സൈജു കുറുപ്പ് നായകനായെത്തുന്ന 'പാപ്പച്ചൻ ഒളിവിലാണ്' റിലീസിനൊരുങ്ങുന്നു

'ജാനകി ജാനേ'യ്ക്ക് ശേഷം സെെജു കുറുപ്പ് നായക വേഷത്തിലെത്തുന്ന 'പാപ്പച്ചൻ ഒളിവിലാണ്' റിലീസിന് ഒരുങ്ങുന്നു. സിന്‍റോ സണ്ണിയാണ് ചിത്രത്തിന്റെ രചനയും സംവിധാനവും നിർവഹിക്കുന്നത്. നാടൻ വേഷത്തിൽ സൈജു കുറുപ്പ് വീണ്ടുമെത്തുന്നു എന്ന പ്രത്യേകത ചിത്രത്തിനുണ്ട്.
 
തോമസ് തിരുവല്ല ഫിലിംസിന്‍റെ ബാനറിൽ തോമസ് തിരുവല്ല നിര്‍മ്മിച്ചിരിക്കുന്ന ചിത്രത്തിന്റെ ഇതുവരെ റിലീസായ പോസ്റ്ററുകളും ടീസറും പാട്ടുകളും ശ്രദ്ധ നേടിയിരുന്നു. പൊട്ടിച്ചിരിപ്പിക്കുന്ന ഒരു കോമഡി എന്റർടെയിനറായിരിക്കും ചിത്രമെന്ന സൂചനകളാണ് പോസ്റ്ററുകളിൽ നിന്ന് ലഭിക്കുന്നത്. 

ഇതിനകം ഒരുപിടി മികച്ച കഥാപാത്രങ്ങളിലൂടെ പ്രേക്ഷകരുടെ ഇഷ്ടം നേടിയിട്ടുള്ള താരമാണ് സെെജു കുറുപ്പ്. 2005 ൽ ഹരിഹരൻ്റെ സംവിധാനത്തിൽ റിലീസ് ചെയ്ത 'മയൂഖ'ത്തിലെ ഉണ്ണി എന്ന നായക കഥാപാത്രത്തെ അവതരിപ്പിച്ച് വെള്ളിത്തിരയിലെത്തിയ സൈജു കുറുപ്പിന്റെ സമീപ ഭാവിയിൽ പുറത്തിറങ്ങിയ ചിത്രങ്ങളെല്ലാം ശ്രദ്ധിക്കപ്പെട്ടിരുന്നു. താരത്തിന്റെ മറ്റൊരു മികച്ച പ്രകടനം 'പാപ്പച്ചൻ ഒളിവിലാണ്' എന്ന ചിത്രത്തിലൂടെ കാണാനാകും എന്ന പ്രതീക്ഷയിലാണ് ആരാധകർ.

സ്രിന്ദയും ദര്‍ശനയുമാണ് ചിത്രത്തിലെ നായികമാര്‍. അജു വർഗീസ്, വിജയരാഘവൻ, ജഗദീഷ്, ജോണി ആൻ്റണി, ശിവജി ഗുരുവായൂർ, കോട്ടയം നസീർ, ജോളി ചിറയത്ത്, വീണ നായർ തുടങ്ങി നിരവധി താരങ്ങളും ചിത്രത്തിലുണ്ട്.

ശ്രീജിത്ത് നായർ ഛായാഗ്രഹണവും രതിൻ രാധാകൃഷ്ണൻ എഡിറ്റിങ്ങും നിർവ്വഹിക്കുന്നു. കലാസംവിധാനം വിനോദ് പട്ടണക്കാടൻ. കോസ്റ്റ്യൂം ഡിസൈൻ -സുജിത് മട്ടന്നൂർ, മേക്കപ്പ് -മനോജ് & കിരൺ, ചീഫ് അസ്സോസ്സിയേറ്റ് ഡയറക്ടർ -ബോബി സത്യശീലൻ, പ്രൊഡക്ഷൻ മാനേജർ -ലിബിൻ വർഗീസ്, പ്രൊഡക്ഷൻ എക്സിക്യട്ടീവ് -പ്രസാദ് നമ്പ്യാങ്കാവ്, പ്രൊഡക്ഷൻ കൺട്രോളർ -പ്രശാന്ത് നാരായണൻ. കുട്ടമ്പുഴ ഭൂതത്താൻകെട്ട്, നേര്യമംഗലം ഭാഗങ്ങളിലായാണ് സിനിമയുടെ ചിത്രീകരണം നടന്നത്. പി.ആർ.ഒ -മഞ്ജു ഗോപിനാഥ്, വാഴൂർ ജോസ്, സ്റ്റിൽസ് -അജീഷ് സുഗതൻ, മാര്‍ക്കറ്റിങ് -സ്നേക്ക്പ്ലാന്‍റ്.

Content Highlights: saiju kurupp in pappachan olivilanu releasing soon