഞ്ഞു.

കട്ടിലിൽ നിന്ന് എഴുന്നേൽക്കുന്നതിനും കിടക്കുന്നതിനും ബുദ്ധിമുട്ടുള്ളതിനാൽ പൂർണ്ണമായ ബെഡ് റെസ്റ്റ് എടുക്കാനാണ് ഡോക്ടർമാർ നിർദ്ദേശിച്ചിരിക്കുന്നത്. ആരോഗ്യം വീണ്ടെടുക്കുന്ന പ്രക്രിയ തുടരുന്നതിനാൽ പുറത്തിറങ്ങരുതെന്നും നിർദ്ദേശമുണ്ട്. സാധാരണ ജീവിതത്തിലേക്ക് തിരികെ വരാനും ചലനശേഷി മെച്ചപ്പെടുത്താനുമായി അദ്ദേഹം വീട്ടിൽ വച്ച് ഫിസിയോതെറാപ്പി തുടരുമെന്നാണ് വിവരങ്ങൾ.

ചികിത്സയിലും വിശ്രമത്തിലും കഴിയുമ്പോഴും അദ്ദേഹത്തിന്റെ പ്രൊഫഷണൽ ബാധ്യതകൾ അദ്ദേഹത്തെ തേടിയെത്തുന്നുണ്ട്. സിനിമകളുടെ റിലീസ് സമയപരിധികൾ എത്തിയതിനാൽ ശേഷിക്കുന്ന ഡബ്ബിംഗ് ജോലികൾ പൂർത്തിയാക്കാൻ നിർമ്മാതാക്കൾ അദ്ദേഹത്തെ സമീപിച്ചിട്ടുണ്ട്. എന്നാൽ സുഖം പ്രാപിക്കുന്നതിനിടയിൽ ഈ ഘട്ടത്തിൽ ജോലികളിലേക്ക് അദ്ദേഹം തിരികെ പ്രവേശിക്കുമോ എന്നതിനെക്കുറിച്ച് സ്ഥിരീകരണമൊന്നും ലഭ്യമായിട്ടില്ല.

ഇന്ത്യൻ ചലച്ചിത്രലോകത്ത് സംവിധായകനായും അഭിനേതാവായും വലിയ സംഭാവനകൾ നൽകിയ വ്യക്തിത്വമാണ് ടിന്നു ആനന്ദ്. അമിതാഭ് ബച്ചൻ നായകനായ 'കാലിയ', 'ഷഹൻഷാ' തുടങ്ങിയ സൂപ്പർഹിറ്റ് ചിത്രങ്ങൾ സംവിധാനം ചെയ്തത് ടിന്നു ആനന്ദാണ്. കൂടാതെ 'നായകൻ', 'പുഷ്പക വിമാന', 'സീതാ രാമം' തുടങ്ങിയ ഹിറ്റ് ചിത്രങ്ങളിൽ ശ്രദ്ധേയമായ കഥാപാത്രങ്ങളെ അവതരിപ്പിച്ചു അദ്ദേഹം. രാം ചരൺ നായകനായ പെദ്ദി എന്ന ചിത്രത്തിലാണ് ടിന്നു ആനന്ദ് ഏറ്റവും ഒടുവിൽ അഭിനയിച്ചത്.

Content Highlights: Veteran actor and director Tinnu Anand returned home after ICU treatment for fractured ribs caused by a fall. Admitted to Mumbai's Kokilaben Dhirubhai Ambani Hospital, he spent 12 days in ICU. Despite overcoming the critical phase, he experiences severe pain and mobility issues.