മരുന്ന് കുത്തിവെച്ചത് ദിവസം എട്ടുതവണ വരെ; മാത്യു പെറിയുടെ മരണത്തിൽ സഹായിക്കെതിരെ ഗുരുതര ആരോപണം

പ്രശസ്ത ഹോളിവുഡ് താരം മാത്യു പെറിയുടെ മരണവുമായി ബന്ധപ്പെട്ട് അദ്ദേഹത്തിന്റെ സഹായിയായിരുന്ന കെന്നത്ത് ഇവാമസയ്‌ക്കെതിരെ ഗുരുതര ആരോപണങ്ങളുമായി പ്രോസിക്യൂട്ടർമാർ രംഗത്ത്. 'ഫ്രണ്ട്‌സ്' എന്ന ഹാസ്യപരമ്പരയിലൂടെ ലോകമെമ്പാടും ആരാധകരെ നേടിയ പെറി, കെറ്റാമിൻ അമിതമായി ഉള്ളിൽ ചെന്നതിനെത്തുടർന്നാണ് അന്തരിച്ചത്. താരത്തിന്റെ മരണത്തിന് കാരണമായ മരുന്ന് എത്തിക്കുന്നതിലും അത് കുത്തിവെക്കുന്നതിലും ഇവാമസയ്ക്ക് നിർണായക പങ്കുണ്ടെന്നാണ് പുതിയ കോടതി രേഖകൾ വ്യക്തമാക്കുന്നത്.

പെറിയുടെ പേഴ്സണൽ അസിസ്റ്റന്റായി പ്രവർത്തിച്ചിരുന്ന ഇവാമസ, ഒരു സഹായി എന്നതിലുപരി മരുന്നുകൾ എത്തിക്കുന്നതിനായുള്ള ഇടനിലക്കാരനായി പ്രവർത്തിച്ചുവെന്നാണ് പ്രോസിക്യൂഷൻ ആരോപിക്കുന്നത്. ഒരു ഡോക്ടറിൽ നിന്ന് മരുന്ന് കുത്തിവെക്കുന്നത് എങ്ങനെയെന്ന് പഠിച്ച ഇവാമസ, പെറിയുടെ അവസാന ദിവസങ്ങളിൽ പ്രതിദിനം ആറ് മുതൽ എട്ട് തവണ വരെ കെറ്റാമിൻ കുത്തിവെച്ചിരുന്നതായും റിപ്പോർട്ടുകൾ പറയുന്നു. പെറി ഏറ്റവും കൂടുതൽ വിശ്വസിച്ചിരുന്ന വ്യക്തിയായിരുന്നു ഇവാമസ. വർഷം 150,000 ഡോളറായിരുന്നു ഇയാളുടെ ശമ്പളം.

2023 ഒക്ടോബർ 28-നാണ് പെറി മരിച്ചത്. ഈ ദിവസം ഇവാമസ അദ്ദേഹത്തിന് കുത്തിവെപ്പ് നൽകിയ ശേഷം വീട്ടുപകരണങ്ങൾ വാങ്ങാനായി പുറത്തുപോയി തിരിച്ചെത്തിയപ്പോഴാണ് അബോധാവസ്ഥയിലായിരുന്ന താരത്തെ കണ്ടെത്തിയത്. കെറ്റാമിൻ അമിതമായി ശരീരത്തിലെത്തിയതാണ് മരണത്തിന്റെ പ്രധാന കാരണമെന്നും മുങ്ങിമരണം ഒരു അനുബന്ധ ഘടകമാണെന്നും ലോസ് ഏഞ്ചൽസ് കൗണ്ടി മെഡിക്കൽ എക്സാമിനർ പിന്നീട് സ്ഥിരീകരിച്ചു.

മരണത്തിന് കാരണമായ രീതിയിൽ കെറ്റാമിൻ വിതരണം ചെയ്യാൻ ഗൂഢാലോചന നടത്തിയെന്ന കുറ്റം ഇവാമസ സമ്മതിച്ചിട്ടുണ്ട്. ഇതിനെത്തുടർന്ന് അദ്ദേഹത്തിന് മൂന്ന് വർഷവും അഞ്ച് മാസവും തടവ് ശിക്ഷയാണ് പ്രോസിക്യൂഷൻ ആവശ്യപ്പെടുന്നത്. കേസിൽ ഉൾപ്പെട്ട മരുന്ന് വിതരണക്കാർക്കും മറ്റ് ഇടനിലക്കാർക്കും എതിരെ മൊഴി നൽകാൻ തയ്യാറായതിനാൽ ഇവാമസയ്ക്ക് ശിക്ഷയിൽ ഇളവ് ലഭിക്കാൻ സാധ്യതയുണ്ടെന്ന് നിയമവിദഗ്ധർ കരുതുന്നു.

ഇവാമസയുടെ വഞ്ചന പെറിയുടെ കുടുംബത്തെ ആകെ തകർത്തിരിക്കുകയാണ്. പെറിയുടെ ലഹരി വിമോചന പോരാട്ടത്തിൽ ഇവാമസ അദ്ദേഹത്തെ സംരക്ഷിക്കുമെന്ന് തങ്ങൾ വിശ്വസിച്ചിരുന്നതായി മാതാവ് സുസെയ്ൻ മോറിസൺ കോടതിയിൽ സമർപ്പിച്ച കത്തിൽ പറഞ്ഞു. പെറി ഏറ്റവും ദുർബലനായിരുന്ന സാഹചര്യത്തിൽ ഇവാമസ അദ്ദേഹത്തെ മരണത്തിന് വിട്ടുകൊടുത്തുവെന്ന് സഹോദരി കെയ്റ്റ്‌ലിൻ മോറിസൺ ആരോപിച്ചു. അദ്ദേഹത്തിന്റെ ശവസംസ്കാര ചടങ്ങിൽ ഇവാമസ പങ്കെടുത്തതിനെ "ക്രൂരമായ തമാശ" എന്നാണ് മറ്റൊരു സഹോദരിയായ മഡെലിൻ വിശേഷിപ്പിച്ചത്.

Content Highlights: Fresh court filings have brought shocking allegations against Kenneth Iwamasa, the live-in personal assistant of late Friends star Matthew Perry. Prosecutors argue that instead of guarding the actor against addiction, Iwamasa acted as a de facto doctor and drug messenger.