പുതിയ സംഘടനയുമായി തെന്നിന്ത്യൻ നിർമാതാക്കൾ, OTT വിൻഡോയിലും തിയേറ്റർ വിഹിതത്തിലും വിട്ടുവീഴ്ചയില്ല

ദക്ഷിണേന്ത്യൻ ചലച്ചിത്ര മേഖലയിലെ നിലവിലുള്ള വെല്ലുവിളികൾ ചർച്ച ചെയ്യുന്നതിനായി പ്രമുഖ ചലച്ചിത്ര നിർമാതാക്കൾ ഹൈദരാബാദിൽ യോഗംചേർന്നു. കേരളം, തമിഴ്‌നാട്, ആന്ധ്രാപ്രദേശ്, തെലങ്കാന എന്നീ സംസ്ഥാനങ്ങളിലെ പ്രൊഡ്യൂസേഴ്സ് അസോസിയേഷനുകളുടെയും ഗിൽഡുകളുടെയും പ്രതിനിധികളാണ് ഈ യോഗത്തിൽ പങ്കെടുത്തത്. ചലച്ചിത്ര നിർമാണ മേഖല നേരിടുന്ന നിർണ്ണായകമായ പ്രശ്നങ്ങൾക്ക് പരിഹാരം കാണുക എന്നതായിരുന്നു ഈ ഒത്തുചേരലിന്റെ പ്രധാന ലക്ഷ്യം.

'സൗത്ത് ഇന്ത്യൻ ഫിലിം പ്രൊഡ്യൂസേഴ്സ് അസോസിയേഷൻ' (SIFPA) എന്ന പേരിൽ ഒരു പുതിയ സംഘടന രൂപീകരിക്കാൻ യോഗത്തിൽ തീരുമാനിച്ചു. നിർമാതാക്കളുടെ താൽപ്പര്യങ്ങൾ ദീർഘകാലാടിസ്ഥാനത്തിൽ സംരക്ഷിക്കുന്നതിനു വേണ്ടിയാണ് ഈ സംഘടന നിലവിൽ വന്നത്. കൂടാതെ, നാല് തെന്നിന്ത്യൻ ഭാഷാ സിനിമകളിൽ നിന്നുമുള്ള പ്രതിനിധികളെ ഉൾപ്പെടുത്തി ഒരു ഉന്നതതല സ്റ്റിയറിംഗ് കമ്മിറ്റിയും രൂപീകരിച്ചിട്ടുണ്ട്. വിവിധ ചലച്ചിത്ര വ്യവസായങ്ങൾ തമ്മിലുള്ള ഏകോപനം ഉറപ്പാക്കാനും അടിയന്തര പ്രശ്നങ്ങളിൽ ഇടപെടാനും ഈ കമ്മിറ്റി പ്രവർത്തിക്കും.

സിനിമകളുടെ തിയേറ്റർ റിലീസിനെക്കുറിച്ചോ എട്ട് ആഴ്ചത്തെ ഒടിടി വിൻഡോ നിബന്ധനയെക്കുറിച്ചോ മറ്റ് സംഘടനകൾ ഏകപക്ഷീയമായി തീരുമാനമെടുക്കുന്നതിനെ യോഗം ശക്തമായി അപലപിച്ചു. പരസ്പര ചർച്ചകളില്ലാതെ ഇത്തരം തീരുമാനങ്ങൾ അടിച്ചേൽപ്പിക്കുന്നത് ചലച്ചിത്ര നിർമാണ മേഖലയിൽ വലിയ ആശയക്കുഴപ്പങ്ങൾ സൃഷ്ടിക്കുമെന്ന് നിർമാതാക്കൾ ചൂണ്ടിക്കാട്ടി. ആയിരക്കണക്കിന് ആളുകളുടെ ഉപജീവനത്തെ ബാധിക്കുന്ന നിലവിലെ ചലച്ചിത്ര വ്യവസ്ഥിതിയെ പെട്ടെന്നുള്ള മാറ്റങ്ങൾ തകിടം മറിക്കുമെന്നും അവർ ആശങ്ക പ്രകടിപ്പിച്ചു.

ഒടിടി റിലീസ് കാലാവധിയെക്കുറിച്ച് നിലവിൽ യാതൊരുവിധ ഉറപ്പുകളും നൽകരുതെന്ന് എല്ലാ നിർമാതാക്കൾക്കും സമിതി കർശന നിർദ്ദേശം നൽകി. സിനിമകളുടെ അവകാശങ്ങൾ വിൽക്കുന്ന കാര്യത്തിലും റിലീസ് തീയതികൾ തീരുമാനിക്കുന്നതിലും നിർമാതാക്കൾക്ക് പൂർണമായ സ്വതന്ത്ര്യം ഉണ്ടായിരിക്കണം. പുറത്തുനിന്നുള്ള നിയന്ത്രണങ്ങളില്ലാതെ സ്വന്തം നിലയ്ക്ക് തീരുമാനങ്ങൾ എടുത്ത് മുന്നോട്ട് പോകാനാണ് നിർമാതാക്കളോട് ആവശ്യപ്പെട്ടിരിക്കുന്നത്. ചലച്ചിത്ര മേഖലയുടെ സാമ്പത്തിക ഭദ്രത ഉറപ്പാക്കാൻ കൂട്ടായ ചർച്ചകളിലൂടെ മാത്രമേ റിലീസ് നിബന്ധനകൾ തീരുമാനിക്കാവൂ എന്ന് സമിതി വ്യക്തമാക്കി.

സിനിമയിൽ ഏറ്റവും വലിയ സാമ്പത്തിക റിസ്ക് എടുക്കുന്ന വ്യക്തി എന്ന നിലയിൽ, തീരുമാനങ്ങൾ എടുക്കാനുള്ള പരമാധികാരം നിർമാതാവിനായിരിക്കണം എന്നതാണ് SIFPA-യുടെ പ്രധാന നിലപാട്. എല്ലാ തീരുമാനങ്ങളിലും നിർമാതാക്കളുടെ പങ്കാളിത്തം ഉറപ്പാക്കാൻ സ്റ്റിയറിംഗ് കമ്മിറ്റി ഇടയ്ക്കിടെ യോഗം ചേരും.

Content Highlights: SIFPA Formation: A new dedicated body, the South Indian Film Producers Association (SIFPA), has been officially established.