അത്തരമൊരു ജോണറിൽ ലാലേട്ടനെ കാണാൻ ആഗ്രഹമുണ്ട്, അന്ന് ഫസ്റ്റ് ഷോ കാണാൻ ഞാനുണ്ടാവും- പൃഥ്വിരാജ്
മലയാളത്തിന്റെ സൂപ്പർതാരം മോഹൻലാലിനോടുള്ള ആരാധന തുറന്നുപറഞ്ഞ് നടനും സംവിധായകനുമായ പൃഥ്വിരാജ് സുകുമാരൻ. മോഹൻലാലിനെ കേന്ദ്ര കഥാപാത്രമാക്കി 'ഖലീഫ 2: ദ ലെഗസി' എന്ന ചിത്രം വൈശാഖും ജിനു എബ്രഹാമും കൂടെ ചേർന്ന് ഒരുക്കുന്നതിൽ, ആരാധകൻ എന്ന നിലയിൽ താൻ സന്തോഷവാനാണെന്ന് പൃഥ്വിരാജ് പറഞ്ഞു. മുഖ്യധാരാ മാസ്- കൊമേഴ്സ്യൽ- ആക്ഷൻ ജോണറിൽ മോഹൻലാലിനെ കാണാൻ തനിക്ക് ആഗ്രഹമുണ്ട്. അത് സംഭവിക്കുന്ന ദിവസം പ്രേക്ഷകർക്കൊപ്പമിരുന്ന ആദ്യദിവസം ആദ്യഷോ കാണാൻ താനുമുണ്ടാവുമെന്നും പൃഥ്വിരാജ് പറഞ്ഞു. 'ഖലീഫ പാർട്ട് വൺ: ദ റൂളറി'ന്റെ ഭാഗമായതിന് പൃഥ്വിരാജ് മോഹൻലാലിന് നന്ദി പറഞ്ഞു. 'ഖലീഫ' പ്രൊമോഷൻ പരിപാടിയിൽ സംസാരിക്കുകയായിരുന്നു പൃഥ്വിരാജ്.
'ഖലീഫയ്ക്ക് ഇത്രയും വലിയ വരവേൽപ്പ് നൽകിയ എല്ലാ പ്രേക്ഷകർക്കും നന്ദി. മലയാളത്തെ സംബന്ധിച്ച് അങ്ങനെ എപ്പോഴും സംഭവിക്കുന്ന സിനിമയല്ല 'ഖലീഫ'. പല കാരണങ്ങൾക്കൊണ്ടും ഈ ജോണറിൽപ്പെട്ട സിനിമകൾ മലയാളത്തിൽ വിരളമാണ്. അത്തരം സിനിമകളുടെ വലിയ ആരാധകനാണ് ഞാൻ. ഇത് വലിയ ആശയങ്ങളുള്ള, നിങ്ങൾ ഇതുവരെ കേട്ടിട്ടില്ലാത്ത, നിങ്ങളെ ഞെട്ടിക്കുന്ന സിനിമയല്ല. മെയിൻ സ്ട്രീം കൊമേഴ്സ്യൽ സിനിമ കുടുംബ സമേതം കണ്ട് ആസ്വദിക്കുന്നവർക്ക്, അത്തരം അനുഭവം സമ്മാനിക്കാൻ ശ്രമിക്കുന്ന സിനിമയാണ്', ഖലീഫയെക്കുറിച്ച് പൃഥ്വിരാജ് പറഞ്ഞു.
'സിനിമയുടെ ആദ്യ കഥ ജിനു പറയുന്ന ദിവസം മുതൽ മാമ്പറയ്ക്കൽ അഹമ്മദ് അലി എന്ന കഥാപാത്രവും അയാളുടെ ലെഗസിയുമാണ് ചിത്രത്തിന്റെ അടിത്തറ എന്ന് പറഞ്ഞിരുന്നു. 2022-ൽ തിരക്കഥ എഴുതിയപ്പോൾ അത് കുറച്ചുകൂടെ വിപുലമായി. അങ്ങനെയാണ് ലാലേട്ടൻ ചെയ്താൽ കഥാപാത്രത്തിന് മികച്ച രൂപമുണ്ടാവുമെന്ന് കരുതുന്നതും അതിനുവേണ്ടി അദ്ദേഹത്തെ സമീപിച്ചതും. അദ്ദേഹം യെസ് പറഞ്ഞു എന്നത് തന്നെ ഞങ്ങൾക്ക് ഈ സിനിമയിൽ ലഭിച്ച വലിയ ആത്മവിശ്വാസമായിരുന്നു. ഈ ചിത്രത്തിന്റെ ഭാഗമായതിന് നന്ദി', മോഹൻലാലിനോട് അദ്ദേഹം പറഞ്ഞു.
