ഹനുമാൻകൈൻഡിനെ കെട്ടിപ്പിടിച്ചശേഷം മോദി പറഞ്ഞു, 'ജയ് ഹനുമാൻ'; വീഡിയോ വൈറൽ

റാപ്പ് സം​ഗീതലോകത്തെ പുതിയ തരം​ഗമാണ് മലയാളികൂടിയായ ഹനുമാൻകൈൻഡ്. ബി​ഗ് ഡോ​ഗ്സ് എന്ന ​ഗാനത്തിലൂടെ സോഷ്യൽ മീഡിയയിൽ പുതിയ ചർച്ചകൾ തീർത്തു അദ്ദേഹം. പ്രധാനമന്ത്രി നരേന്ദ്ര മോദിയുടെ അമേരിക്കൻ സന്ദർശനത്തിന്റെ ഭാ​ഗമായി ന്യൂ യോർക്കിൽ നടന്ന മോദി & യുഎസ് പരിപാടിയിലും അദ്ദേഹം ​ഗാനമാലപിച്ചു. ഈ ചടങ്ങിനിടെ നടന്ന ഒരു സംഭവം ഇപ്പോൾ വൈറലായിരിക്കുകയാണ്.

പ്രധാനമന്ത്രി നരേന്ദ്ര മോദിയുൾപ്പെടെയുള്ളവർക്കായി ബി​ഗ് ഡോ​ഗ്സ് ഉൾപ്പെടെയുള്ള ഹിറ്റ് ​ഗാനങ്ങൾ ഹനുമാൻകൈൻഡും സംഘവും അവതരിപ്പിച്ചു. പരിപാടി കഴിഞ്ഞയുടൻ പ്രധാനമന്ത്രി വേദിയിലേക്കെത്തി കലാകാരന്മാ‍ർ ഓരോരുത്തരെ ആലിം​ഗനം ചെയ്ത് അഭിനന്ദിച്ചു. ഇതിൽ ഹനുമാൻകൈൻഡിനെ കെട്ടിപ്പിടിച്ചപ്പോൾ മോദി പറഞ്ഞത് ജയ് ഹനുമാൻ എന്നായിരുന്നു. ഇതിന്റെ വീഡിയോ ഇപ്പോൾ വിവിധ സോഷ്യൽ മീഡിയാ പ്ലാറ്റ്ഫോമുകളിൽ വൈറലാണ്.

ഹനുമാൻകൈൻഡിനൊപ്പം ആദിത്യ ഗാധ്‌വി, സം​ഗീത സംവിധായകനും ​ഗായകനുമായ ദേവി ശ്രീ പ്രസാദ് എന്നിവരുമുണ്ടായിരുന്നു. കഴിഞ്ഞവർഷം ഖലാസി എന്ന ​ഗാനത്തിലൂടെ ലോകപ്രശസ്തനായ കലാകാരനാണ് ആദിത്യ ഗാധ്‌വി.

മലപ്പുറം പൊന്നാനി സ്വദേശിയായ സൂരജ് ചെറുകാട്ട് ആണ് റാപ്പ് ലോകത്ത് ഹനുമാൻകൈൻഡ് എന്ന പേരിൽ അറിയപ്പെടുന്നത്. 2024 ജൂലൈ 10 നു പുറത്തിറങ്ങിയ ഈ വീഡിയോ ഇപ്പോഴും ഇന്റര്‍നെറ്റില്‍ തരംഗമാണ്. മാരുതി 800 കാറിലും യമഹ ബൈക്കുകളിലും നടത്തിയ മരണത്തെ വെല്ലുന്ന ഈ സ്റ്റണ്ട് കണ്ട് കണ്ണ് തള്ളിയവരാണ് പലരും. പൊന്നാനിയിലാണ് ഈ വീഡിയോ ചിത്രീകരിച്ചിരിക്കുന്നതും. ബിജോയ് ഷെട്ടി സംവിധാനം ചെയ്ത വീഡിയോ ബ്രൗണ്‍ ക്രൂ പ്രൊഡക്ഷന്‍സിന്റെ കല്‍മിയാണ് നിര്‍മ്മിച്ചത്. ആഷിഖ് അബു സംവിധാനം ചെയ്യുന്ന റൈഫിൾ ക്ലബ് എന്ന ചിത്രത്തിലൂടെ അഭിനയരം​ഗത്തേക്കും എത്തുകയാണ് ഹനുമാൻകൈൻഡ്.

Content Highlights: Hanumankind performs for Prime Minister Narendra Modi in New York Videos Viral