കാത്തിരിപ്പിന് അവസാനം, നഞ്ചിയമ്മയ്ക്ക് താമസിക്കാൻ അടച്ചുറപ്പുള്ള വീടായി

അട്ടപ്പാടി: ഏറെ നാളത്തെ കാത്തിരിപ്പിനൊടുവിൽ ദേശീയ പുരസ്കാര ജേതാവ് നഞ്ചിയമ്മയ്ക്ക് താമസിക്കാൻ അടച്ചുറപ്പുള്ള ഒരു വീടായി. ഫിലോകാലിയ എന്ന ഫൗണ്ടേഷനാണ് നഞ്ചിയമ്മയ്ക്ക് വീട് നിർമിച്ചുകൊടുത്തത്. കഴിഞ്ഞദിവസം ​ഗായിക പുതിയവീട്ടിൽ താമസവും തുടങ്ങി.

നക്കുപതി ഊരിലെ കൊച്ചുവീട്ടിൽ കഴി‍ഞ്ഞിരുന്ന നഞ്ചിയമ്മയുടെ ഏറ്റവും വലിയ ആ​ഗ്രഹമായിരുന്നു അടച്ചുറപ്പുള്ള വീട്. തനിക്ക് ലഭിക്കുന്ന പുരസ്കാരങ്ങൾ വെയ്ക്കാൻ പോലും വീട്ടിലിടമില്ലെന്ന് അവർ പറഞ്ഞിരുന്നു. ഈ വിഷയത്തിലാണ് ഫൗണ്ടേഷൻ ഇടപെട്ടതും ​ഗായികയുടെ വീടെന്ന സ്വപ്നം യാഥാർത്ഥ്യമാക്കിയിരിക്കുന്നതും.

മൂന്ന് മാസം മുമ്പാണ് വീടുപണി ആരംഭിച്ചത്. നേരത്തേ താമസിച്ചിരുന്ന വീടിനോട് ചേർന്നുതന്നെയാണ് പുതിയ വീടും. നിർമാണം പൂർത്തീകരിച്ച വീട്ടിൽ വെള്ളിയാഴ്ചയോടെ നഞ്ചിയമ്മ താമസമാരംഭിച്ചു.

അന്തരിച്ച സംവിധായകൻ സച്ചി ഒരുക്കിയ അയ്യപ്പനും കോശിയും എന്ന ചിത്രത്തിലൂടെയാണ് മികച്ച ​ഗായികയ്ക്കുള്ള ദേശീയപുരസ്കാരം നഞ്ചിയമ്മയെ തേടിയെത്തിയത്. തൊട്ടുപിന്നാലെ വിവാദങ്ങളും ഉയർന്നു. എന്നാൽ സം​ഗീതലോകത്തുനിന്നും പുറത്തുനിന്നും നിരവധി പേരാണ് നഞ്ചിയമ്മയ്ക്ക് പിന്തുണയുമായെത്തിയത്.

Content Highlights: Singer Nanjiyamma New House, Nanjiyamma News, Nanjiyamma Get New Home