രണ്ടാമത് മാക്ട- രാജഗിരി ഇന്റർനാഷണൽ ഫിലിം ഫെസ്റ്റിവൽ 13 മുതൽ 15 വരെ

കൊച്ചി: മാക്ടയും രാജഗിരി കോളജ് ഓഫ് മാനേജ്‌മെന്റ് ആൻഡ് അപ്ലൈഡ് സയൻസസും സംയുക്തമായി സംഘടിപ്പിക്കുന്ന രണ്ടാമത് രാജഗിരി ഇന്റർനാഷണൽ ഫിലിം ഫെസ്റ്റിവൽ ഒക്ടോബർ 13 മുതൽ 15 വരെ നടക്കുമെന്ന് സംഘാടകർ അറിയിച്ചു. 13-ന് ഉച്ചയ്ക്ക് 12 -ന് കോളജ് ഓഡിറ്റോറിയത്തിൽ നടക്കുന്ന ചടങ്ങിൽ സംവിധായകൻ ജൂഡ് ആന്റണി ഉദ്ഘാടനം നിർവഹിക്കും. കോളേജ് ഡയറക്ടർ റവ. ഫാ. അജീഷ് പുതുശേരി സി.എം.ഐ. അധ്യക്ഷത വഹിക്കുന്ന ചടങ്ങിൽ പ്രശസ്ത നടി റിമ കല്ലിങ്കൽ, സംവിധായകനും നടനുമായ മധുപാൽ, മാക്ട ചെയർമാൻ ജോഷി മാത്യു, മാക്ട ജനറൽ സെക്രട്ടറി ശ്രീകുമാർ അരൂക്കുറ്റി, പ്രിൻസിപ്പൽ ഡോ. ലാലി മാത്യു, ഫെസ്റ്റിവൽ കൺവീനറും കോളജ് ആനിമേഷൻ ആൻഡ് ഗ്രാഫിക് ഡിസൈൻ വിഭാഗം മേധാവിയുമായ രഞ്ജു എ.സി. എന്നിവർ പങ്കെടുക്കും. മലയാള സിനിമയ്ക്ക് വിലപ്പെട്ട സംഭാവനകൾ നൽകിയ അന്തരിച്ച പ്രമുഖ ചലച്ചിത്ര പ്രവർത്തകൻ ജോൺ പോൾ അനുസ്മരണവും ഉദ്ഘാടനത്തോട് അനുബന്ധിച്ച് നടക്കും. ചടങ്ങിൽ അദ്ദേഹം രചിച്ച അമൂല്യ പുസ്തകങ്ങളുടെ ശേഖരം മകൾ ജിഷ ജോൺ മാക്ടയ്ക്കും രാജഗിരി കോളജിനും കൈമാറും.

വിവിധ ഫെസ്റ്റിവലുകളിലേക്ക് തിരഞ്ഞെടുക്കപ്പെട്ട മികച്ച ചിത്രങ്ങളാണ് മേളയിൽ പ്രദർശനത്തിന് എത്തുന്നത്. നടന്മാരായ ശ്രീനിവാസൻ, സലിംകുമാർ എന്നിവരുടെ പേരിലുള്ള രണ്ട് വേദികളിലായാണ് സിനിമകളുടെ പ്രദർശനം. കോളേജിലെ മെയിൻ ഓഡിറ്റോറിയം 'ശ്രീനിവാസൻ നഗർ' (സ്‌ക്രീൻ 1) ആയും കോൺഫറൻസ് റൂം 'സലിം കുമാർ നഗർ' (സ്‌ക്രീൻ 2) ആയുമാണ് ഒരുക്കിയിട്ടുള്ളത്. മൂന്ന് ദിവസങ്ങളിലായി മലയാളത്തിലും വിദേശഭാഷകളിലുമായി ആകെ 13 ചിത്രങ്ങൾ മേളയിൽ പ്രദർശിപ്പിക്കും.

ആദ്യ ദിനമായ ഒക്ടോബർ 13-ന് തിയേറ്റർ: മിത്ത് ഓഫ് റിയാലിറ്റി, ആദി സ്‌നേഹത്തിന്റെ വിരുന്നുമേശ, ഭൂതലം എന്നീ ചിത്രങ്ങൾ പ്രദർശിപ്പിക്കും. രണ്ടാം ദിനം നിഴലാഴം, ചാവുകല്യാണം, അനന്തതയിലേക്ക് (ഡോക്യുമെന്ററി), ശേഷിപ്പുകൾ, ഖിഡ്കി ഗാവ് (ഹിന്ദി), കോലാഹലം എന്നീ ചിത്രങ്ങളാണ് പ്രേക്ഷകർക്ക് മുന്നിലെത്തുക. സമാപന ദിവസമായ 15-ന് പ്രളയശേഷം ഒരു ജലകന്യക, പ്രൈവറ്റ്, ഫിറ്റ്‌സ്‌കാരാൾഡോ (ഇംഗ്ലീഷ്), മസ്തിഷ്‌കമരണം എന്നീ ചിത്രങ്ങളും പ്രദർശിപ്പിക്കും.

