'മഹേഷിന്റെ പ്രതികാരം മുതൽ പെണ്ണും പൊറാട്ടും വരെ, പരീക്ഷണത്തിന് ധൈര്യം നൽകിയത് രാജേഷിലുള്ള വിശ്വാസം'

ആദ്യമായി സംവിധാനംചെയ്ത ചിത്രം 'പെണ്ണും പൊറാട്ടും' പുറത്തിറങ്ങാനിരിക്കെ രാജേഷ് മാധവനെക്കുറിച്ച് ഹൃദ്യമായ കുറിപ്പ് പങ്കുവെച്ച് നിർമാതാവ് സന്തോഷ് ടി. കുരുവിള. താൻ നിർമിച്ച 'മഹേഷിന്റെ പ്രതികാരം' മുതൽ 'പെണ്ണും പൊറാട്ടും' വരെ എത്തിനിൽക്കുന്ന രാജേഷുമായുള്ള സിനിമയ്ക്കുള്ളിലെ സൗഹൃദത്തെക്കുറിച്ചാണ് നിർമാതാവിന്റെ കുറിപ്പ്. നൂറിലധികം പുതുമുഖങ്ങളെ അണിനിരത്തി 'പെണ്ണും പൊറാട്ടും' പോലൊരു പരീക്ഷണത്തിന് തനിക്ക് ധൈര്യം നൽകിയത് രാജേഷിലുള്ള വിശ്വാസമാണെന്നും അദ്ദേഹം കൂട്ടിച്ചേർത്തു. ചിത്രം ഫെബ്രുവരി 13-ന് തിയേറ്ററിലെത്തും.

സന്തോഷ് ടി. കുരുവിളയുടെ ഫെയ്‌സ്ബുക്ക് കുറിപ്പിന്റെ പൂർണ്ണരൂപം:

ഹൃദയപൂർവ്വം, സന്തോഷ് ടി. കുരുവിള !

സിനിമ എനിക്ക് വെറുമൊരു കച്ചവടമല്ല; അതൊരു മനുഷ്യബന്ധങ്ങളുടെ തീർത്ഥാടനമാണ്. ആ യാത്രയിൽ അവിചാരിതമായി കണ്ടുമുട്ടുകയും പിന്നീട് ആത്മാംശമായി മാറുകയും ചെയ്ത ചില മനുഷ്യരുണ്ട്. അതിലൊരാളാണ് രാജേഷ് മാധവൻ.

'മഹേഷിന്റെ പ്രതികാര'ത്തിൽ സൈക്കിൾ ചവിട്ടിപ്പോയ ആ അപരിചിതനിൽ നിന്ന് 'ന്നാ താൻ കേസ് കൊട്' ലെ സുരേശൻ വരെ, രാജേഷ് വെള്ളിത്തിരയിൽ പകർന്നാടിയ ഓരോ ഭാവവും പ്രേക്ഷകമനസ്സിൽ പെയ്തിറങ്ങിയത് അത്രമേൽ ആർദ്രമായാണ്. ആൻഡ്രോയ്ഡ് കുഞ്ഞപ്പനിലും നാരദനിലും നിമിറിലുമെല്ലാം പടർന്ന ആ രസികത്വം കേവലം അഭിനയമായിരുന്നില്ല, അതൊരു കലാകാരന്റെ സ്വത്വമായിരുന്നു.

കഴിഞ്ഞുപോയ കാലങ്ങളിൽ രാജേഷ് എനിക്ക് വെറുമൊരു കാസ്റ്റിംഗ് ഡയറക്ടറോ അഭിനേതാവോ മാത്രമായിരുന്നില്ല. സിനിമയെ നെഞ്ചോട് ചേർത്ത് പിടിച്ച, കലയ്ക്കായി സ്വയം ഹോമിക്കുന്ന ഒരു തപസ്വിയായിരുന്നു രാജേഷ്. ലൊക്കേഷനിലെ അണിയറകളിൽ രാജേഷ് കാട്ടിത്തന്ന സൂക്ഷ്മതയും കഥകളോടുള്ള ആ തീവ്രമായ അനുരാഗവും ഞാൻ കണ്ടിട്ടുണ്ട്. രാജേഷിലെ സംവിധായകനെ ലോകത്തിന് മുന്നിൽ അനാവരണം ചെയ്യാനുള്ള നിയോഗമായിരുന്നു എനിക്ക് 'പെണ്ണും പൊറാട്ടും'. ക്യാമറയ്ക്ക് മുന്നിൽ രാജേഷ് പുലർത്തിയ അതേ സത്യസന്ധതയും ഊർജ്ജവും സംവിധായകന്റെ കുപ്പായത്തിലും രാജേഷ് കൈവിട്ടില്ല.

വർഷങ്ങൾ നീണ്ട ഞങ്ങളുടെ സൗഹൃദവും പരസ്പരമുള്ള അചഞ്ചലമായ വിശ്വാസവുമാണ് ഈ സിനിമയുടെ നട്ടെല്ല്. എന്റെ സിനിമകളിലെ കഥാപാത്രങ്ങളെ കാസ്റ്റിംഗ് ഡയറക്ടറായി രാജേഷ് തിരഞ്ഞെടുത്തപ്പോൾ, ഇന്ന് രാജേഷ് തന്റെ സ്വപ്‌നചിത്രം മനോഹരമായി പൂർത്തിയാക്കി നിൽക്കുന്നു.

'മഹേഷിന്റെ പ്രതികാര'ത്തിന്റെ പത്താം വാർഷികത്തിന്റെ ധന്യതയിൽ, ഫെബ്രുവരി 13-ന് 'പെണ്ണും പൊറാട്ടും' തിയേറ്ററുകളിൽ എത്തുമ്പോൾ, അത് രാജേഷിന്റെ മാത്രം സ്വപ്‌നമല്ല; സിനിമയെ ഉപാസിക്കുന്ന ഞങ്ങളുടെ ഹൃദയങ്ങളുടെ സാക്ഷാത്കാരമാണ്.

ഓരോ ഫ്രെയിമിലും രാജേഷിന്റെ മുദ്ര പതിഞ്ഞ ഈ ചിത്രം ഒരു വലിയ ജീവിതസത്യത്തെ വിസ്മയിപ്പിക്കുന്ന ലാളിത്യത്തോടെയാണ് പറഞ്ഞുപോകുന്നത്.

വിനോദ വ്യവസായരംഗത്തെ അതികായന്മാർ പോലും ഈ ചിത്രം കണ്ട് അവരുടെ ഹൃദയം നിറഞ്ഞ അഭിപ്രായങ്ങൾ എന്നോട് പങ്കുവെച്ചുകഴിഞ്ഞു. നൂറിലധികം പുതുമുഖങ്ങളെ അണിനിരത്തി ഇത്തരമൊരു പരീക്ഷണത്തിന് എനിക്ക് ധൈര്യം നൽകിയത് രാജേഷിലുള്ള വിശ്വാസമാണ്.

രാജേഷ് മാധവൻ എന്ന സംവിധായകൻ ആരാണെന്ന് ഫെബ്രുവരി 13-ന് ലോകം കാണും. പ്രിയപ്പെട്ട രാജേഷിനും 'പെണ്ണും പൊറാട്ടും' ടീമിനും എന്റെ എല്ലാ സ്‌നേഹവും ആശംസകളും.

Content Highlights: Producer Santhosh T Kuruvilla shares a heartfelt note on Rajesh Madhavan`s directorial debut, `Pennum Porattum,` highlighting their long-standing trust