'മാമ്പറയ്ക്കൽ അഹമ്മദ് അലിയുടെ വലിയ ലോകത്തിന്റെ അടർത്തി മാറ്റപ്പെട്ട ഒരേടാണ് ഖലീഫ പാർട്ട് വൺ. ലാലേട്ടനെ കേന്ദ്ര കഥാപാത്രമാക്കി അത്തരം ഒരു സിനിമ വൈശാഖും ജിനുവും പ്ലാൻ ചെയ്യുന്നതിൽ ഒരു ആരാധകൻ എന്ന നിലയിൽ ഞാൻ സന്തോഷവാനാണ്. ഞാനുൾപ്പെടെയുള്ള ആരാധകരെ ആവേശത്തിലാക്കി ലാലേട്ടൻ അദ്ദേഹത്തിന്റെ ലൈനപ്പ് പുറത്തുവിട്ടു. അതിൽ പ്രഗത്ഭരായ സംവിധായകരും ആവേശമുണർത്തുന്ന ചിത്രങ്ങളുമാണ് ഉള്ളത്. ആ സിനിമകളുടെ ജോണർ എന്താണെന്ന് എനിക്ക് അറിയില്ല. പക്ഷേ, മെയിൻസ്ട്രീം, മാസ്, കൊമേഷ്യൽ, ആക്ഷൻ സിനിമ എന്ന ജോണറിൽ അദ്ദേഹത്തെ കാണാൻ എനിക്ക് ആഗ്രഹമുണ്ട്. ആ ആഗ്രഹം, മാമ്പറയ്ക്കൽ അഹമ്മദ് അലിയുടെ സിനിമയിൽ പൂർത്തീകരിക്കപ്പെടട്ടേ എന്ന് ഞാൻ ആത്മാർഥമായി പ്രാർഥിക്കുന്നു. അതൊരു സ്വപ്‌ന തുല്യമായ സിനിമയായി ചെയ്യാൻ സാധിക്കട്ടെ എന്ന് ആഗ്രഹിക്കുന്നു', പൃഥ്വിരാജ് പറഞ്ഞു.
'15 വർഷം മുമ്പ് വൈശാഖിന്റെ ആദ്യ സിനിമയായ പോക്കിരിരാജയിൽ, സ്വതന്ത്ര സംവിധായകനായി എടുക്കുന്ന ആദ്യ ഷോട്ട് എന്റെ ക്ലോസപ്പ് ആണ്. 15 വർഷം വേണ്ടിവന്നു ഞങ്ങൾക്ക് ഒരുമിച്ച് മറ്റൊരു സിനിമ ചെയ്യാൻ. ആദ്യ സിനിമയിൽനിന്ന് ഖലീഫയിൽ എത്തി നിൽക്കുമ്പോൾ, മലയാള സിനിമയ്ക്ക് ഒരുപാട് വലിയ കൊമേഴ്ഷ്യൽ ബ്ലോക്ബസ്റ്ററുകൾ സമ്മാനിച്ച്, നൂറുകോടി എന്ന തുകകൾ പരിചിതമാക്കി തന്ന സംവിധായകനാണ് വൈശാഖ്. ആ വൈശാഖിന്റെ കൂടെ വീണ്ടും പ്രവർത്തിക്കാൻ സാധിച്ചതിൽ ഞാൻ അഭിമാനിക്കുന്നു. സന്തോഷവാനാണ്', അദ്ദേഹം കൂട്ടിച്ചേർത്തു.
'എന്നാണെങ്കിലും അത് സംഭവിക്കുമ്പോൾ ആദ്യദിവസം ആദ്യഷോ കാണാൻ, പ്രേക്ഷകർക്കിടയിൽ ഞാൻ ഉണ്ടാവും. സിനിമയിലും ഞാൻ ഉണ്ടാവും', ഖലീഫ രണ്ടാംഭാഗത്തെക്കുറിച്ച് ചോദിച്ചപ്പോൾ പൃഥ്വിരാജ് മറുപടി നൽകി.
Content Highlights: Actor-director Prithviraj Sukumaran expressed his immense excitement as a fan for Mohanlal's upcoming project 'Khalifa 2: The Legacy', directed by Vysakh and written by Jinu Abraham. Speaking at the promotional event for 'Khalifa Part One: The Ruler', Prithviraj thanked Mohanlal for agreeing to play the pivotal character of Mambarakkal Ahammad Ali, which added huge confidence to the team. Prithviraj stated that he eagerly desires to watch Mohanlal in a mainstream, mass-action commercial avatar, and he will definitely be present among the audience for the first-day first show. Reflecting on his 15-year association with director Vysakh since 'Pokkiri Raja', Prithviraj praised him for changing the commercial landscape of Malayalam cinema by delivering 100-crore blockbusters. Confirming his own association with the sequel, Prithviraj revealed that apart from watching the first show as a fan, he will also be starring in 'Khalifa Part 2'.