സിനിമാ പ്രദർശനങ്ങൾക്കൊപ്പം എല്ലാ ദിവസവും പ്രദർശിപ്പിക്കുന്ന സിനിമകളെയും വിവിധ വിഷയങ്ങളെയും അടിസ്ഥാനമാക്കിയുള്ള ഓപ്പൺ ഫോറങ്ങളും മേളയുടെ ഭാഗമായി നടക്കും. ജോൺ പോൾ നഗറിലാണ്(സ്‌പോർട്ടിക്കോ ബാസ്‌കറ്റ്‌ബോൾ കോർട്ട്) ഓപ്പൺ ഫോറങ്ങൾ നടക്കുന്നത്. കൂടാതെ, ദിവസവും വൈകുന്നേരങ്ങളിൽ സംഗീതപരിപാടികൾ, ഡാൻസ്, മ്യൂസിക് ബാൻഡ് തുടങ്ങിയ വിവിധ കൾച്ചറൽ പ്രോഗ്രാമുകളും അരങ്ങേറും. ഒക്ടോബർ 15-ന് വൈകുന്നേരം നടക്കുന്ന സമാപന സമ്മേളനത്തിൽ സംവിധായകൻ കമൽ, നടൻ വിനയ് ഫോർട്ട് തുടങ്ങിയവർ മുഖ്യാതിഥികളായി പങ്കെടുക്കും. ചടങ്ങിൽ ഷോർട്ട് ഫിലിം പുരസ്‌കാരങ്ങൾ വിതരണം ചെയ്യുമെന്നും ഭാരവാഹികൾ അറിയിച്ചു.

പുതുതലമുറയിൽ മികച്ച ചലച്ചിത്ര സംസ്‌കാരം സൃഷ്ടിക്കുക, വിദ്യാർഥികളിൽ സിനിമാവബോധം വളർത്തുക എന്നിവയാണ് ചലച്ചിത്രമേളയുടെ ലക്ഷ്യം. '2031-ൽ നടക്കുന്ന സി.എം.ഐ. സഭയുടെ ബൈസെന്റിനറി ആഘോഷങ്ങളുടെ മുന്നോടിയായി ഈ വർഷം 'സി.എം.ഐ. ഇയർ ഓഫ് മീഡിയ' ആയാണ് സഭ ആചരിക്കുന്നത്. ഇതിന്റെ ഭാഗമായാണ് ഫിലിം ഫെസ്റ്റിവൽ സംഘടിപ്പിക്കുന്നത്'- കോളേജ് ഡയറക്ടർ റവ. ഫാ. അജീഷ് പുതുശേരി സി.എം.ഐ. പറഞ്ഞു.

വാർത്താ സമ്മേളനത്തിൽ മാക്ട ജനറൽ സെക്രട്ടറി ശ്രീകുമാർ അരൂക്കുറ്റി, മാക്ട എക്‌സിക്യൂട്ടീവ് കമ്മിറ്റി അംഗവും ഫെസ്റ്റിവൽ കൺവീനറുമായ ബാബു പള്ളാശേരി, കോളജ് പ്രിൻസിപ്പാൾ ഡോ. ലാലി മാത്യു, ഫെസ്റ്റിവൽ കൺവീനർ രഞ്ജു എ.സി, സ്റ്റുഡന്റ് കോർഡിനേറ്റർ വിജയ് വികാസ് എന്നിവരും പങ്കെടുത്തു.

Content Highlights: The 2nd MACTA-Rajagiri International Film Festival will take place from October 13 to 15 in Kochi. Director Jude Anthany Joseph will inaugurate the festival, with actress Rima Kallingal and actor-director Madhupal in attendance. A total of 13 films, including Malayalam and foreign language features/documentaries, will be screened across two venues: Sreenivasan Nagar and Salim Kumar Nagar. The inauguration will commemorate late screenwriter John Paul, featuring a donation of his personal book collection to MACTA and Rajagiri College. Daily open forums, cultural programs, and short film awards distribution will conclude the event, with director Kamal and actor Vinay Forrt as chief guests for the valedictory function.